Ümumdünya Səhiyyə Təşkilatının koronavirusu pandemiya elan etməsi və ABŞ-ın maliyyə bazarında aksiyaların kəskin enməsindən sonra ABŞ prezidenti Donald Tramp Amerika xalqına müraciətində ölkədəki narahatlığı ünvanlamaq üçün yeni iqtisadi tədbirləri və Avropadan səfərlərin təxirə salındığını elan etdi.
Tramp qlobal maliyyə bazarlarında təlatüm yaradan və amerikalıların gündəlik həyatını pozan pandemiyanın iqtisadi təsirlərinin azaldılması üçün atılan addımları açıqladı və Avropadan ABŞ-a cümə günündən etibarən səfərlərin 30 gün müddətinə dayandırılacağını bildirib. Günlərdir virus təhlükəsini azaltmağa çalışan Tramp Avropa İttifaqını koronavirsa qarşı mübarizədə kifayət qədər tez ölçülər götürməməkdə günahlandırdı.
Tramp bildirib ki, bu məhdudiyyətlər İngiltərəyə şamil olmayacaq və “müvafiq yoxlamadan keçən amerikalılar” istisna ediləcək. Bu məhdudiyyətlər karqolara da şamil edilməyəcək. Tramp bildirib ki, Birləşmiş Ştatlar səfərlərin daha əvvəl bərpa oluna bilməsini müəyyən etmək üçün vəziyyəti monitorinq edəcək.
Bundan əlavə, Trump administrasiyasının Amerika müəssisələrinə və koronavirus epidemiyasından təsirlənən ayrı-ayrı işçilərə tibbi və maliyyə yardımı göstərməsinə yönəlmiş bir sıra tədbirlərin təsdiqlənməsi üçün Konqresə müraciət etmək niyyətində olduğunu bildirib.
Çıxışından əvvəl prezident öz Twitter hesabında Amerika xalqına müraciət edəcəyini elan edib və yazıb ki, “media bunu birlik və güc dövrü kimi qəbul etməlidir”.
“Ortaq bir düşmənimiz var, əslində bütün dünyanın düşməni olan koronavirus. Onu mümkün qədər tez və təhlükəli nəticələr vermədən məğlub etməliyik. Mənim üçün ABŞ-ın həyatı və təhlükəsizliyindən daha vacib bir şey yoxdur!”, Tramp yazıb.
Trampın müraciətindən sonra Ağ Ev prezidentin Nevada və Kolorado ştatlarına səfərlərinin təxirə salındığını elan edib.
Virusun yayılması və maliyyə bazarlarında tənəzzülün qarşısının alınması səyləri gün ərzində davam edib. Ölkə boyu müxtəlif icmalarda bir sıra tədbirlər təxirə salınıb, universitetlər dəsrlərin virtual keçiriləcəyini elan edib.
Birləşmiş Ştatlarda koronavirus səbəbilə 33 ölüm halı haqda məlumat verilib. Bunlardan 29 nəfər ölkənin qərbindəki Vaşinqton ştatındadır. ABŞ-ın 50 ştatından 38-də 1100-dən çox yoluxma halı təsdiq edilib.
Ümumdünya Səhiyyə Təşkilatı çərşənbə günü Cenevrədə keçirilən btifinqdə koronavirus epidemiyasının yaratdığı qlobal böhranın pandemiya olduğunu elan edib.
İranda ötən sutka ərzində 1 075 nəfər yeni koronavirusa (COVID-19) yoluxub. İranın Səhiyyə, Müalicə və Tibbi Təhsil Nazirliyinin mәtbuat xidmәtinin müdiri K.Cahanpurun sözlərinə görə, ümumilikdə İranda bu virusa yoluxanların sayı 10 075 nəfərə çatıb. O, ötən sutka ərzində 75 nəfərin virus nəticə öldüyünü deyib.
Nazirlik rəsmisi əlavə edib ki, ümumilikdə İranda yeni koronavirusdan ölənlərin sayı 429 nəfərə çatıb, bugünədək 3 276 nəfər sağalıb.
Nyu-Yorkda isə vəkil 50 nəfəri koronavirusa yoluxdurub. 50 yaşlı vəkil şəhərdə virusa yoluxan ilk şəxs olub. Onun yoluxmasından iki gün sonra ailə üzvləri, daha sonra onunla ünsiyyətdə olan şəxslər xəstələnib. Hazırda həmin şəxslər müalicə olunur.
Qeyd edək ki, bu günədək Nyu-Yorkda 108 yoluxma qeydə alınıb.
Rusiyada Dövlət Dumasının bir qrup deputatı koronavirus təhlükəsi ilə əlaqədar karantinə alınıb. Dumanın spikeri Vyaçeslav Volodin Fransadan səfərdən qayıtmış deputat Sergey Katasonova karantinə yollanmağı tapşırıb. Onunla yanaşı, deputatın köməkçiləri, eləcə də Dumada onun yaxınlığında oturan deputatlar barəsində də eyni addım atılıb.
Deputatların virusa yoluxub-yoluxmaması barədə məlumat verilmir.
İspaniyanın “Real” (Madrid) klubunun üzvləri karantinə alınıb. Buna səbəb klubun basketbol komandasının oyunçularından birində koronavirusun aşkarlanması olub. “Real”ın futbol və basketbol komandaları eyni mərkəzdə məşq etdikləri üçün karantin bütün idman növlərinə şamil olunub. Bundan başqa, İspaniya Kral Futbol Federasiyası ölkə çempionatının oyunlarını iki həftə müddətinə dayandırıb.
İtaliyanın "Yuventus" futbol klubunun müdafiəçisi Daniele Ruqanidə də koronavirus aşkar edilib. Bununla əlaqədar klub bütün heyəti karantinə alıb. Bundan başqa, "İnter" futbol klubu da məşqləri dayandırdığını elan edib.
Futbol üzrə İspaniya La Liqası təxirə salınıb. La Liqa və Sequndanın oyunları ilə yanaşı aşağı liqalardakı matçlar da təxirə salınıb. İspaniya Kral Futbol Federasiyası sözügedən qərarı həvəskar turnirlərə də şamil edib.
Namiq QULİYEV
