Faktiki olaraq Azərbaycanın Ermənistanda hərbi əsirləri olsa da, Ermənistan tərəfi bunu danır. Məlum olduğu kimi, iki hərbi qulluqçumuz - Bəbirov Aqşin Qabil oğlunun və Axundov Hüseyn Əhliman oğlunun 2023-cü ilin 10 aprel tarixində Naxçıvan Muxtar Respublikasının Şahbuz rayonunun Ermənistanla sərhəd ərazisində əlverişsiz hava şəraitində məhdud görmə səbəbindən itkin düşdükləri barədə məlumat yayılıb.
Onlar hazırda Ermənistanda ağır şəraitdə həbs həyatı yaşayırlar və bu ölkə onları “terrorçu” adlandıraraq, guya hansısa “qətllər”də ittiham edir. Beləliklə onların hərbi əsir olmadıqları fikrini yayır, təbii ki, onlar hərbi əsirlərdir və Azərbaycana qaytarılmalıdır.
“Hraparak” qəzetinin yazdığına görə, Rusiya Xarici İşlər Nazirliyinin sözçüsü Mariya Zaxarova bu yaxınlarda Ermənistan və Azərbaycana "hər kəs hamı üçün" prinsipi üzrə məhbusların mübadiləsini təklif edib. Qəzet iddia edir ki, guya 2020-ci ildə baş vermiş müharibə nəticəsində Azərbaycanda təxminən 80 nəfər qalıb. Guya sentyabrın 19-dan sonra Bako Saakyan, Arkadı Qukasyan, Arayik Harutyunyan, “Müdafiə Ordusunun” keçmiş “komandanı” “general” Levon Mnasakanyan, “deputat” David Manukyan, “Artsaxın” keçmiş “dövlət naziri” Ruben Vardanyan, keçmiş “xarici işlər naziri” David Babayan, David İşxanyan “əsir” götürülüb. Separatçıları, Azərbaycan ərazisində açıq terrorla məşğul olanları və buna görə də saxlanılanları “əsir” adlandıran Ermənistan Azərbaycanın onlarda olan gerçək hərbi əsirlərini danır. Ermənistan Xarici İşlər Nazirliyindən “Ermənistanda müharibə əsirləri olan azərbaycanlı yoxdur. Yəni müharibədən sonra hamısı təslim oldu”-deyə qeyd edib. Yenə də “terrorçu” oyunu oynayaraq “Ermənistanda sonuncu dəfə iki azərbaycanlı terrorçu məhkum edilib” deyə onlar barədə yanlış yanaşma sərgilənib.
“Bu, Ermənistanın növbəti həyasızlığıdır ki, gerçəyi inkar edib bütün aidiyyəti beynəlxalq konvensiyaların tələblərini tapdayır”
Bakı Dövlət Universitetinin Erməni Araşdırmaları və Təlim Mərkəzinin direktoru, ermənişünas İsmayıl Tanrıverdi “Bakı-Xəbər”ə şərhində bildirdi ki, Ermənistan bizim iki hərbişimizə qarşı qondarma ittiham irəli sürərək onları qanunsuz şəkildə məhkum edib. “Azərbaycan rəsmi olaraq bəyan edib ki, Azərbaycan bütün hərbi əsirləri Ermənistana qaytarıb, bizim ölkədə erməni hərbi əsirlər yoxdur. Çox qəribədir ki, Ermənistan terrorçuları, diverstantları, separatçıları “hərbi əsir” adlandırıb onlar ətrafında süni hay-küy yaradır. Guya onların burada “hərbi əsirləri” var. Hamısı yalandır.
Amma hazırda Azərbaycanın iki hərbi qulluqçusu Ermənistanda hərbi əsirdir, hələ də onların hərbi əsir olduqlarını etiraf etmək istəmirlər. Məlum olduğu kimi, onlar Naxçıvan Muxtar Respublikasının Şahbuz rayonunun Ermənistanla sərhədboyu ərazisində əlverişsiz hava şəraitində məhdud görmə səbəbindən yolu azaraq Ermənistan ərazisində keçib. Az sonra hər iki hərbçi Ermənistan tərəfindən əsir götürülüb. Bu faktdır. Onlara qarşı qondarma ittihamlar irəli sürülüb. Ermənistanda əsirlikdə saxlanılan Azərbaycan hərbçisi Hüseyn Axundovun ömürlük azadlıqdan məhrum edilməsi tələb olunub. Aqşin Bəbirov 11,5 il, Hüseyn Axundov 20 il müddətinə azadlıqdan məhrum olunub. Bunlar hamısı qanunsuzluqdur.
Mən dünən bu məlumatı oxudum ki, ermənilər “Azərbaycanın Ermənistanda hərbi əsiri yoxdur” yazıblar. Mən də o yazının altına şərh yazdım ki, sizin bizdə hərbi əsiriniz yoxdur, diversantlar, terrorçular isə hərbi əsir sayıla bilməz. Ermənistanın azərbaycanlı hərbi əsirləri inkar etməsi onu göstərir ki, onlar hərbi əsirləri geri vermək istəmir. Bu, Ermənistanın növbəti həyasızlığıdır ki, gerçəyi inkar edib bütün aidiyyəti beynəlxalq konvensiyaların tələblərini tapdayır. O bizim hərbi əsirləri geri qaytarmaq əvəzinə, onların ətrafında “terrorçu” oyunu qurur. Ermənistanın bu davranışı heç bir çərçivəyə sığmır, bu ölkə get-gedə daha da azğınlaşır”-deyə qeyd edən İ.Tanrıverdinin sözlərinə görə, Ermənistan o qədər saxtakar və həyasız mövqe tutur ki, Birinci Qarabağ müharibəsində əsir götürdüyü azərbaycanlıların taleyi barədə də Ermənistan heç bir kəlmə açıqlama verməyib, azərbaycanlı əsirləri beynəlxalq təşkilatlardan gizlədib. “Bütün bunlar onu göstərir ki, Ermənistan inkarçılıq yolu tutmaqla özünü təmizə çıxarmaq istəyir, amma nəticədə öz qeyri-insani, qeyri-humanist mahiyyətini bir daha ortaya qoyur. O bütün azərbaycanlı əsirlərə görə cavab verməlidir. Bizim Birinci Qarabağ müharibəsində əsir götürülən 4 minə yaxın vətəndaşımızın taleyinə görə də Ermənistan böyük məsuliyyət daşıyır. Eləcə də bu gün iki hərbiçimizin qanunsuz olaraq həbsdə saxlanılmasına görə onun məsuliyyəti böyükdür, Azərbaycanın müraciətlərinə əsasən onlar dərhal ekstradisiya olunmalı idilər”-deyə İ.Tanrıverdi qeyd etdi.
İradə SARIYEVA
