Paytaxt Bakı indiyə qədər çox tədbirlərə, forumlara, beynəlxalq konfranslara ev sahibliyi edib və hər birində də istənilən nəticə əldə edilib.
Oktyabrın 20-də Bakıda Bakı Təşəbbüs Qrupunun təşkilatçılığı ilə “Neokolonizalizm: İnsan Hüquqlarının Pozulması və Ədalətsizlik” adlı beynəlxalq konfrans keçirilib və konfransda 14 ölkənin, eləcə də Fransanın müstəmləkə altında saxladığı dənizaşırı ərazilərinin (Yeni Kaledoniya, Fransız Polineziyası, Fransız Qvianası, Martinika və Qvadelupa), həmçinin, Korsika təmsilçilərinin də iştirak etdiyi məlumdur.
Bakı Təşəbbüs Qrupu (BTQ) Azərbaycan Respublikasının sədrlik etdiyi Qoşulmama Hərəkatının Əlaqələndirmə Bürosunun nazirlər toplantısı çərçivəsində 6 iyul 2023-cü ildə Bakıda “Müstəmləkəçiliyin tamamilə aradan qaldırılmasına doğru” adlı konfransın iştirakçıları tərəfindən yaradılıb.
Bakı patformasında çıxış edənlərin əksəriyyəti Fransanın boyunduruğundan azad olmaq üçün rəsmi Bakıdan kömək umur və çox inanırlar ki, Azərbaycan onların bu problemlərini BMT-yə daşıyacaq, buradan da onların azadlıq yolu başlayacaq. Uzun illərdir Fransanın müstəmləkəçilik siyasətindən əziyyət çəkən ölkələrin nümayəndələri Bakı platformasından çox şey gözləyir.
“Ümid edirik ki, Bakı platforması Kanakların hüquqları uğrunda mübarizəni yeni səviyyəyə qaldırmağa imkan verəcək”. Bunu konfransda Fransadakı “Kanak” gənclər hərəkatının nümayəndəsi Vea Kuanene bildirib.
“Biz yerli xalqlarımızın hüquqlarını qorumaq üçün buradayıq. Kanakların mübarizəsinin məqsədi legitimliyə nail olmaqdır. Çalışırıq ki, problemimizi bütün dünyaya çatdıraq. Qoşulmama Hərəkatında iştirak edən ölkələrin dəstəyinə ümid edirik. Hüquqlarımız uğrunda mübarizə və bunun müzakirəsi Azərbaycanın sayəsində uğurlu olacaq və Bakının hüdudlarından kənara çıxacaq”-deyə Vea Kuanene bildirib.
Martinikanın Azadlıq Partiyasının nümayəndəsi Lyuk Frensis Kerol isə diqqəti ona çəkib ki, Azərbaycan müstəmləkə siyasətindən danışır, digərləri isə susur.
"Digər dövlətlər müstəmləkə siyasəti barədə susmağa üstünlük verdiyi halda Azərbaycan öz mövqeyini bildirir. Biz Bakıda toplaşmışıq və mövcud imkanlardan istifadə edərək gələcəkdə bu mövzunu BMT səviyyəsinə çıxaracağımıza ümid edirik. Qeyd etmək lazımdır ki, Azərbaycan hazırda Qoşulmama Hərəkatına sədrlik edir, sonra isə Hərəkata Uqanda sədrlik edəcək. Biz növbəti addımlarımızı diqqətlə müzakirə edərək bu problemi ictimai müzakirə olunması üçün qaldırmalıyıq”-deyə o qeyd edib.
Bildiyimiz kimi, çıxışlarında bir neçə nümayəndə ümid etdiklərini vurğulayıb ki, Fransanın müstəmləkə əsarətindən azad olması məsələsi BMT-nin müzakirəsinə çıxarılacaq.
Ekspertlərə görə, əlbəttə, bu, Azərbaycandan Azərbaycana bir çağırışdır. Ekspertlərin fikrincə, onlar Azərbaycandan kömək umurlar ki, Fransanın əsarətindən xilas olmaq məsələsini BMT müstəvisinə çıxarsın. Əslində, bu o ölkələrin Azərbaycandan xahişidir.
“Onların Azərbaycanda Azərbaycana çağırış etməsi, dəstək istəməsi təbiidir”
“Qarabağa aparan yol” qəzetinin baş redaktor müavini, AYB üzvü, prezident mükafatçısı, yazıçı-publisist Fariz Çobanoğlu baki-xeber.com-a şərhində bildirdi ki, Azərbaycan hər zaman əzilən insanların yanında olur və daim hümanistlik nümayiş etdirir. Dünyanın və insanlığın ağır sınağa çəkildiyi dönəmlərdə Azərbaycan hüquqları tapdanmış, müstəmləkə boyundurğunda əziyyət çəkən xalqlara dayaq durub. Fransa müstəmləkəsindən cana doyan, illərdir fransızlar tərəfindən etnik təmizləməyə məruz qalan, azadlığı, sərvəti əlindən alınan xalqların azadlıq istəklərinin Bakı platformasından beynəlxalq ictimaiyyətə, BMT-yə daşınması çox mühüm məsələdir deyən F.Çobanoğlu bildirdi ki, o xalqlar Azərbaycan dövlətinin sözünə, əməlinə inanırlar. “Son illər paytaxt Bakı müxtəlif istiqamətli tədbirlərə, konfranslara, forumlara ev sahibliyi edir. Heç şübhəsiz ki, bütün istiqamətlərdə Bakı platforması ciddi bir tribuna kimi qəbul edilir və buradan səslənən fikirlər ünvanına çatır. Azərbaycan nəinki bölgədə, eləcə də dünyada sayılıb hörmət edilən, sözünə, əməlinə inanılan bir ölkədir. Bakıda Bakı Təşəbbüs Qrupunun təşkilatçılığı ilə “Neokolonizalizm: İnsan Hüquqlarının Pozulması və Ədalətsizlik” adlı beynəlxalq konfransın özünün çox böyük əhəmiyyəti var. Bu konfransda Fransanın müstəmləkə altında saxladığı dənizaşırı ərazilərinin- Yeni Kaledoniya, Fransız Polineziyası, Fransız Qvianası, Martinika və Qvadelupa, həmçinin, Korsika təmsilçilərinin də iştirak etməsi bu platformanın uğurudur. Tədbirdə səsləndirildi ki, Azərbaycandan başqa heç bir ölkə onların problemlərinin həllinə çalışmır və onlar Azərbaycanın onların azadlığı üçün addımlar atdığını təqdir edirlər. Fransanın müstəmləkə siyasətindən əziyyət çəkən xalqların, toplumların Bakıdan dəstək gözləməsi ölkəmizə inamdan irəli gəlir. Onlar bu dəstəyi alırlar da. Haqlı olaraq ümid edirlər ki, ilk fürsətdə Azərbaycan onların problemini BMT səviyyəsinə çıxaracaq. Çünki Azərbaycan hər zaman insanlığa töhfə verən təşəbbüslərlə çıxış edib. Yadınıza salın, pandemiyanın tüğyan etdiyi dövrdə dünyanın kasıb ölkələri vaksin ala bilmirdi, özünü “demokratiyanın beşiyi” adlandıran ölkələr susurdu, o vaxt ən yüksək tribunalarda Azərbaycan Prezidenti vaksinlərin ədalətli bölünməsi, kasıb ölkələrə dəstək təşəbbüsünü qaldırdı. Yəni Azərbaycan həmişə insanlığa dəstək olub. Azərbaycana inamın digər səbəbi isə ölkəmizin güclü olmasıdır. Azərbaycanın BMT-nin Qarabağla bağlı qətnaməsinin bəndlərini təkbaşına həyata keçirməsi o insanların ölkəmizə inamını artırdı. Onlar inanırlar ki, Bakı platforması Fransa müstəmləkələrinin azadlıq istəklərini BMT-yə daşıyan etibarlı yoldur. Bu baxımdan onların Azərbaycanda Azərbaycana çağırış etməsi, dəstək istəməsi təbiidir. Onlar Bakı platformasında özlərinə yetərincə dəstək qazanıblar, Azərbaycan xalqı azadlıq istəyən hər bir xalqın səsinə səs verir. Söhbət qanuni haqlardan gedir ki, illərdir, əsrlərdir tapdalanır. Biz özümüz 70 il totalitar sovet rejiminin tapdağında olmuşuq və müstəqiliyimizi bərpa etmişik. İnanıram ki, o xalqlar da mübarizə və dəstək nəticəsində azadlıqlarını əldə edə biləcəklər”-deyə F.Çobanoğlu vurğuladı.
İradə SARIYEVA
