Jurnalistlərimizi öldürmüş minaların sonradan basdırıldığını söyləyənlər hansı məqsədləri güdür...

Ramil Məmmədli: “Minanın əldə olunan atəşkəsdən sonra basdırıldığını bilməyərəkdən iddia edənlər çalışır ki, ordumuzun gücünü bir qədər kiçiltsinlər”

img

Xəbər verildiyi kimi, 04 iyun 2021-ci il tarixdə media və dövlət qurumlarının əməkdaşlarının olduğu “KamAZ” markalı sərnişin avtomobilinin Kəlbəcər rayonunun Susuzluq kəndi ərazisində minaya düşməsi nəticəsində 3 nəfərin ölməsi və 4 nəfərin xəsarət alması faktı ilə əlaqədar Azərbaycan Respublikası Hərbi Prokurorluğunda cinayət işi başlanıb.

Azərbaycan Respublikası Baş Prokurorluğundan təəssüf hissi ilə bildirilib ki, bəzi kütləvi informasiya vasitələrində və sosial media səhifələrində hadisənin baş verməsi ilə əlaqədar əsassız və dəqiqləşdirilməmiş məlumatlar yayılmaqdadır. Odur ki, Baş Prokurorluq hadisənin baş vermə səbəbləri və mexanizmi barədə aşağıdakıları qeyd edir: Aparılmış ilkin istintaqla müəyyən edilmişdir ki, hadisənin baş verdiyi əraziyə Azərbaycan Respublikası Silahlı Qüvvələrinin nəzarəti tam təmin olunduğundan, işğaldan azad olunduqdan sonra ora düşmən təxribat qruplarının sızması və orada mina basdırması istisna edilir.

Hadisə yerinə mütəxəssislərin iştirakı ilə keçirilmiş baxış zamanı 240 x 230 sm ölçülərində 97 sm dərinliyində çuxur və 1 ədəd tam yararsız hala düşmüş “KamAZ” markalı sərnişin avtomobili aşkar olunub.

Hadisənin baş vermə səbəblərinə gəldikdə isə, partlayış sahəsinin ölçülərinə və partlayış yerinin görünüşünə görə, bu, 60-97 sm dərinliyində basdırılmış tank əleyhinə 1 ədəd mina olub. Partlayış yerində minanın heç bir qalığının aşkar olunmaması ilə müəyyən edilir ki, partlayış zamanı istifadə olunan mina plastmas, parça və ya korpussuz tipli tank əleyhinə minaya aid olub, fuqas (zirehdələn) tipli, tank və zirehli texnikaların tırtılına qarşı istifadə olunmaqla yollarda və texnikaların hərəkət edə biləcəyi yerlərdə qurulması üçün nəzərdə tutulub.

Partlamış minanın tank əleyhinə TM-62P2, TM-62P3, TM-62T və ya TM-62B tipli (eyni qrupa daxil olan) mina olması və üzərindən avtobusun keçməsi nəticəsində minanın işə düşməsi (partlaması) ehtimal olunur.

Həmçinin müəyyən edilib ki, erməni qanunsuz silahlı birləşmələri işğal zamanı qeyd edilən yoldan döyüş mövqelərinin təminat yolu kimi istifadə ediblər, Kəlbəcər rayonunu tərk edən zaman isə geri çəkildikləri həmin əraziləri minalayıblar.

Cinayət işi üzrə istintaq davam edir, gedişatı barədə ictimaiyyətə əlavə məlumatın verilməsi təmin ediləcəkdir.

Qeyd edək ki, bu mövzu ətrafında müxtəlif versiyalar səslənir. Ən əsası da, qeyd olunur ki, jurnalistlərin ölümünə səbəb olan minaları yaxın zamanlarda erməni diversiya qrupları basdırıb. Bu versiyanı ortaya atanların arqumentlərini nə dərəcədə əsaslı saymaq olar?

Hərbi ekspert Ədalət Verdiyev hesab edir ki, Ermənistan tərəfinin minalanmış ərazilərin xəritə və sxemlərini təqdim etməməsində məqsəd Azərbaycanın azad edilmiş ərazilərə qayıdış prosesini ləngitməkdir. Onun sözlərinə görə, ermənilər ləngimə çərçivəsində hansısa əks tədbirlərin mümkün ola biləcəyini ehtimal edirlər.

Ekspert bildirib ki, düşmən tərəfi bu ləngimə müddətində bəlkə də Qarabağın hansısa ərazilərinin geri alınmasına ümid bəsləyir: "Əfsuslar olsun ki, indiyə qədər münaqişənin tənzimlənməsinə görə məsuliyyət daşıyan ATƏT-in həmsədrləri ciddi bir iş görmədilər. Yalnız standart ifadələrdən ibarət bəyanatlara rast gəldik. Bu bəyanatlar isə bugünə kimi əməli olaraq heç nəyi dəyişməyib. Ermənistanın Hadrut istiqamətində 62 nəfərlik qrupunun ələ keçirilməsi, son günlər Kəlbəcər istiqamətində 6 nəfərlik diversiya qrupunun mina basdırarkən saxlanması bir daha onu göstərir ki, Ermənistan heç də Azərbaycana qarşı ərazi iddialarından əl çəkməyib".

Ə.Verdiyev qeyd edib ki, müharibədə məğlubiyyətini qəbul etmək istəməyən Ermənistanın hərbi və siyasi rəhbərliyi Kəlbəcərin Susuzluq kəndi istiqamətində minaların basdırılmasını məqsədli olaraq həyata keçirib.

Hərbi ekspert Ramil Məmmədli isə “Bakı-Xəbər”ə açıqlamasında bildirdi ki, bundan əvvəl də minadan dinc sakinlərimizin ölməsi halları olub: “Həlak olanların jurnalist olması məsələnin rezonansını daha da artırdı.  Hadisə ilə bağlı müxtəlif versiyalar səslənir. Biz görürük ki, bir çox hallarda məsələyə qeyri hərbçilər münasibət bildirir və yalnız fərziyyələr üzərində qurulan ehtimallar səsləndirirlər. Rəsmi qurumun məsələ ilə bağlı reaksiyası həqiqəti əks etdirir. Minanı birmənalı şəkildə erməni basdırıb. Mən güman edirəm ki, həmin minanın basdırılması Ermənistanın Kəlbəcərdən çıxmaq üçün vaxt istədiyi zamana təsdüf edir. Minanın əldə olunan atəşkəsdən sonra basdırıldığını bilməyərəkdən iddia edənlər isə çalışırlar ki, ordumuzun gücünü bir qədər kiçiltsinlər. İddia olunan müddətdə minanın basdırılması inandırıcı görünmür. Çünki həmin istiqamətdə Azərbaycan Ordusu düşmənin bütün diversiyalarının qarşısını ala bilib. Buna dair rəsmi açıqlanan faktlar da mövcuddur. İşğal dönəmindən qalma minaya da oxşamır. Çünki yol təminat üçün istifadə edilib. İstənilən halda, bu cür məlumatların ictimailəşməsi zamanı rəsmi məlumatlara istinad lazımdır”.

Məhəmmədəli QƏRİBLİ

Son xəbərlər