Sentyabrın 28-də separatçı rejimin rəhbəri Samvel Şahramanyan qanunsuz quruluşun - "Arsax"ın mövcudluğuna son qoyulması barədə “fərman” imzaladığı məlumdur. Qeyd edilirdi ki, bu rejimin bütün "dövlət qurumları" və "təşkilatları" 1 yanvar 2024-cü il tarixinədək buraxılacaq.
Hazırda İrəvanda olan separatçıların “prezidenti” indi başqa bir “fərman” “imzalayıb”. “Fərman”da “2023-cü il oktyabrın 1-dən sonra “Artsax Respublikası” adından verilmiş sənədlər qüvvədədir” (?) qeyd edilir. Bundan başqa, Şahramanyan artıq məhv edilmiş oyuncaq rejimin “dövlət” və “ictimai” “qurumlarının” “fəaliyyətlərini” “diriltmək” iddiasını əks etdirib. Bu biabırçı və heç bir hüquqi, siyasi dəyəri olmayan, yalnız baş qatmağa, erməniləri ovutmağa hesablanan üzdəniraq “fərman”da “"arsax prezidenti”, “hökuməti”, “təhlükəsizlik şurasının katibi”, “parlamentin deputatları”, “hakimlər” və “ombudsman” öz vəzifələrini tutmağa davam edəcəklər, "artsax respublikası" adından verilən “sənədlər” etibarlıdır" kimi fikirlər yer alıb. Məsələ burasındadır ki, Şahramanyan ənənəvi kəndirbazlığını davam etdirir və onların toruna düşüb Qarabağdan gedən ermənilərin narazılığını yatırmaq üçün bu cür süni və əsassız addımlar atır. Bir tərəfdən “arsax”ın ləğv edildiyini demək, o biri tərəfdən də olmayan bir quruluşun adından “fərman” “imzalamaq” yalnız ermənilərə xas xüsusiyyət ola bilər.
“…Onların taleyi ilə oynayanların sifarişlərini yerinə yetirirlər”
Şahmaranyanın üzdəniraq “fərmanına” şərh verən Azad Vətən Partiyasının sədri Akif Nağı “Bakı-Xəbər”ə bildirdi ki, ermənilərin bu oyunları gözlənilməz deyildi. “Onların asanlıqla bu bəd və məkrli niyyətlərindən əl çəkmək fikirləri yoxdur. Onlar Azərbaycan ordusunun gücü, Azərbaycan rəhbərliyinin iradəsi, xalqımızın əzmi qarşısında geri çəkilməli oldular və başa düşdülər ki, Azərbaycana güclə, hərbi yolla müqavimət göstərməyin mənası yoxdur, haqq-ədalət Azərbaycanın tərəfindədir, ona görə də onların taleyi ilə oynayanların sifarişlərini yerinə yetirirlər. Azərbaycan öz mövqeyini bildirdi ki, istəyirsinizsə Qarabağda qalın. Şəxsən mən onların Qarabağda qalmasının əleyhinəyəm. Çünki onlar o qədər cinayət törədiblər ki, o cinayətlərinə görə cavab verməlidir. Belə hərəkətləri yenə də davam etdirirlərsə, onların qayıdıb azərbaycanlılarla birgə yaşamaları mümkünsüz görsənir. Azərbaycanda ermənifobiya və sair yoxdur, onlar öz cinayətləri ilə özlərini kənarda qoyublar, Qafqaz xalqlarının prinsiplərini, adət-ənənələrini pozublar.
Azərbaycan yenə humanistlik göstərib elan etdi ki, kim istəyirsə Azərbaycan vətəndaşlığını qəbul edib bizim qanunlar çərçivəsində yaşaya bilər, dövlət də onların təhlükəsiziyinə şərait yaradar. Amma onlar yenə də oyunlara getdilər, yenə də xarici qüvvələrin əlində alətə çevrildilər, gözəgörünməz çubuğun işarəsi ilə Qarabağı tərk etdilər, indi də o rollarını davam etdirirlər. İndi guya İrəvanda hansısa “mühacir hökumət” yaratmaq istəyirlər, bu nə oyunbazlıqdır? Bununla nəyə nail olacaqlar, anlaya bilmirəm. Azərbaycana qarşı hansısa yürüş, mitinq keçirməklə sən nə əldə edəcəksən? Bu cəhdlərin faydasız olduğunu ermənilər başa düşmək istəmirlər. Bu gün də onlardan oyuncaq kimi istifadə edilir. Guya hansısa “fərman”la “dövlət” “qurumlarının” hansını buraxıblar, hansısa “fəaliyyətdədir” kimi təsəvvür yaratmaq istəyirlər. Guya Şahramanyan nə isə etmək istəyir, qondarma qurumu buraxıb, amma hansısa “səlahiyyətlərinin” olduğunu deyir. Sənin nə səlahiyyətin var? Sən cinayətkarsan, sən qanun qarşısında cavab verməlisən”-deyən A. Nağı qeyd etdi ki, separatçı qalıqlarının İrəvanda bu cür oyunlar oyanaması bizim üçün gözlənilən idi. “Onların oyunbazlığı heç nəyə yarayan deyil. Ermənilər başqalarının əlində alət olmaqdan qurtarmalıdır. Qarabadan gedən ermənilər Ermənistanda qalmaq istəmirlər, üçüncü ölkəyə getmək istəyirlər. Onları Qarabağdan aparmaqla Paşinyan hökuməti də, müxalifət də onlardan istifadə etməyə çalışır. Yəni onlar Ermənistanda qalıb pis vəziyyətdə yaşasınlar, lazım olanda da onları meydana çıxarıb aksiya keçirdib, “bəyanat” versinlər. Xaricdəki erməni mərkəzləri, erməni kilsələri ermənilərdən alət kimi istifadə edir”-deyə qeyd edən A.Nağı deyir ki, ermənilər özləri özlərini dolaşdırıblar, bununla da onların hansısa hədəfə çatması mümkün deyil.
İradə SARIYEVA
