Separatçılar erməni uşaqlarının beynini yumaqla məşğul olur. Saxta tarix, saxta tarixi keçmiş barədə nağıllarla, miflərlə uşaqların gələcəyini məhv edirlər, onların psixologiyasına terror edirlər. Qarabağa gəlmə olan və bura ilə heç bir tarixi bağı olmayan ermənilər yüz ildən çoxdur ki, Qarabağ torpağına qarşı iddia irəli sürürlər. Tarixi Azərbaycan torpağı olan Qarabağda məskunlaşan ermənilər, təəssüflər olsun ki, bir qrup quldurun, terrorçunun, separatçının girovuna çevrilib.
Separatçıların ideoloqları və maliyələşdirənləri necə istəyirlər quldur ünsürlər də mülki erməniləri o şəkildə "maarifləndirir", yönəldir. Qondarma "Arsax" oyunundan əl çəkmək istəməyən separatçılar öz ağababalarının təhriki ilə yeni təxribatlara əl atırlar. Qarabağın onlara aid olmadığını bildikləri halda saxta, qondarma tarix düzəldib onu təbliğ etmək istəyirlər.
Erməni mediasında yayılan məlumata görə, yeni tədris ilindən separatçılar "ümumtəhsil məktəblərində" “Arsaxın tarixi” fənnini "tədris edəcəklər".
Bu barədə separatçıların oyuncaq "təhsil, elm, mədəniyyət və idman naziri" Norayr Mkrtçyan deyib.
"Birinci mərhələdə onun yalnız 8-9-cu siniflərdə tədris olunması planlaşdırılır, lakin gələcəkdə digər siniflərin kurrikulumuna daxil ediləcək", - deyə oyuncaq, kukla "nazir" bildirib.
Guya "Arsax tarixi" erməni "tarixinin ayrılmaz hissəsidir", guya onun öyrənilməsi "vacibdir".
“Arsaxın tarixi” fənni tədris olunacaq"-iddiasını irəli sürən separatçılar hansı tarixdən danışırlar? Olmayan "Arsax tarixi" fənni necə öyrədilə bilər?
"Qarabağda gerçək tarixi 2020-ci ildə müzəffər Ali Baş Komandan İlham Əliyevin rəhbərliyi altında Azərbaycan ordusu yazıb..."
AMEA Qafqazşünaslıq İnstitutunun Ermənişünaslıq şöbəsinin müdiri Elnur Kəlbizadə “Bakı-Xəbər”ə şərhində "Azərbaycan ərazisində məskunlaşmış ermənilərin yaşadıqları bölgənin gerçək tarixini öyrənmələri faydalı olardı. Tarixi qaynaqlara əsaslanmaqla bu tarix öyrədilərsə onlar aydın şəkildə görəcəklər ki, Qarabağa onların əksəriyyətinin babaları II Rusiya-Qacar müharibəsindən sonra köçürülüb. Hətta vaxtilə Qarabağ ərazisinə erməni köçü ilə əlaqədar abidə də qoyulub. Lakin təbii ki, Qarabağdakı terrorçu tör-töküntülərinin çapını arzuladıqları "Arsax tarixi" kitabında bu həqiqətlər yazılmayacaq. Çünki tarixi qaynaqlar "arsak" sözünün özünün belə ermənilərə heç bir aidiyyəti olmadığını onlara göstərəcək"-deyə bildirdi.
E. Kəlbizadə əlavə etdi ki, ümumiyyətlə, belə bir dərsliyin yazılıb-yazılmayacağı ilə bağlı qəti nəsə demək mümkün deyil. "Qəti olan odur ki, Qarabağda gerçək tarixi 2020-ci ildə müzəffər Ali Baş Komandan İlham Əliyevin rəhbərliyi altında Azərbaycan ordusu yazıb və yazmaqda davam edir. Bu tarixi isə hələ uzun illər həm Ermənistan, həm də onun havadarları oxumalı olacaqlar - deyə şöbə müdiri bildirdi.
İradə SARIYEVA
