Molla rejiminin əl buyruqçuları onlara heç bir aidiyyəti olmayan Azərbaycan tarixi barədə yazılan mətnləri, ümumiyyətlə, çap olunan “Azərbaycan tarixi” kitablarını, dərsliklərini əsassız şəkildə təftiş edir, kitablarda əks olunan məlumatlar haqda saxta iddialar irəli sürürlər.
Bizim tarixçilərin Birinci Qarabağ müharibəsində Ermənistan tərəfindən bizə qarşı vuruşan ermənilərə və başqalarına məxsus terror qrupları, muzdluları haqda yazdıqları molla rejimində qıcıq yaradır, onlar çalışır ki, erməni terroru haqda yazılanları müdafiə etsin.
2008-ci ildə AMEA-nın A.Bakıxanov adına Tarix İnstitutunun çap etdiyi VII cildlik “Azərbaycan tarixi”nin yeddinci cildində yazılanlardan rahatsız olan panfarsistlər Azərbaycan tarixçilərinə iftira atıb, məlumatları saxtalaşdırmaq istəyirlər. Söhbət sözügedən nəşrin 268-ci səhifəsində yer alan “Azərbaycanın Ermənistan tərəfindən işğal edilmiş və separatçı "Dağlıq Qarabağ Respublikası"nın nəzarətində olan əraziləri beynəlxalq terrorizmin təlim düşərgələrinə və müxtəlif növ kimyəvi qırğın silahlarının sınaq meydanına, habelə nüvə tullantılarının basdırıldığı zonaya çevrilmişdi. Laçın rayonunun Zabux kəndində "Kürd konqresi" (başçısı Zeylan Öcalan), Xocavəndin Qırmızı Bazar
ərazisində suriyalıların "Xalq Azadlıq Cəbhəsi" (başçısı Zamir əl-Qisse), Zəngilan rayonunun Mincivan qəsəbəsində liviyalıların "Hizbullah" (başçısı Ömər Şəhabi) və livanlıların "Həmas" (başçısı Musa Qulam Haq) kimi terrorçu qrupları
yerləşdirilmişdi. "ASALA" erməni terrorçu təşkilatının radikal qanadı üçün Şuşanın Xəlfəli, Xocavəndin Kiş, Əsgəranın Xankəndi yaşayış məntəqəsində təlimdüşərgələri təşkil edilmişdi. 1996-cı il mayın 26-da Azərbaycanın işğal olunmuş ərazilərinə əfqan ərəbləri - "əl-Qaidə"çilər gətirilmişdi. Burada nüvə terrorizmi (Ağdaban, Xanabad, Həsənriz, Kropatkin), bioloji terrorizm (İstisu, Kiş, Aşağı Veysəlli), kimyəvi terrorizm (Vejnəli, Havıslı) və kompüter terrorizmi (Şuşa, Xankəndi) üzrə qruplar fəaliyyət göstərirdi” fikrindən gedir ki, bu da mollaları yaman narahat edib. Bu səbəbdən də Azərbaycan tarixini saxtalaşdırmaq, azərbaycanlıları çaşdırmaq, öz tariximiz barədə bizə yalan, saxta məlumatlar ötürmək üçün molla rejimi Telegramda “Azərbaycan tarixi” adlı kanal yaradıb və bu kanal vasitəsilə öz çirkin niyyətlərini həyata keçirirlər. Rejimin əlində olan Telegram kanalı iddia edir ki, guya 7 cildlik "Azərbaycan Tarixi"nin yeddinci cildinin 268-ci səhifədə Hizbullah və HƏMAS-ın üzvlərinin bizim torpaqlarda yerləşdirilməsi, erməni və başqa terror təşkilatlarının Azərbaycana qarşı döyüşməsi barədə verilən məlumatlar “yalandır”. Kanal iddia edir ki, guya faktlar “təhrif” edilib. Onlar eyni zamanda da erməni terror təşkilatlarını müdafiə edir, onların cinayətləri barədə tarixçilərimizin yazdıqları həqiqətləri həzm edə bilmirlər, bizim tarixçilərin yazdıqlarını “biabırçılıq” adlandırırlar.
“Molla rejimi erməni terror təşkilatlarını və digər terror örgütlərini bu şəkildə müdafiə edir”
AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru Faiq Ələkbərli “Bakı-Xəbər”ə şərhində bildirdi ki, molla rejiminin əlaltılarının Azərbaycan tarixçilərinin yazdıqlarına hər zaman qısqanc və ağrılı yanaşdığı faktdır. Bunun onların bizim tarixi təhrif etmək və gerçəyi ört-basdır etmək, erməni terrorunu müdafiə etmək cəhdindən irəli gəldiyini deyən F.Ələkbərli “Azərbaycan əraziləri Ermənistanın və onun havadarlarının işağlında olanda bu bölgədə terror qruplaşmalarının olması barədə bilgilər vardı. Bunlar dəqiq bilgilər idi. İstər erməni terror təşkilatları, istər kürd hərbi terror qruplaşmaları, istərsə də Hizbullaha və HƏMAS-a aid olan müvafiq terror qruplaşmasının üzvlərinin müəyyən qismi olsun, onlar bizim işğal altında olan ərazilərimizdə məskunlaşdırılmışdı. Onlar burada elə-belə yerləşdirilməmişdilər. Bu terror qrupları istər Ermənistanla, istərsə də indi məhv olmuş terrorçu rejimlə işbirliyində idi. Ermənistanın bu cür terror qruplaşmalarını Azərbaycan ərazisində yerləşdirməsi, onların təlimlərinə şərait yaratması təsadüfi deyildi, təbii, onlardan istifadə məsələsi vardı. Bu faktların “Azərbaycan tarixi”nin VII cildində əks olunması Tehran rejimini ona görə narahat edir ki, bu terror qruplaşmalarının həm onunla, həm də Ermənistanla əlaqəsi olub. Əslində bu bölgəni daim təhlükə mənbəyinə çevirmək, burada sülh və barışın olmaması, regionda daim təxribatların olması kimi məsələlərə görə onlar bu addımı atıblar. Bu baxımdan, “Azərbaycan tarixi” kitabında öz əksini tapmış bu bilgilərə molla rejiminin əlaltısı olan hansısa sosial media platformalarında, sosial şəbəkə hesablarında başqa don geydirilməsi cəhdləri onların iç üzünün ifşa olunması ilə bağlıdır. Onlar mahiyyətlərinin, apardıqları çirkli siyasətin ifşa olunduğunu görürlər. Əgər bu məsələlər gerçək olmasaydı heç zaman “Azərbaycan tarixi” kitabının VII cildində əksini tapmazdı. Molla rejimi erməni terror təşkilatlarını və digər terror örgütlərini bu şəkildə müdafiə edir”-deyə bildirdi.
Onun sözlərinə görə, İran tərəfi bu cür çirkin üsullarla işğal dövründə Hizbullah və HƏMAS-ın bizim ərazilərdə yerləşdirilməsinin onların əleyhinə çevirilməsindən qorxur. O qeyd etdi ki, hazırda Hizbullaha və HƏMAS-a ən ciddi dəstək verən ölkələrin başında sözdə islam ölkəsi adlanan İran gəlir. “Təəssüflər olsun ki, bu rejim yalan və uydurmaları ilə dünya ictimaiyyəti ilə yanaşı Güneydəki Azərbaycan türklərini də, farsları, kürdləri və başqa xalqları da aldadır. Tehran rejimi həmişə belə çirkli oyunlar oynayır”-deyə bildirən F.Ələkbərli hesab edir ki, ermənipərəst molla rejimi öz əməlləri ilə Ermənistana və terrora dəstək vermiş olduğunu gizlətmək istəyir, amma buna nail ola bilmir.
İradə SARIYEVA
