Məlum olduğu kimi, Bakıda Bakı Təşəbbüs Qrupunun təşkilatçılığı ilə “Neokolonializm: İnsan Hüquqlarının Pozulması və Ədalətsizlik” adlı beynəlxalq konfrans keçirildi. Konfransda 14 ölkədən, eləcə də Fransanın müstəmləkə altında saxladığı dənizaşırı ərazilərinin (Yeni Kaledoniya, Fransız Polineziyası, Fransız Qvianası, Martinika və Qvadelupa), həmçinin, Korsika təmsilçiləri də iştirak edib.
Diqqət çəkən məqam konfransda Fransanın Korsika adasının nümayəndəsinin də iştirak etməsidir.
Bəllidir ki, Korsika Fransa tərəfindən müstəmləkəyə məruz qalıb. Korsika Liber partiyasının üzvü Jan Jacque Rodriguez mətbuat konfransı zamanı deyib ki, Korsikada kütləvi qırğınlar oldu, müstəmləkə hərb yolu ilə aparıldı: “Artıq 250 ildir Korsika müstəqilliyini bərpa etməyə çalışır. Bizim əhalimizin bir qismi deportasiya edildi. Bu ərazilər Fransaya yaxın olduğu üçün bu sınaqlardan imtina etdilər”.
Korsika Liber partiyasının üzvü Fransua Benedet isə mətbuat konfransı zamanı bildirib ki, Korsikada hüquq məhdudiyyətləri var. Fransada olan haqq və hüquq onlara tətbiq edilmir.
Bütün bu çıxışlar onu deməyə əsas verir ki, mustəmləkələr paytaxt Bakı ərazisində Fransaya qarşı çıxır.
“Fransa BMT Təhlükəsizlik Şurasında Azərbaycana qarşı ədalətsiz məsələlər gündəmə gətirməkdənsə, özünün müstəmləkə siyasətinə yenidən baxmalıdır”
Müasir İnkişaf Birliyinin sədri, siyasi şərhçi Mübariz Göyüşlü “Bakı-Xəbər”ə açıqlamasında qeyd etdi ki, Azərbaycan bu istiqamətdə çox ciddi və sanballı fəaliyyət həyata keçirir. Fransanın müstəmləkəçilik, neokolonializm siyasəti fonunda Azərbaycanın bu davranışı həm həmin ölkələrə dəstək verir, həm də dünyanın diqqətini mustəmləkəçilik siyasətinə bir daha cəlb edir: “Azərbaycan “Qoşulmama Hərəkatının” sədri kimi də Fransanın müstəmləkəçisi olan xalqlarla əlaqələr istiqamətində çalışma həyata keçirir. Bir müddət öncə Bakıda məlum mövzu müzakirə olundu. Oktyabrın 20-də bu konfransın keçirilməsində məqsəd Fransanın qəddar müstəmləkə siyasətini dünyaya təqdim etməkdir. Eyni zamanda, bu konfrans o xalqların hüquqlarının müdafiəsi baxımından da çox mühumdur”.
M.Göyüşlünün sözlərinə görə, Fransa bu cür müstəmləkə siyasəti ilə qane olmur, üstəlik, Cənubi Qafqaza daxil olaraq Ermənistanı müstəmləkə halına gətirmək istəyir. Beləliklə, Fransa Cənubi Qafqazda öz təsir gücünü formalaşdırmağa çalışır: “Hesab edirəm ki, belə məqamlara yol verilməməlidir. Fransanın əsl mahiyyəti müstəmləkə xalqlarına verdiyi işgəncə, zülmlərin aşkar olunmamasıdır. Bu istiqamətdə Azərbaycanın fəaliyyəti təqdir olunandır. Fransa BMT Təhlükəsizlik Şurasında Azərbaycana qarşı ədalətsiz məsələlər gündəmə gətirməkdənsə, özünün müstəmləkə siyasətinə yenidən baxmalıdır. Bu ölkə mustəmləkəçilik siyasətindən əl çəkməli, xalqlara qarşı həyata keçirdiyi ağır işğalçılığa son qoymalıdır. Bu səbəbdən də Bakıda Bakı Təşəbbüs Qrupunun təşkilatçılığı ilə “Neokolonializm: İnsan Hüquqlarının Pozulması və Ədalətsizlik” adlı beynəlxalq konfrans olduqca əhəmiyyətlidir. Hesab edirəm ki, bu tipli müzakirələr ölkəmizdə davamlı olaraq keçirilməlidir”.
Günel CƏLİLOVA
