Xarici işlər naziri Ceyhun Bayramov İslam Əməkdaşlıq Təşkilatının İcraiyyə Komitəsinin növbədənkənar iclasında çıxışı zamanı deyib ki, fələstinli qaçqınlara dəstək məqsədilə Azərbaycan BMT-nin Yaxın Şərq Agentliyinə 1,6 milyon dollar maliyyə töhfəsi verib.
O, xüsusilə Qoşulmama Hərəkatına sədrliyimiz dövründə ölkəmizin Fələstin probleminə xüsusi diqqət yetirdiyini, bu xüsusda Hərəkatın Fələstin üzrə Nazirlər Komitəsinin işinin gücləndirilməsi istiqamətində fəaliyyət göstərdiyini bildirib. Nazir bundan sonra da Fələstin probleminin beynəlxalq hüququn norma və prinsiplərinə uyğun şəkildə həllinə nail olmaq üçün səylərin davam etdiriləcəyini qeyd edib.
Azərbaycanın Fələstin qaçqınlarına 1.6 milyonluq yardımı islam həmrəyliyi kontekstində necə dəyərləndirilə bilər?
Müstəqil siyasətçi Mirkazım Seyidov “Bakı-Xəbər”ə açıqlamasında bildirdi ki, məlum olduğu kimi, 2019-cu ildən etibarən Azərbaycan Qoşulmama Hərəkatının (QH) üzv ölkələrinin yekdil qərarı ilə üç il müddətinə QH-yə sədrliyi həyata keçirməyə başladı: “Azərbaycanın sədrliyi dövründə gördüyü işlərə, irəli sürdüyü təşəbbüslərə və təsisatın fəaliyyətinin genişləndirilməsi, beynəlxalq aləmdə nüfuzunun artması istiqamətində atdığı addımlara görə ölkəmizə etimadın göstəricisi kimi Hərəkata sədrliyimiz daha bir il uzadıldı.
Dövlət başçısının Qoşulmama Hərəkatının sədri kimi beynəlxalq müstəvidə davamlı və ardıcıl şəkildə irəli sürdüyü təşəbbüs və təkliflər daim həm Hərəkat, həm də digər ölkələrin geniş dəstəyini qazanıb. Azərbaycan müharibənin nə olduğunu gözəl bilən ölkədir. Bu gün Qəzzada xəstəxanaya raket atılırsa, biz buna necə biganə qaıa bilərik? Çünki bizim özümüz də belə hadisələrdən əziyyət çəkmişik. Azərbaycan bu məsələdə neytrallığı qoruyur. Çünki bizim İsraillə də gözəl münasibətlərimiz mövcuddur. Fələstinlə də islam həmrəyliyi kontekstində ciddi əməkdaşlıq edirik. Biz eyni mövqeyi Rusiya ilə Ukrayna arasında gedən müharibədə də göstəririk. Rusiya ilə strateji müttəfiqik, ancaq Ulraynaya da bir neçə dəfə humanitar yardım etmişik. Belə addımların atılması tərəf olmaq anlamına gəlmir. Bu, humanitar dəstək mahiyyətini daşıyır. ABŞ prezidenti Co Bayden də fələstinli əhali üçün 100 milyon dollar humanitar yardım ayrıldığını bildirib. O, yardımın həm Qəzza zolağı, həm də İordan çayının qərb sahilinə aid olduğunu deyib.
Ancaq ABŞ mahiyyət etibarı ilə İsraili dəstəkləyir. Bu baxımdan da, Azərbaycanın addımı çox doğrudur. Həm humanizm nöqteyi nəzərindən, həm də islam həmrəyliyi baxımından çox doğrudur.
Qeyd edək ki, Qoşulmama Hərəkatına sədrliyi və belə addımlar ölkəmizim qlobal həmrəyliyə verdiyi önəmin göstəricisidir. İsrail hakimiyyəti HƏMAS girovları azad edənə qədər öz ərazilərindən Qəzza zolağına humanitar yardım keçirilməsinə icazə verməyəcəyini bildirib. Lakin İsrail yardımların Misirdən keçməsinə mane olmayacağını da deyib”.
Məhəmmədəli QƏRİBLİ
