Avropa İttifaqı Azərbaycana qarşı sanksiyalar, o cümlədən qaz müqavilələrinin ləğvi və ya dondurulması məsələsini nəzərdən keçirmir. Belə bir açıqlama ilə Avropa Parlamentinin vitse-prezidenti, beynəlxalq əlaqələr üzrə ali komissar Cozep Borrel parlamentin sual-cavab diskussiyasında çıxış edib. Bununla da o, ermənilərin, eləcə də anti-Azərbaycan qüvvələrin arzusunu gözündə qoyub.
Cozep Borrel son sərhəd toqquşmaları fonunda bildirir ki, indi qoşunlar bir-birinə çox yaxındır və bu da nəticədə yeni münaqişə təhlükəsi yaradır. Düzdür, Borrel müəyyən yanlış fikirlər də səsləndirib və Azərbaycan ordusunun guya Ermənistan ərazisinə daxil olduğunu iddia edib. Bu fonda ondan Azərbaycana qarşı sanksiyaların tətbiqi tələb edilib. Yunanıstan və Hollandiya nümayəndələri bu xüsusda daha çox canfəşanlıq edib. Hollandiya nümayəndəsi Piter van Dalen Azərbaycanla imzalanmış qaz sazişini ləğv etməyi və ya heç olmasa dondurmağı təklif edib. Cozep Borrel buna cavabında bildirib: “Sualınızın nə olduğunu başa düşmürəm. Soruşursunuz ki, belə olacaq, ya olmayacaq? Cavab xeyrdir. Mən sizin çıxışınızdakı sualı həqiqətən eşitmədim... Qaz və qan arasında müqayisə aparmaq tamamilə gülüncdür. Bunun adekvat olduğunu düşünə bilərsiniz, amma düşünürəm ki, bu, ciddi suallar verməli olduğunuz bir mübahisədir, mən ciddi cavab verəcəyəm. Sanksiya olmayacaq". Kiprli deputat Kostas Mavrides bir daha bu xüsusda Borrelə sual ünvanlayıb: Azərbaycana qarşı sanksiyalar tətbiq etməyə hazırsınızmı? Cozep Borrel qeyd edib: “Mənim bildiyimə görə, heç bir üzv dövlət belə bir təklifi müzakirəyə çıxarmayıb. Sanksiyaların tətbiqi, bildiyiniz kimi, üzv dövlətlərin işidir”. O öz adından əmin edib ki, Bakı ilə qaz sazişi imzalamaqla və prezident İlham Əliyevi Avropa İttifaqının etibarlı tərəfdaşı adlandırmaqla Avropa Komissiyası hansısa prinsipləri pozmayıb və güzəştə getməyib: “Azərbaycan bizə həqiqətən də yanacaq verir, daha doğrusu, satır - milyardlarla kubmetr qaz və bu il imzalanmış saziş sayəsində biz həcmləri əhəmiyyətli dərəcədə artıracağıq - 8-12 milyard kubmetr. Sizi əmin edə bilərəm ki, bunun müqabilində heç bir siyasi güzəşt edilməyib, Avropa Komissiyasının sədri şəxsən bu sövdələşmə ilə bağlı danışıqlar aparmaq üçün Azərbaycana gedib. Bu, qarşıdakı qış aylarında avropalıların çox ehtiyac duyduğu enerji daşıyıcılarını əldə etmək imkanı verəcək”.Bir saat davam edən sual-cavab sessiyasında Cozep Borrel bir neçə dəfə vurğulayıb ki, Avropa İttifaqı Ermənistanla Azərbaycan arasında gərginliyi azaltmaq və regiona sülh gətirmək üçün bütün imkanlardan istifadə etməyə sadiqdir. O qeyd edib ki, Avropa İttifaqı hətta Ermənistan-Azərbaycan sərhədinə müşahidə missiyası göndərməyə hazırdır, lakin bunun üçün onlara Bakının da razılığı lazımdır, bu isə mümkün deyil: “Biz sərhəddə Avropa İttifaqının vasitəçilik missiyasını yerləşdirməyi təklif etdik. Ermənistan razılaşdı, Azərbaycan razılaşmadı. Başqa nə etməyimizi istəyirsən? Biz hər iki tərəfin razılığı olmadan Avropa İttifaqı qoşunlarını göndərə bilmərik”.
Deputatlardan biri bu həftə Praqada Avropa İttifaqının qeyri-rəsmi sammitinin keçiriləcəyini və “Sülh və təhlükəsizlik” mövzusunda müzakirəyə Azərbaycanın da dəvət olunduğunu bildirib. Borrel bunu təbii hesab etdiyini vurğulayıb və məsələyə narazılıq edən deputatları sərt tənqid edib: “Bizimlə tərəfdaşlıq və ya assosiasiya sazişləri olan ölkələri görüşə dəvət etdik. Deyim ki, siz həm də Avropa İttifaqının üzvüsünüz. Bəzi tədbirlər görməyə ehtiyac olduğunu düşünürsünüzsə, bunu ölkəniz vasitəsilə edin. Azərbaycanın dəvət olunmasını istəmirsinizsə, bunun asan yolu var: prosesi ölkənizlə başlayın”. Bununla Borrel Avropa İttifaqının Azərbaycana qarşı sanksiya tətbiq etməyəcəyini və hansısa digər əks addım atmayacağını göstərib. Bu hal ermənilərin, anti-Azərbaycan qüvvələrin Avropa Parlamentində fəaliyyətinin iflası deməkdir. Rusiyalı politoloq, Siyasi Tədqiqatlar İnstitutunun baş direktoru Sergey Markov bunu təbii sayır. O qeyd edir ki, Ermənistanın Azərbaycanla sərhədləri müəyyən edilməyib: “Belə şəraitdə İrəvan praktiki fəaliyyəti ilə ABŞ və Fransanın simasında Rusiyanın düşmənləri ilə müttəfiqlik münasibətləri qurur. Aydındır ki, Azərbaycanın daha güclü ordusu yaxın zamanlarda Qarabağın qalan ərazisini də geri qaytaracaq. Çox güman bu, üç ildən sonra baş verəcək. Ancaq istisna edilmir ki, bu daha tez də baş tuta bilər. Ermənistan indi tərkibinə daxil olan digər əraziləri də tamamilə itirə bilər. Əvvəllər İrəvan Moskvaya güvənirdi, lakin Rusiya Azərbaycana qarşı və Ermənistanın maraqları uğrunda vuruşmaqdan imtina etdi. Moskva bu məsələdə neytral mövqe tutmağa üstünlük verir və hətta Azərbaycana daha çox meyl göstərir. Üstəlik, KTMT üzvlərinin əksəriyyəti Bakının tərəfindədir - yalnız əhalisi müsəlman olan Qazaxıstan, Qırğızıstan, Tacikistan deyil, hətta xristian Belarus da. Minsk Qarabağ məsələsində Azərbaycanı dəstəkləyir. Bu sirr deyil. Belə bir şəraitdə Ermənistan Fransa və ABŞ-ı regiona cəlb etmək qərarına gəlib. Buna isə Azərbaycan imkan verməz”. Təbii ki, Rusiya da belə addıma razı olmayacaq.
Samirə SƏFƏROVA
