Azərbaycanda fəaliyyət göstərən siyasi partiyalar “Azərbaycan Respublikası ilə Türkiyə Respublikası arasında müttəfiqlik münasibətləri haqqında Şuşa Bəyannaməsi”nin imzalanması ilə əlaqədar bəyanat yayıblar.
48 siyasi partiyanın imzaladağı bəyanatda deyilir ki, Azərbaycan-Türkiyə münasibətləri hazırda özünün ən uca zirvəsinə yüksəlib: “Xalqlarımızın eyni soykökə, dilə, dinə, mədəniyyətə və bir çox digər ortaq dəyərlərə, sıx bağlara malik olması ölkələrimizi həmişə bir-birinə yaxın edib, xalqlarımız sevincli, kədərli günlərdə daim bir-birinin yanında olub. Ermənistanın 30 illik təcavüzünə son qoyulmasında, işğal altındakı torpaqların düşməndən azad olunmasında, Azərbaycanın ərazi bütövlüyünün bərpa edilməsində Türkiyənin mənəvi-siyasi dəstəyi xalqımızın hər bir nümayəndəsi və siyasi partiya üzvləri tərəfindən yüksək qiymətləndirilir. Hazırda Qafqaz regionunda sabitliyin və təhlükəsizliyin möhkəmləndirilməsi, bütün iqtisadi və nəqliyyat əlaqələrinin bərpası, eləcə də region ölkələri arasında münasibətlərin normallaşdırılması və uzunmüddətli sülhün təmin edilməsi istiqamətində ölkələrimizin birgə təşəbbüsləri dünya dövlətləri üçün ən gözəl nümunədir. Biz – Azərbaycanda fəaliyyət göstərən siyasi partiyalar Azərbaycanın və bütövlükdə Türk dünyasının qədim mədəniyyət beşiyi olan Şuşa şəhərində Azərbaycan və Türkiyə arasında imzalanmış Şuşa Bəyannaməsini ölkələrimizin keyfiyyət baxımından yeni əlaqələrinin inkişafı və hər iki ölkənin gələcək birgə fəaliyyətinin vacib əsası hesab edir və bu yüksək strateji müttəfiqlikdə dövlətimizin yanında olduğumuzu bəyan edirik”.
Səxavət Soltanlı: “Hansısa partiyanın hazırladığı bir baəyanata kolxozçu təfəkkürlə yanaşıb...”
Maraqlıdır ki, bəyanata bir çox müxalif partiyaların imza atmasına baxmayaraq, Milli Şura, AXCP və Müsavat Partiyasının imzasına rast gəlinmir. Bunun səbəbini aydınlaşdırmaq üçün Musavat Partiyası başqanının müavini Səxavət Soltanlı ilə əlaqə saxladıq. O, “Bakı-Xəbər”ə açıqlamasında bildirdi ki, Musavat Partiyası sovet təfəkkürü ilə, bir partiyanın qərargahında hazırlanan bəyanatın altından simvolik olaraq imza atılmasını gerilikçi təfəkkürün məhsulu hesab edir: “Belə davranış olmamalıdır. Musavat Partiyası YAP-dan və ora imza atan digər 47 partiyadan əvvəl özünün doğru bildiyi mövqeyini açıqlayıb. Şuşa sazişini təqdir etməyimizlə bağlı bizim partiya başqan və digər funksionerlər səviyyəsində mövqeyini bildirib. Biz 30 ildir bu anlaşmanın olmasını istəyirdik. Çox yaxşı haldır ki, belə bir saziş imzalandı. Hansısa partiyanın hazırladığı bir bəyanata kolxozçu təfəkkürlə yanaşıb, mütləq onun altından imza atmaq kimi tələb çoxpartiyalı siyasi sistemin mahiyyətinə zidd olan davranışdır. Hər partiyanın özünün sərbəst qərar qəbul edib, onu ictimailəşdirmək kimi hüququ olduğu halda, nəyə görə hansısa partiyanın qərargahında hazırlanan bəyanata mütləq imza atmalıyıq? Yalnız istisna hallarda razılaşdırılmış bir mətnə imza etmək olar. Həmin mətn də partiyalara təqdim olunmalıdır. Zəruri redaktələr edildikdən sonra ümumi bir razılaşdırılmış sənədə imza atılmalıdır. Müsavat Partiyası Türkiyə ilə Azərbaycanın münasibətlərinin daha da yüksəklərə qalxamasında maraqlıdır. Bunu dəstəkləmək üçün mütləq “Dəqə Qorqud”, “Kommunist”, “Ağ” və ya “Göy” adlı partiyalarla bir sırada durmağa məcbur deyilik.
Fərəc Quliyev: “Kolxozçu təfəkkürünü Müsavat Partiyası 2013-cü ildə ortaya qoyub”
Bəyanata imza atan Milli Dirçəliş Hərəkatı Partiyasının sədri Fərəc Quliyev isə qəzetimizə açıqlamasında bildirdi ki, Musavat funksionerinin iradları ilə qətiyyən razılaşmır: “Kolxozçu təfəkkürünü Musavat Partiyası 2013-cü ildə ortaya qoyub. Həmin vaxt Moskvadakı Cərrahiyyə İnstitutunda Rusiya Dumasının vitse-prezidenti Volodinin rəhbərliyi ilə yaranan Milli Şuranın ilhamvericisi qismində çıxış edirdi. Lenin də Volodin idi, bu da dövrün yeni Volodinidir. Birinci də kolxoz qururdu, bunlar da burda kolxoz qururdular. Həmin kolxozda Musavat da vardı. Kolxozun da başına Rüstəm İbrahimbəyovu gətirmək istəyirdilər. Rusiya vətəndaşını prezident etmək istəyirdilər. Sonradan Rauf Arifoğlu etiraf etdi ki, müvəqqəti hakimiyyət qurandan sonra Abbas Abbasovu iş başına gətirməyi planlayırmışlar. Həmin kolxozun maliyyə məsələsini isə Milyarderlər İttifaqı adlı qurum həll edirdi. Mən belə qurumları milli demokratik düşərgəyə aid etmirəm. Hesab edirəm ki, Şuşa bəyannaməsini imzası ilə dəstəkləyən partiyalar daha doğru davranır. Xaricin əlində oyuncaq olan Musavat və AXCP adından istifadə edən “Yurd” təşkilatı çoxdan kolxoz quruluşu ilə idarə edilən təşkilatlardı”.
Məhəmmədəli QƏRİBLİ
