Çinin Ubey əyalətinin Uhan şəhərində ortaya çıxan və sürətlə dünyada yayılan yeni koronavirusdan (COVİD-19) ölənlərin sayı 4,200-ü keçib, yoluxanların sayı 119 min 241-ə çatıb. Sağalanların sayı isə 66 582-dir.
Baki-xeber.com xarici mediaya istinadən xəbər verir ki, Çində virusun ölkə daxilində yayılmasında ciddi azalma müşahidə edilir. Bununla birlikdə, virusun dünyada yayılması böyük narahatlıq və qorxu yaradır. Virus hazırda dünyanın 118 ölkəsinə yayılıb və ən çox da İtaliyanı əsl xaos ölkəsinə çevirib. Avropada epidemiyadan ən çox əziyyət çəkən ölkə olan İtaliyada 60 milyon insan karantin altına alınıb.
Koronavirusun yayılmasının qarşısını almaq üçün ölkə daxilində sərt tədbirlər və məhdudiyyətlərin tətbiq olunduğu İtaliyada ölənlərin sayı 631-ə çatıb. Yoluxanların sayı 10 mini keçib. Bazar ertəsi axşam İtaliyanın Baş naziri Cüzeppe Kontenin imzaladığı sərəncam 60 milyonluq ölkədə insanların hərəkətliliyini məhdudlaşdırmaq və virusun bu şəkildə yayılmasının qarşısını almağı hədəfləyir.
BBC xəbər verir ki, Baş nazir Konte "evdən çıxmamaq qərarı" kimi xarakterizə etdiyi yeni tədbirlər paketini açıqladıqdan sonra sosial mediada bu mesajı paylaşıb: "İtaliyanın gələcəyi bizim əlimizdədir. Gəlin, hamımız əlimizdən gələni edək, cəmiyyət naminə bir şeydən vaz keçək. Söhbət yaxınlarımızın, valideynlərin, uşaqların, nənə və babaların sağlamlığından gedir. “Mən evdə qalıram” sərəncamını imzaladım”.
Digər tərəfdən, hökumət koronavirusdan təsirlənənlərə dəstək olmaq üçün kredit borcları və hesab-fakturalar kimi ödənişləri dayandırmağı planlaşdırır. İqtisadiyyat nazirinin müavini Laura Kastelli yeni bir sərəncamda "fərdi şəxslər və ailələr" üçün ipoteka və vergilər kimi ödənişlərin dayandırılacağını söyləyib.
İranda yeni növ koronavirusdan ölənlərin sayı 354, yoluxanların sayı isə 9 minə çatıb. Digər tərəfdən, İranda “spirt koronavirusun qarşısını alır” deyib spirtli içki qəbul edib ölənlərin sayı 67 nəfərdir.
Türkiyədə də koronavirüsa ilk yoluxma halı qeydə alınıb. Səhiyyə naziri Fəxrəddin Koca şübhəli şəxsin test nəticəsinin müsbət çıxdığını açıqlayıb. O, xəstənin Avropadan qayıtdığını deyib.
"O tam təcrid edilib. Xəstənin ümumi vəziyyəti yaxşıdır. Onun ailəsinin bütün üzvləri, onunla təmasda olmuş şəxslər nəzarət altındadır və hər biri şübhəli hesab olunur", – Koca əlavə edib.
İngiltərədə, Səhiyyə Nazirliyi nəzdində xəstələrin təhlükəsizliyindən cavabdeh dövlət naziri Nadine Dorriesdə koronavirus aşkar edilib. Dorries bu yaxınlarda Baş nazir Boris Consonun qatıldığı qəbulda iştirak edib və keçən həftə parlamentdə yüzlərlə millət vəkili ilə görüşüb.
İngiltərədə bu günə qədər, Nadine Dorries də daxil olmaqla 382 nəfərdə koronavirus aşkarlanıb. Ölkədə virus nəticəsində 6 nəfər ölüb.
ABŞ-da koronavirusa yoluxanların sayı 981 nəfərdir. Virusdan ölənlərin sayı 30 nəfərə çatıb. Ən çox yoluxma halına Nyu Yorkda rast gəlinib. Birləşmiş Millətlər Təşkilatının şəhərdəki Baş Qərargahı koronavirusa görə ziyarətçilər üçün bağlanıb. ABŞ Demokratlar Partiyasının lideri Çuk Şumer koronavirus testlərində geridə qaldıqlarına dair xəbərdarlıq edib.
Moskvada koronavirus səbəbilə 5 mindən çox insanın qatılacağı kütləvi tədbirlərin, mitinqlərin, futbol matçlarının və etiraz aksiyalarının keçirilməsi qadağan olunub.
Gürcüstanda "COVİD-19" aşkarlanan insanların sayının 15-ə çatdığı bildirilir. Koronavirus tədbirlərinin artırıldığı Ukraynada isə millət vəkillərinə müvəqqəti olaraq xaricə səyahət qadağan edilib.
Koronavirusa 26 yoluxma halı qeydə alınan Polşada hökumət virusun yayılmaması üçün məktəbləri, muzeyləri və kinoteatrları bağlamağa hazırlaşır.
Almaniya kansleri Angela Merkel ölkədə yaşayan insanların 60-70 faizinin koronavirusa yoluxacağı ilə bağlı xəbərdarlıq edib. Səhiyyə naziri Jens Spahn də Merkelin açıqlamalarını dəstəkləyib. Merkelin açıqlamalarına görə, 82 milyon əhalisi olan Almaniyada 50-60 milyon insanın koronavirusdan əziyyət çəkməsi ehtimalı var.
Koronavirusa məruz qalanların 80 faizinin bunun öhdəsindən gələ biləcəyini söyləyən səhiyyə naziri 65 və daha yuxarı yaşlarda olanlar üçün ciddi bir problem ola biləcəyini deyib. Nazir bunun üçün əlavə 28 min çarpayılıq yer ayrıldığını açıqlayıb.
Almaniyada koronavirusdan indiyə kimi iki nəfər ölüb. Son məlumata görə, Berlində gələn ayın əvvəlinə kimi 1000 nəfərdən artıq insanın iştirak edəcəyi bütün tədbirlərin keçirilməsi qadağan olunub.
