İrəvanda etiraz aksiyasında separatçıların önünə çıxan Samvel Şhramanyan təxribatçı açıqlama verib. O, bir müddət əvvəl buraxıldığını elan etdiyi qondarma qurumun ləğv edilmədiyini iddia edib: “Artsax respublikası” ləğv olunmayıb.
O “sənəd”lə (buraxılma haqda özünün imzaladığı “fərman”ı nəzərdə tutur) bağlı çoxlu suallar var, mən bunları burada deyə bilmərəm, amma sizi əmin edirəm ki, “xalqın yaratdığı respublika”nı heç bir "sənəd" ləğv edə bilməz. Bunun cavabını İctimai Televiziyada açıq verəcəm. Onun hazırlanması ilə bağlı göstərişimi artıq vermişəm. Yaxın gələcəkdə bütün suallara cavab verəcəm”.
Şahramanyanın qondarma "Artsax”ı İrəvanda yenidən diriltmək istəyi nədən qaynaqlanır?
Politoloq Samir Hümbətov “Bakı-Xəbər”ə açıqlamasında bildirdi ki, Şahramanyanın etiraz aksiyasının qarşısına çıxıb bu cür fikir səsləndirməsinin heç bir siyasi və hüquqi əsası yoxdur: “Ona görə ki, bu bir qondarma rejim idi, Azərbaycan ərazisində qanunsuz olaraq yaradılmışdı. Azərbaycanın daxili qoşunları və silahlı qüvvələri tərəfindən təmizləndi. Artıq Xankəndidə Azərbaycan Bayrağı dalğalanır, Azərbaycan dövlət və hökümət orqanları orda fəaliyyətə başlayıblar. O özü üçün çox söz deyə bilər, “Artsax” və bunun kimi müxtəlif adlar icad edə bilər. Amma fakt odur ki, həm de-fakto, həm de-yure Azərbaycan artıq Xankəndi, Xocalı, Xocəvənd və Ağdərəyə də nəzarəti həyata keçirib. Bununla da məsələ tamamlanır. Mən hesab edirəm ki, bu, münaqişənin bitməsini istəməyənlərin ortaya atdıqları idealardır. Məqsəd də ondan ibarətdir ki, hər zaman bu münaqişəni gündəmdə saxlasınlar. Reallıq isə budur ki, bu cür etiraz aksiyalarının, təxribatların heç bir təsir gücü artıq olmayacaq. Özləri bilər, Ermənistanda nə istəyirlər, edə bilərlər. Bunun bizə heç bir dəxli yoxdur. Azərbaycan silahlı qüvvələri ərazisinin süverenliyini tam təmin edib, Azərbaycan dövlət orqanları dq orada fəaliyyətə başlayıb. Bundan sonra Şahramanyanın nə deməsindən asılı olmayaraq, biz öz işimizin tamamlanmasından əmin olaraq davam edəcəyik. Aydın məsələdir ki, ermənilər də, onlara dəstək verən qüvvələrin də ikiüzlü siyasəti əvvəllər də olub, indi də olacaq. Bu siyasətin də Azərbaycana hər hansısa bir təsirinin olacağını düşünmürəm”.
Bu arada Ermənistan mətbuatı məlumat yayıb ki, Azərbaycan Respublikasının konstitusiya quruluşunun bərpa edilməsi məqsədilə Ordumuz tərəfindən Qarabağda keçirilən lokal xarakterli antiterror tədbirlərindən sonra özünü buraxaraq İrəvana qaçmış “artsax prezidenti” Samvel Şahramanyan iki həftədir ki, Paşinyanla görüşməyə çalışır.
“Baş nazir qəti imtina etmədən bu görüşü hər cür təxirə salır. Şahramanyan hətta dünən mətbuata “vacib bəyanat verəcəyi” barədə məlumat yaymaqla Paşinyana təzyiq göstərməyə çalışıb. O hesab edir ki, bu, Paşinyanı görüşə razılaşmağa məcbur edəcək, lakin görünür, bu blef uğursuzluğa düçar olub”, - məlumatda deyilir. Görünür, saxta “prezident bu cür blefləri ilə Paşinyanın diqqətini çəkmək istəyir.
Məhəmmədəli QƏRİBLİ
