Müharibənin bitməsinə baxmayaraq, ermənilər iki ölkə arasındakı şərti sərhəddə və Qarabağda öz təxribatlarını davam etdirir. Təbiidir ki, onların bu addımları cavabsız qalmır.
Azərbaycan 44 günlük müharibədən sonra Qarabağda şərti adı “Qisas” olan iki uğurlu əməliyyat keçirib.
Azərbaycan Ordusunun iyunun 28-də keçirdiyi "Qisas-2" əməliyyatı zamanı öldürülən erməni hərbçilərdən ikisinin meyitinin Ermənistana aparılmasına şərait yaradılıb. Qarabağda qeyri-qanuni silahlı dəstələrinin məhv edilmiş iki hərbçisinin meyitini onların yaxınları müşayiət edib. Meyitlər Laçın sərhəd-buraxılış məntəqəsindən keçirilməklə Ermənistana aparılıb.
Qeyd edək ki, "Qisas-2" əməliyyatı zamanı qeyri-qanuni erməni silahlı dəstələrinin 5 üzvü məhv edilib. Onlardan ikisi Ermənistan silahlı qüvvələrinin hərbçisi olub.
Ermənilər bizi “Qisas 3”ə vadar edərsə, nə baş verər? Bu, Azərbaycanın Xankəndidə suverineteti tam bərpa etməklə nəticələnə bilərmi? Xüsusilə də ABŞ-da görüşlərin, danışıqların olduğu bir zamanda rus sülhməramlıları hələ də ermənilərə silah daşıması da maraqlı görünür.
Hərbi ekspert, ehtiyatda olan polkovnik-leytenant Elxan Şıxəliyev “Bakı-Xəbər”ə açıqlamasında bildirdi ki, siyasi danışıqların dalana dirəndiyi ortadadır: “Vaşinqton görüşündən sonra da hər iki tərəf razılığın əldə olunmadığını bəyan etdi. Belə siyasi krizis hökm sürəndə də söz hərbçilərə keçmiş olur. Belə xüsusi əməliyyatın mesajı Ali Baş Komandan tərəfindən də verilmişdi. Komando briqadasının açılış mərasimindəki çıxışında Prezident bu məsələyə toxundu. Ardınca Müdafiə Nazirliyi də antiterror əməliyyatlarının mümkünlüyünü qeyd etdi. 44 günlük müharibədən əvvəl də ermənilərə lazımi xəbərdarlıqlar edilmişdi. Görünür ki, Azərbaycan qarşı tərəfdən, xüsusilə də separatçı rejimdən istədiyi cavabı ala bilmir. Biz onların bu coğrafiyada yaşamasına heç bir itkilər olmadan da təminat veririk. Ancaq separatçı rejim bunu qəbul etmək istəmir. Buna görə də, “Qisas 3” əməliyyatı qaçılmazdır. Müdafiə Nazirliyi bunun mümkünlüyünü deyirsə, demək ki, əməliyyat planı artıq hazırdır. Sadəcə, bunun hansı gün baş verə biləcəyi ilə bağlı məsələ məğvi saxlanılır. Antiterror əməliyyata xüsusi hərbi əməliyyat kontekstində yanaşmalıyıq. Bu o deməkdir ki, pilotsuz uçuş aparatları ilə nöqtə zərbələri endirilir. Bunun da nəticəsində qarşı tərəfin komandir məntəqələri və beyin mərkəzləri sıradan çıxarılır. Bunun üçün bizə qısa zaman lazımdır. Separatçılara rəhbərlik edən Arayik Arutyunyan da, belə zərbələrdən biri ilə məhv edilə bilər. Onlar Vardanyanın əli ilə də oradakı erməniləri şirnikləşdirərək müharibəyə cəlb etmək planı üzərində çalışırlar. Ən pis variantı seçiblər. Biz bir günün içində onların lazımi məntəqələrini vurandan sonra dərhal ağ bayraq qaldıracaqlar. Biz analoji davranışları müharibə zamanı da gördük. Düşmən bizim 3 böyük rayonumuzu bir güllə atılmadan boşaltdı. Əslində biz istəyirik ermənilər saha məqbul variantı seçsin ki, proses itkisiz başa çatsın. Bizim heç vaxt mülki əhali ilə işimiz olmur. Hədəfimiz hərbi infrastruktişurlar olacaq. Bizim həm cəmiyyətimiz buna hazırdır, həm də hərbi rəhbərliyimiz bu istiqamətdə addım atmaq gücündədir. Digər məsələlər isə Ermənistanın necə seçim etmək istəyinə bağlıdır”.
Məhəmmədəl QƏRİBLİ
