Ermənistanın baş naziri Nikol Paşinyan Avropa İttifaqının (Aİ) vasitəçiliyi əsasında Bakı ilə İrəvan arasında münasibətlərin normallaşdırılması üçün yol xəritəsi hazırlandığını açıqlayıb.
Bu barədə Paşinyan Litvanın Baş naziri İnqrida Şimonite ilə birgə brifinq zamanı bildirib.
“Vurğulamaq istərdim ki, mənimlə Azərbaycan Prezidenti arasında Brüsseldə keçirilən görüşlər zamanı Avropa İttifaqı Şurasının rəhbəri Şarl Mişelin vasitəçiliyi ilə münasibətlərin normallaşdırılması üçün yol xəritəsi hazırlanıb. Bu, Qranadada imzalanan dördtərəfli bəyanatda da öz əksini tapıb”, - o deyib.
Ermənistan hökumətinin başçısı hesab edir ki, tərəflərin bu yol xəritəsinə sadiqliyi sülh prosesini sürətləndirəcək.
Maraqlıdır, bu, oktyabrın sonunda Brüsseldə planlaşdırılan Azərbaycan-Ermənistan dövlət başçılarının görüşündə ciddi nəticə əldə etməyə əsas verirmi?
“Artıq Brüsselin ənənəvi yanaşması dəyişməli və Ermənistanla daha kəskin tonda danışmağı bacarmalıdır”
Sözügedən məsələyə aydınlıq gətirən politoloq Tural İsmayılov “Bakı-Xəbər”ə açıqlamasında buna bir neçə aspektdən yanaşdı: “Əlbəttə ki, Azərbaycan-Ermənistan münasibətlərinin yaxşılaşdırıması, iki ölkə arasında yekun sülh müqaviləsinin imzalanması üçün görüşlərin keçirilməsi müstəsna əhəmiyyətə malikdir. Nəzərə almaq lazımdır ki, Azərbaycan hər zaman Avropa İttifaqı Şurasının rəhbəri Şarl Mişelin moderatorluğu altında həyata keçirilən Brüssel formatını dəstəkləyib. O cümlədən, bu formatın iki ölkənin münasibətlərinin yaxşılaşdırılması baxımından ciddi töhfələrinin olduğunu qeyd edib. O baxımdan hesab edirəm ki, Fransanın təxribatları ilə fasiləyə uğrayan bu platformanın, Brüssel formatının yenidən bərpa edilməsi bizim üçün çox vacib əhəmiyyətə malikdir. Həm də təqdir ediləndir. Həmçinin hesab edirəm ki, bu görüşlər artıq Azərbaycanla Ermənistan arasında yekun sülh müqaviləsi və razılaşmasının əldə edilməsi baxımından ciddi naliyyətlərə gətirib çıxara bilər. O baxımdan qarşıdakı Brüssel görüşünün xüsusi əhəmiyyətə malik olacağını düşünürəm. Ən azından, iki ölkə arasında münasibətlərin daha da yaxşılaşdırılması baxımından, həmçinin yekun sülh müqaviləsi üçün ortada olan anlaşılmazlığın aradan qaldırılması baxımından da AŞ-nin moderatorluğu altında keçiriləcək görüşdən pozitiv gözləntimiz var. Lakin istənilən halda Paşinyana tam güvənmək mümkün deyil. O üzdən, Avropa İttifaqı Şurası da əlində olan real təzyiq imkanlarından istifadə edib İrəvanı üzərinə götürdüyü öhdəliklərə əməl etməyə səsləməlidir. Paşinyanın danışıqlarda hansısa bəhanə ilə çıxış etməsinə imkan verməməlidir. Bunun əksi olacağı təqdirdə görüşdə hansısa ciddi və böyük formatlı müsbət dəyişilikləri gözləmək olmaz. Hər halda hesab edirəm ki, artıq Brüsselin ənənəvi yanaşması dəyişməli və Ermənistanla daha kəskin tonda danışmağı bacarmalıdır. Belə olan təqdirdə, həqiqətən də Cənubi Qafqazda sülh və etimad quruculuğu yenidən bərqərar edilə bilər”.
Vidadi ORDAHALLI
