Səudiyyə Ərəbistanının kral ailəsinin üç üzvü, o cümlədən kralın qardaşı acıqlanmayan səbəblərdən həbs olunub. Onlardan ikisi krallığın ən nüfuzlu şəxsləridir. Bunlar Kral Salmanın kiçik qardaşı şahzadə Əhməd ibn Əbdüləziz, kralın qardaşı oğlu, keçmiş vəliəhd şahzadə Məhəmməd bin Nayefi və onun kiçik qardaşı şahzadə Nəvaf ibn Naifdir.
“Bakı-Xəbər” məlumat verir ki, bu barədə ilk xəbəri yayan "The Wall Street Journal" qəzeti yazır ki, həbslər cümə günü səhər saatlarında baş tutub. Bu barədə məsələ ilə yaxından tanış olan iki ayrı mənbə məlumat verib. Saxlananların çevriliş planına görə, həbs edildiyi və xəyanətdə ittiham edildiyi bildirilir. "The Wall Street Journal" da onların həbsinin iddia olunan çevriliş cəhdi ilə əlaqədar olduğunu bildirib.
Iddialara görə, onlar bir başa vəliəhd şahzadə Məhəmməd bin Salmanın əmri ilə saxlanıb. Məlumatlara görə, kral ailəsi üzvləri maskalı və qara geyimdə olan xüsusi tayinatlılar tərəfindən saxlanıb və evlərində axtarışlar aparılıb.
Kral Salmanın oğlu və dünyanın ən böyük neft ixracatçısı və ABŞ müttəfiqinin de-fakto lideri vəliəhd şahzadə Məhəmməd bin Salman 2017-ci ildə saray çevrilişi nəticəsində əmisi oğlu Məhəmməd bin Nayefi vəliəhdlikdən devirərək, hakimiyyəti öz əlində toplayıb. O, həmin il korrupsiyaya qarşı mübarizə kampaniyası çərçivəsində kral ailəsinin bir neçə üzvünü də həbs edib.
Şahzadə Məhəmməd hakimiyyətdəki gücünü möhkəmləndirməklə hakim ailənin bəzi üzvlərinin nifrətinə səbəb olub. Mənbələrin bildirdiyinə görə, bəziləri 2018-ci ildə tanınmış jurnalistin səudiyyəli agentlər tərəfindən öldürülməsi və ötən il Səudiyyənin neft infrastrukturuna ən böyük hücumdan sonra onun ölkəni idarə etmək bacarıqlarını sual edib. Onlar bildirib ki, Səudiyyədə taxta gələcək insanın dəyişməsini istəyən kral ailəsinin üzvləri Kral Salmanın ana-atası bir olan yeganə qardaşı şahzadə Əhmədi ailə üzvləri, təhlükəsizlik aparatı və bəzi Qərd qüdrətlərinin dəstəkləyəcəyi mümkün vəliəhd kimi görürdülər.
Səudiyyənin kral ailəsi ilə yaxından tanış olan insanlar və diplomatlar deyir ki, ailə, 84 yaşlı kralın həyatda ikən vəliəhd şahzadəyə müqavimət göstərəcəyini gözləmir, çünki onlar kralın ən sevdiyi oğluna qarşı çıxmayacağını bilir. Kral səlahiyyətlərinin çoxunu oğluna tapşırıb, amma hələ də hər il keçirilən kabinet görüşlərinə sədrlik edir və xarici rəsmiləri qəbul edir.
78 yaşlı şahzadə Əhməd ibn Əbdüləziz kralın sağ qalan yeganə doğma qardaşıdır. O, 2018-ci ildə Londonda nümayişçilər qarşısında vəliəhd Məhəmməd ibn Salmanı tənqid edən ifadələr işlədir. Ardınca Şahzadə Əhməd 2 ay xaricdə yaşayandan sonra 2018-ci ilin oktyabr ayında Ər-Riyada geri dönür və bundan sonra heç vaxt danışmır.
O, vəliəhd şahzadə Salmanın taxta çıxmasını istəməyənlər üçün bir ümid işığı kimi görülürdü. Mənbələrin daha öncə verdiyi məlumata görə, o, hakim Əl-Səud ailəsinin Məhəmməd bin Salmanın vəliəhd şahzadə olmasına qarşı çıxan üzvlərindən ibarət Sədaqət Şurasının üç üzvündən biri olub.
Məhəmməd ibn Naif isə 2017-ci ildə vəliəhd Məhəmməd ibn Salman tərəfindən vəzifədən kənarlaşdırılıb ev dustaqlığına yerləşdirilənə qədər ölkənin daxili işlər naziri olub. Amerika kəşfiyyatçıları onu yaxın və etibarlı tərəfdaşı hesab edirdi.
Ən son həbslər Səudiyyə Ərəbistanın regiondakı rəqibi İranda gərginliyin artdığı və vəliəhd şahzadə ambisiyalı sosial və iqtisadi islahatlar etdiyi vaxta təsadüf edir. Səudiyyə Ərəbistanı hazırda dünyanın ən böyük iqtisadiyyatına malik 19 ölkəsindən və Avropa Birliyindən (AB) ibarət İyirmilər qrupuna sədrlik edir.
Şahzadə Səudiyyə Ərəbistanında ölkədə sosial məhdudiyyətləri azaltdığı üçün alqışlanıb. Lakin o, Yəməni dağıdan müharibə, jurnalist Camal Kaşıqçının Səudiyyənin İstanbuldakı konsulluğunda öldürülməsi və qadın haqları fəallarının həbs olunması səbəbilə tənqidlərlə üzləşir.
Qeyd edək ki, Məhəmməd ibn Salman 2016-cı ildə atası tərəfindən vəliəhd təyin edilib. 2017-ci ildə Səudiyyə kral ailəsinin onlarla üzvü, nazirlər və iş adamları vəliəhdin onları həbs etmək əmri ilə Riyaddakı "Ritz-Carlton" otelində saxlanıblar və ümumilikdə 100 milyarddan çox pul ödədikdən sonra azadlığa çıxıblar.
