Azərbaycanın, eləcə də başqa ölkələrin daxili işlərinə qarışmağa iddialı olan, hətta bəzən cəhdlər də edən Fransa öz daxilindəki problemlərin həllinə qətiyyən maraq göstərmir. Bu gün Fransa müstəmləkəsində olan ölkələr azad olmaq uğrunda mücadilə verir.
Əlbəttə, Fransa və onun yandaşları heç zaman müstəmləkələrin azad olmasını istəmirlər. Fransa zülmündən xilas olmaq yolunda olan ölkələr Azərbaycanın beynəlxalq platformalarda qaldırdığı təşəbbüslər nəticəsində özlərinə dəstək qazanırlar.
“Azərbaycanın təşəbbüsü ilə biz özümüzə dəstək tapmağa çalışırıq”. Bu barədə Yeni Kaledoniya nümayəndəsi Kayizi Pier mətbuat konfransı zamanı deyib. “Fransa çalışır ki, müstəmləkədən çıxarılan ölkələr siyahısında bizim adımız olmasın. Azərbaycanın təşəbbüsü ilə Qoşulmama Hərəkatı ölkələrinə çıxış əldə etdik və onlardan dəstək istəyirik. Biz yenidən referendum keçirilməsini tələb edirik. Çünki bundan öncəki referendumda iştirak etmədik. Beynəlxalq aləmin dəstəyini almaq istəyirik. Azərbaycana səylərinə görə təşəkkür edirik və bu məsələnin beynəlxalq ictimaiyyətə çatdırılmasına kömək istəyirik”,- deyə o, əlavə edib.
“Fransa müstəmləkəçilik siyasətindən, uzun illər başqa xalqların haqq və hüquqlarını tapdamaqdan əl çəkməlidir”
“Novoye vremya” qəzetinin baş redaktoru Şakir Ağayev “Bakı-Xəbər”ə şərhində “Bilirsiz ki, Azərbaycan hazırda Qoşulmama Hərəkatının rəhbəridir. Hərəkat çərçivəsində Azərbaycanın belə bir tədbir keçirməsi cəsarətli addımdır. Azərbaycan bu təşəbbüslərlə göstərir ki, dünya yeni müstəmləkə siyasəti ilə idarə oluna bilməz. Dünyanı yeni müstəmləkə siyasəti ilə idarə etməyə davam edən Avropa, başda Fransa olmaqla, bu siyasətinə son qoymalıdır. Fransa müstəmləkəçiliyinə qarşı baş verən hadisələr, etirazlar göstərir ki, sabit dünya üçün müstəmləkəçilik siyasətindən əl çəkmək lazımdır. Fransa müstəmləkəçilik siyasətindən, uzun illər başqa xalqların haqq və hüquqlarını tapdamaqdan əl çəkməlidir”-deyə bildirdi.
Ş.Ağayevin sözlərinə görə, Azərbaycan da Qoşulmama Hərəkatının rəhbəri kimi Fransanın müstəmləkəçilik siyasətindən əziyyət çəkən toplumlara dəstək üşün beynəlxalq platformalarda təşəbbüslər irəli sürür. “Bu baxımdan, Yeni Kaledoniya nümayəndəsi Kayizi Pierin Azərbaycanın təşəbbüsü ilə beynəlxalq aləmdən dəstək almaq ümidlərini ifadə etməsi təbiidir. Əlbəttə, beynəlxaq aləm Fransanın müstəmləkə siyasətinə qarşı çıxmalı və onun müstəmləkələrinin azad olmaq niyyətini təqdir etməlidir. Azərbaycan müstəmləkə boyunduruğunda əzilən xalqların xilasına lazımı dəstək verir. Çünki Azərbaycan özü müstəqil və güclü dövlət olana qədər bu probemlə üzləşib. İndi isə müstəqil və inkişaf edən bir ölkə kimi üzərinə beynəlxalq səviyyədə çox böyük təşəbbüs götürüb. Azərbaycan yalnız bir dövlət kimi deyil, həm də Qoşulmama hərəkatının sədri kimi bu təşəbbüsü irəli sürüb və onun dəstəklənəcəyi şübhəsizdir. Qoşulmama Hərəkatı BMT-dən sonra ikinci böyük təşkilatdır. Azərbaycanın Qoşulmama Hərəkatının sədri kimi də Yeni Kaledoniyanın yanında olması yeni dünya siyasətində çox cəsarətli və nümunəvi addımdır. Tədbirdə iştirak edən nümayəndələr də bunu deyir. Demirəm ki, bu konfransda qaldırılan məsələlər tezliklə öz həllini tapacaq, xeyr. Amma dünyaya bir nümunə olacaq və nə zamansa müstəmləkəçilikdən əziyyət çəkən toplumların xilasına yol açacaq, onlar bu mübarizədə arxalarında Azərbaycanı və Qoşulmama Hərəkatını görəcək. Bu onların müstəqilliyi üçün ilhamverici bir təşəbbüs olacaq”-deyə Ş.Ağayev qeyd etdi.
İradə SARIYEVA
