Ermənistanın məlum təxribatı üzündən bir həftə Laçın yolu bağlı oldu. Bu səbəbdən bütün Avropa təsisatları əl-ayağa düşdü. AŞPA qərəzli qətnamə qəbul etdi. Bundan əvvəl də dəfələrlə insan hüquqları ilə bağlı yeri gəldi-gəlmədi Avropa qurumları Azərbaycana qarşı ədalətsiz mövqedən çıxış edib. Adi bir məişət hadisəsinə siyasi don geyindirməyə çalışıblar.
Ancaq Fransada bir neçə gündür nümayişçilərə divan tutulur, aksiyaçılara polis zor tətbiq edir, amma Avropa qurumlarının səsi çıxmır. Nə Avropa Parlamenti, nə Avropa Şurası Parlament Assambleyası, nə də digər qurumlar buna münasibət bildirir. Nəinki Avropa qurumları, insan hüquqlarının müdafiəsindən dəm vuran “Freedom House”, “Amnesty İnternasional”, “Human Rights Watch”, “Sərhədsiz Reportyorlar” təşkilatı belə baş verənləri görməzdən gəlir. Halbuki, Fransada baş verən ixtişaşlarda 3 min nəfərdən çox adam saxlanılıb. Niyə?
“Bütün bunlar bir daha həmin təşkilatların əsl simasını ortaya qoyur”
Məsələ ilə bağlı “Bakı-Xəbər”ə açıqlama verən media eksperti Yadigar Məmmədlinin fikrincə, beynəlxalq təşkilatlar zaman-zaman Azərbaycana münasibətdə qərəzli mövqedən çıxış ediblər: “Son günlər baş verən hadisələr ilk deyil. Yəni biz bunu dəfələrlə görmüşük. Azərbaycanda baş verən adi hadisəyə belə, onlar qərəzli mövqedən yanaşır və bunu böyütməyə çalışırlar. Sanki bütün günah Azərbaycandadır kimi mövqe sərgiləyirlər. Azərbaycanın daxili işinə aid olan məsələlərə kobud şəkildə müdaxilə edirlər. Azərbaycan Qarabağ ermənilərinin inteqrasiyası ilə bağlı nə mümkündürsə onu etməyə çalışır. Müvəqqəti qısamüddətli fasilədən sonra Laçın yolu ilə sərbəst gediş-gəliş təmin edildi. Əfsuslar olsun ki, bəzi Avropa qurumları bütün bunları görməzdən gəlir. Ancaq Avropanın mərkəzində, Fransada yaşananlar çox ciddi bir hadisədir. Faktiki olaraq orada miqrantların, Afrika kökənli vətəndaşların hüquqları kobud şəkildə pozulur. Özü də bununla bağlı orada əndazədən kənar hadisələr baş verir. Fransada polis nəinki iğtişaşları zor gücü ilə yatırır, hətta etiraz edənləri öldürür. Ancaq yenə də bütün bunları susqunluqla izləyirlər. Özü də bu, təkcə Fransada yox, Avropanın digər ölkələrinə də sıçrayıb. Ancaq həmin ölkələrin heç birində Fransadakı qədər polis zorakılığı müşahidə olunmur. Məsələ ondadır ki, nümayişçilərə aşırı güc tətbiq edilir. Ancaq bununla bağlı heç bir beynəlxalq addım atılmır. Bu, həm də onunla əlaqədardır ki, Avropa qurumlarında Fransa təmsil olunur. Fransa Avropa İttifaqında aparıcı mövqeyə sahibdir. Ancaq qəribəsi odur ki, insan hüquqlarının müdafiəsi ilə məşğul olan “Freedom House”, “Amnesty İnternasional”, “Human Rights Watch” təşkilatları da Fransada baş verənlərə susqun mövqedən yanaşırlar. Bütün bunlar bir daha həmin təşkilatların əsl simasını ortaya qoyur. Ona görə də belə ikili yanaşmalar hər zaman ifşa olunmalıdır”.
Vidadi ORDAHALLI
