ABŞ Aralıq dənizinin şərqinə “USS Eisenhower” adlı ikinci təyyarədaşıyan gəmi göndərib. Bu barədə ABŞ Mərkəzi Komandanlığı – CENTCOM-un bəyanatında belə yazılır: “Müdafiə naziri Lloyd Ostin “USS Eisenhower”ə bu həftənin əvvəlində bölgəyə gedən “USS Gerald R.Ford” təyyarədaşıyıcısına qoşulmağı əmr etdi”.
ABŞ müdafiə naziri Lloyd Ostin bu qərarı İsrailə qarşı aqressiv hərəkətlərin qarşısını almaq və “Həmas”ın İsrail ərazisinə hücumundan sonra daha böyük müharibəni qızışdırmaq cəhdləri ilə izah edib: “ABŞ-ın hərbi mövcudluğunun bu şəkildə genişləndirilməsi bizim İsrailin təhlükəsizliyini təmin etmək üçün güclü öhdəliyimizi və dövlətlərin və ya qrupların bu müharibəni qızışdırmaq cəhdlərinin qarşısını almaq istəyimizi nümayiş etdirir”.
Qeyd edək ki, bu həftənin əvvəlində “Gerald R.Ford” təyyarədaşıyan gəmisi Aralıq dənizinin şərqinə gəlib.
Xatırladaq ki, oktyabrın 7-də Qəzzada yerləşən “Həmas” yaraqlıları İsrailin cənubuna hücum həyata keçirib. Buna cavab olaraq İsrail ordusu “Həmas"a qarşı hərbi əməliyyata başlayıb.
Qəzzada hadisə başlayandan ABŞ Aralıq dənizinə təyyarədaşıyan gəmilər göndərib. Görünən budur ki, ABŞ Aralıq dənizində gücünü artırır. Qəzzada baş verənlərlə bunun nə əlaqəsi var? Amerika nə etmək istəyir?
Hərbi-siyasi şərhçi Emin Həsənli “Bakı-Xəbər”ə açıqlamasında bildirdi ki,
Yaxın Şərqdə türklərin dediyi “Orta Doğu” layihəsi Amerika üçün çox önəmlidir: “İsrail də buranın xəritəsini dəyişmək istəyir. Uzun illərdir bu layihə var, bunun üçün milyardlarla vəsait xərcləyirlər. Amerikanın da bu planı var və bu heç kimə sirr deyil. Bu haqda xeyli sayda əsərlər yasılıb, filmlər çəkilib. Açıqca bunu bəyan ediblər və hədəfləri Yaxın Şərqdə xəritələrin dəyişilməsi, İsrailin ərazisinin genişlənməsidir. Bu səbəbdən də xeyli işlər görürlər. Dünyanın bir çox yerində olduğu kimi, orda da həm Rusiya ilə, həm Çinlə, həm də Avropa Birliyi ilə Amerikanın maraqları toqquşur. Hər gücün öz marağı var. Çünki hər biri ayrıca bir imperiyadır. Amerikanın təyyarə daşıyan 10 - dan artıq gəmisi var. Bu gəmilərin hər biri 80 - ın üzərində təyyarə tutur. Gəmilərin mühafizəsini təşkil edən digər gəmilər də var. Ona görə də, Amerikanın hərbi gücü və maddi imkanları çoxdur. Bu cür təyyarəni də başqa maraqlar səbəbindən gətirib. Biz yaxın zamanlarda da bu maraqları görəcəyik. Münaqişə böyüyə bilər. Buna digər dövlətlər də cəlb oluna bilər. Amerikanın İraqda, Əfqanıstanda 11 sentyabrdan sonra başlamış əməliyyatları da yarımçıq qalıb. Onun öz məqsədləri, hədəfləri var, onu həyata keçirmək istəyir. Müxtəlif fikirlər var, müxtəlif yanaşmalar var. Bəzən Rusiya ilə Ukrayna müharibəsində də ağıl, məntiq müharibənin olmayacağını, iki qardaşın müharibə etməyəcəyini deyirdi. Amma nəticədə bu müharibə oldu. İndi də, son illər ərzində bunu üçüncü dünya müharibəsi adlandıranlar var və son pik həddinə çatdığını da görürük. Bu səbəbdən də ABŞ bölgədə möhkəmlənməklə, öz mövqeyini daha da gücləndirir”.
HƏMAS-ın liderləri də açıq şəkildə bildirir ki, İran onlara ciddi şəkildə kömək edir. İranın xarici işlər naziri Hüseyn Əmir Abdullahiyanın Suriya və Livana səfəri, “Hizbullah”ın da müharibəyə qoşulacağını anons etməsi təsadüfi sayıla bilməz. ABŞ pərdə arxasında hansı proseslərin getdiyini yaxşı bilir. Ona görə də iki təyyarədaşıyan hərbi gəmisini Aralıq dənizi sahillərinə, həmçinin Fars körfəzinə göndərib. Məqsəd İrana qarşı mümkün hərbi əməliyyatları keçirməkdir. İlk növbədə İsrail HƏMAS-ı Qəzzadan çıxarmalıdır. Əməliyyatlar elə dəqiq şəkildə həyata keçirilməlidir ki, bu tamamilə regionu əhatə etməsin. Çünki Livan “Hizbullah”ı da müharibəyə qoşula, Yəməndə vəziyyət yenidən gərginləşə bilər.
Məhəmmədəli QƏRİBLİ
