“Azərbaycan Qoşulmama Hərəkatının sədri kimi kolonializmə qarşı mübarizə aparan və azad olmağa çalışan xalqları dəstəkləyir”. Bu fikirlər Prezident İlham Əliyevin Bakıda keçirilən “Neokolonializm: İnsan Hüquqlarının Pozulması və Ədalətsizlik” mövzusunda beynəlxalq konfransın iştirakçılarına müraciətində qeyd olunub.
“Sizin 2023-cü ilin 6 iyulunda Azərbaycanın Qoşulmama Hərəkatına sədrliyi çərçivəsində Bakıda keçirilən Nazirlər Toplantısı zamanı, daha sonra 22 sentyabrda Nyu Yorkda BMT Baş Assambleyasının qərargahında, bu gün isə yenidən Bakıda bəşəriyyət üçün xüsusi aktuallıq kəsb edən kolonializm, onun fəsadları və neokolonializmlə mübarizəyə həsr olunmuş tədbirdə iştirakınız Azərbaycanın Qoşulmama Hərəkatının sədri kimi bu məsələyə göstərdiyi dəstəyin əyani göstəricisidir.
Neokolonializmlə mübarizə mövzusunun bütün mümkün platformalar vasitəsilə beynəlxalq ictimaiyyətin diqqətinə çatdırılması olduqca vacibdir. Bu xüsusda, BMT Baş Assambleyasının 4-cü Komitəsinin (siyasi və dekolonizasiya məsələləri) fəaliyyəti daha da canlandırılmalıdır”, - deyə müraciətdə vurğulanıb.
Bakıda keçirilmiş konfransın kolonializm, onun fəsadları və neokoloniazlimlə mübarizə ilə bağlı qlobal gündəlikdə dayanan çağırışların və imkanların müzakirəsi üçün əlverişli fürsət olduğunun qeyd edildiyi müraciətdə bildirilib: “İnanıram ki, konfrans çərçivəsində aparılacaq müzakirələr kolonializmə qarşı mübarizə sahəsində birgə səylərin səfərbər olunmasına, bəşəriyyətin rifahı və gələcək nəsillərə “kolonializmdən azad dünya” miras qoymaq məqsədilə yeni ideya və təşəbbüslərin irəli sürülməsinə töhfə verəcəkdir”.
“Azərbaycan Prezidenti kolonializmi dövlət siyasətinə çevirən Fransaya və onun yolunu gedənlərə çox ciddi mesaj verdi ki, Azərbaycan azadıq istəyən xalqların yanındadır”
Müstəqil.az saytının baş redaktoru Faiq Balabəyli “Bakı-Xəbər”ə şərhində bildirdi ki, Azərbaycan Prezidentinin Bakıda keçirilən “Neokolonializm: İnsan Hüquqlarının Pozulması və Ədalətsizlik” mövzusunda beynəlxalq konfransın iştirakçılarına müraciətində bütün dünya üçün aktual olan məsələlər var və bəşəriyyəti ağuşuna almaqda olan neokolonializm Fransanın timsalında ifşa edilir. F.Balabəyli hesab edir ki, bəşəriyyət əlbir olub qlobal problemə çevrilən yeni müstəmləkəçilik addımlarını irəliləməyə qoymamalıdır. “Azərbaycanın Qoşulmama Hərəkatının sədri kimi kolonializmə qarşı mübarizə aparması və azad olmağa çalışan xalqları dəstəkləməsi təbiidir və heç kəsdə, heç bir ölkədə təəccübə səbəb olmamalıdır.
Ölkə başçısının həm bu ilin iyul ayında ölkəmizdə, həm də sentyabrın 23- də Nyu-Yorkda BMT Baş Assambleyasının qərargahında iştirak edərək fikirlərini bildirməsi, eyni zamanda iki gün öncə Bakıda bəşəriyyət üçün xüsusi aktuallıq kəsb edən kolonializm, onun fəsadları və neokolonializmlə mübarizəyə həsr olunmuş tədbirdəki mövqeyi Azərbaycanın Qoşulmama Hərəkatının sədri kimi bu məsələyə göstərdiyi dəstəyinin bariz nümunəsidir.
Əlbəttə ki, konfrans çərçivəsində yürüdülən fikirlər, görülməsi vacib olan işlər bəşəriyyətdə sabitliyə, kolonializmə qarşı mübarizədə səyləri və gücləri birləşdirmək çox vacibdir. Dünya azad ölkələrlə daha gözəl görünə bilər. İnsanların azad, özgür, firavan yaşaması üçün sözsüz ki, ölkələrin də azad olması vacibdir. Azərbaycan Prezidenti kolonializmi dövlət siyasətinə çevirən Fransaya və onun yolunu gedənlərə çox ciddi mesaj verdi ki, Azərbaycan azadıq istəyən xalqların yanındadır.
Azərbaycan indi müstəqil dövlət olaraq bunu çox gözəl dərk edir. Keçmişə boylandıqca kolonializmin necə böyük fəsadlar verdiyinin, xalqların kölə vəziyyətinə gətirilmək həddinə çatdırıldığını görürük. Biz uzun illər Sovetlərin müstəmləkə siyasətindən əziyyət çəkmiş bir xalq olaraq azalıq istəyən xalqları daha yaxşı duyuruq. Bu baxımdan Azərbaycan müstəqilliyini qazanmış, torpaqlarını işğaldan, işğalçılara dəstək və yardımçı olan qara niyyətli ölkələrdən qurtulmağın yolunu bilən, bunu bacaran bir ölkə olaraq, əlbəttə ki, bu istiqamətdə səy göstərməlidir”-deyə F.Balabəyli qeyd etdi.
Leyla QARAXANLI
