Dünya ölkələri koronavirus epidemiyasının inkişaf trayektoriyasını dəyişə bilər. Bunu Ümumdünya Səhiyyə Təşkilatının (ÜST) baş direktoru Tedros Adanom Gebreyesus gündəlik brifinq zamanı deyib.
O bildirib ki, ÜST virusun yayılması məsələsində ümidverici əlamətlər görür: “Bəzi ölkələr çoxlu sayda yoluxma barədə məlumat versələr də, 115 ölkədə ümumiyyətlə yoluxan olmayıb. Son iki həftə ərzində 21 ölkədə yalnız 1 yoluxma qeydə alınıb, 5 ölkədə isə yoluxan olmayıb”.
Baş direktor əlavə edib ki, epidemiyanı kollektiv səylər nəticəsində dayandırmaq olar: “Əgər bütün ölkələr addım atsa, bu epidemiyanın trayektoriyasını dəyişmək olar”.
Onun sözlərinə görə, şayiələr və dezinformasiya ilə mübarizə bu virusla mübarizənin vacib hissəsidir.
Ümumdünya Səhiyyə Təşiklatı koronavirusla bağlı son statistik məlumatları və risq göstəricilərini də yayımlayıb. Bu göstəricilərə görə, son 24 saat ərzində Bosniya və Herseqovina, Cəbəli-Tariq, Macarıstan, Sloveniya, işğal olunmuş Fələstin ərazilərində koronavirus xəstəliyinə (COVlD-19) ilk yoluxma halları qeydə alınıb.
Belə ki, dünya üzrə 2241-i yeni olmaqla ümumilikdə 98,851 yoluxma halı aşkarlanıb. Çində isə bu rəqəm 80 565 minə çatıb. Həmçinin burada 3390 ölüm qeydə alınıb. Onlardan 31-i son 24 saat içində ölənlərdir.
Çindən başqa digər ölkələrdə yoluxma sayı ümumilikdə 85 ölkə/ərazi üzrə 14 768 nəfərdir. Onların içərisində yoluxan 267 şəxs artıq ölüb. Bu günə qədər virus infeksiyasından 55,807 şəxsin sağaldığı qeydə alınıb.
ÜST-ün risk qiymətləndirməsi:
Çində: Çox yüksək
Regional səviyyədə: Çox yüksək
Qlobal səviyyədə: Çox yüksək
Fransanın Milli Assambleyasının (parlament) deputatında yeni növ COVİD-19 koronavirusu aşkar edilib. Bu barədə parlamentin spikeri Rişar Ferran məlumat verib.
Həmkarlarının sözlərinə görə, 68 yaşlı Jan-Lyuk Reytser Müliz şəhərində xəstəxanaya yerləşdirilib. Son dəfə o, parlamentin iclasında fevralın 25-i iştirak edib.
Son məlumata əsasən, Fransada yeni növ koronavirusa 420 nəfər yoluxub, onlardan 7 nəfəri ölüb.
İspaniyada koronavirusdan dördüncü ölüm faktı qeydə alınıb. Valdemoro şəhərində qocalar evində yaşayan qadın virusun növbəti qurbanı olub. Bundan başqa, virus daha 20 nəfərdə aşkar olunub. Onlardan 16-sı sözügedən qocalar evinin işçiləri və sakinləridir. Dörd nəfər reanimasiyaya yerləşdirilib.
İranda yeni koronavirus nəticəsində indiyədək ölənlərin sayı 124 nəfərə çatıb. Bunu İranın Səhiyyə, Müalicə və Tibbi Təhsil Nazirliyinin mәtbuat xidmәtinin müdiri Kiyanuş Cahanpur deyib. K.Cahanpurun sözlərinə görə, ötən sutka ərzində bu virusdan 17 nəfər dünyasını dəyişib və 1 234 yeni yoluxma tәsdiqini tapıb. Onun sözlərinə görə, İranda ümumilikdə 4 747 nəfər bu virusa yoluxub. Nazirlik rәsmisi 913 nәfәrin sağaldığını deyib.
İran xәstәxanalarında koronavirusa yoluxma şübhәlilәrinin sayı tәxminәn 16 min nәfәrdir.
İtaliyada yeni növ COVİD-19 koronavirusundan daha 41 nəfər ölüb. "RİA Novosti"nin verdiyi məlumata görə, bunu Mülki Müdafiə Xidmətinin rəhbəri Ancelo Borrelli deyib. O deyib ki, İtaliyada yeni koronavirusdan ölənlərin sayı 148 nəfərə, yoluxanların sayı isə 3858 nəfərə çatıb.
Çində koronavirusun yeni ştammına yoluxanların sayı 80 min 565-yə çatıb. Bu barədə Çin Xalq Respublikasının Gigiyena və Səhiyyə məsələləri üzrə Dövlət Komitəsinin məlumatında deyilir.
Məlumata görə, koronavirusa yoluxanlardan 3044-ü ölüb, hazırda 29 896 nəfər xəstəxanada müalicə alır. Vurğulanır ki, bu xəstəliyə yoluxan 53 726 nəfər isə sağalıb.
Çin hökuməti koronavirusa qarşı hazırlanan vaksinlərin sınaqlarının aprel ayından başlayacağına ümid edir. Çinin Səhiyyə Məsələləri üzrə Dövlət Komitəsinin Tibb elmləri və texnologiyaların inkişafı Mərkəzinin direktoru Çjen Çjunveyin sözlərinə görə, koronavirusun bu müddət ərzində mutasiyaya uğraması vaksinin hazırlanma prosesinə təsir etməyib.
Qeyd edək ki, bir müddət əvvəl virusun yayılmağa başlamasından sonra təxminən 150 dəfə mutasiyaya uğradığı bildirilmişdi.
