Avropa Şurasının Nazirlər Komitəsi və Avropa İttifaqının nümayəndə heyəti Strasburqda keçirilən görüşdə Ermənistan-Azərbaycan münaqişəsi ilə bağlı bəyanat qəbul edib.
Bəyanatda hər iki qurum Azərbaycanı Qarabağ ermənilərinin geri qayıtması üçün şərait yaratmağa çağırıb: “Avropa İttifaqı Azərbaycanın 19 və 20 sentyabr tarixlərində keçirdiyi hərbi əməliyyatlardan sonra Qarabağ ermənilərinin kütləvi surətdə köçürülməsi və Laçın dəhlizinin doqquz aylıq blokadası nəticəsində yaranmış son dərəcə çətin vəziyyəti narahatlıqla izləməkdə davam edir. Dağlıq Qarabağın, demək olar ki, bütün əhalisi, 100,6 min nəfərdən çoxu Ermənistanda sığınacaq tapıb. Azərbaycan Qarabağ ermənilərinin insan hüquqlarını, əsas azadlıqlarını və təhlükəsizliyini, o cümlədən onların öz evlərində ləyaqətlə, heç bir qorxu və ayrı-seçkilik olmadan yaşamaq hüququnu təmin etməli, könüllü, təhlükəsiz, ləyaqətli və davamlı qayıdışı üçün şərait yaratmalıdır. Qaçqın və köçkünlərin tarixlərinə, mədəniyyətlərinə və hüquqlarına hörmət edilməlidir. Bundan əlavə, yerli əhalinin mədəni irsi və mülkiyyət hüquqları effektiv şəkildə qorunmalı və təmin edilməlidir”.
Məgər Azərbaycan Qarabağ ermənilərinin geri qayıtması üçün şərait yaratmır? Bununla bağlı nə qədər çağırış etmək olar? Hansı abidəni dağıtmışıq?
“Bu, Avropa Şurasının nə qədər mənəviyyatsız və riyakar olduğunu bir daha açıq-aşkar ortaya qoyur”
Məsələ ilə bağlı “Bakı-Xəbər”ə açıqlama verən millət vəkili Ceyhun Məmmədov hesab edir ki, bütün bunlar Avropa qurumlarının qərəzli münasibətindən irəli gəlir: “Hesab edirəm ki, bu açıqlama Avroopa Şurasının nə qədər mənəviyyatsız və riyakar olduğunu bir daha açıq-aşkar ortaya qoyur. Otuz il Azərbaycan əraziləri işğal altında olanda, mədəni abidələr məhv ediləndə, məcburi köçkünlər ağır durumda yaşayanda heç bir reaksiya verməyən Avropa Şurası indi ölkəmizi olmayan hadisələrdə günahlandırır. Azərbaycan əleyhinə qətnamələr qəbul edir, saxta “sübutlar” ortaya qoymağa çalışır. Soruşan yoxdur ki, ermənilər oradan niyə çıxıb? Bu, Ermənistan tərəfindən məqsədyönlü şəkildə həyata keçirilən siyasətdir. Məqsəd o olub ki, Azərbaycanı etnik təmizləmədə günahlandırsınlar. Guya Azərbaycan zorən erməniləri Qarabağdan çıxarıb. Halbuki, ermənilər özləri Birinci Qarabağ müharibəsində azərbaycanlıları zorən öz yaşayış məntəqələrindən qovdular. Daha sonra kəndləri, şəhərləri yandırdılar, dağıtdılar. O zaman bir azərbaycanlıya deyilmədi ki, öz evində qal. Bununla bağlı onlara hansısa şans tanınmadı. İndi durub utanmadan ədalətdən dəm vururlar. Biz ötən ildə hansı erməni kilsəsini, məzarlığını dağıtmışıq? Bununla bağlı heç olmasa bir fakt varmı? Yoxdur. Ona görə də Avropa Şurasının bu qərarlarının heç bir əsası yoxdur. Azərbaycan dəfələrlə bəyan edib ki, erməni sakinlərin reinteqrasiyasına hazırdır. Ancaq reinteqrasiyanı qəbul etməyən ermənilər Qarabağı tərk ediblər. Bu da Ermənistanın siyasəti idi: Qarabağda ermənilər qalmayandan sonra beynəlxalq təşkilatlar vasitəsilə Azərbaycana təzyiq etmək və müəyyən iddialarla çıxış etmək. Bir sözlə, Avropa təsisatları nə qədər qərəzli mövqedən çıxış etsələr də, bunların heç bir əsası yoxdur. Azərbaycan üzərinə düşən məsələləri yerinə yetirir və gələcəkdə də edəcək. Bu kimi qərəzli açıqlamalar bizi öz yolumuzdan döndərə bilməz. Onlar gedib daha çox bu məsələləri Ermənistanla həll etsinlər”.
Vidadi ORDAHALLI
