Avropa Suriya mövzusunda Türkiyənin tərəfində yer almalıdır.
Bu sözləri məşhur milyarder Corc Soros Türkiyənin Suriyada keçirdiyi antitürror əməliyyatlarını şərh edərkən deyib.
Soros deyib ki, diqqəti yalnız Rusiya üzündən başlanmış qaçqın böhranına yönəldəriksə, xəstəliyin özü ilə deyil, simptonları ilə mübarizə aparmış olarıq.
Ünlü milyarder xatırladıb ki, 2015-ci ilin sentyabrında Suriyada intervensiya başlatmaqla Rusiya nəinki Ərəb dünyasındakı ən sadiq dostu Bəşər Əsədin hakimiyyəti əlində saxlamasına yardımçı oldu, həm də SSRİ-nin çöküşü ilə özünün dünyada və regionda enən reytinqini yüksəltməyə çalışdı. Sorosun sözlərinə görə, Putin Yaxın Şərqdəki hərcmərclikdən istifadə edərək, İkinci Dünya savaşından sonra əldə olunmuş beynəlxalq norma və prinsipləri məhv etmək yolu tutdu və təxminən 6 milyonluq Suriya əhalisini qaçqına çevirən humanitar böhran Rusiya prezidentinin Suriya strategiyasının bir komponenti deyil, onun əsl məqsədidir.
Əsədi İosif Stalindən sonra öz xalqına silah çevirən ən qəddar dövlət başçısı adlandıran Soros ona bağlı ordunun məktəbləri, xəstəxanaları bombalamağına diqqət çəkərək deyib ki, Rusiya ordusu havadan dəstək verməsəydi, Əsəd bu barbarlığı həyata keçirə bilməzdi. Ötən ilin statistikasına müraciət edən Soros deyib ki, may ayında Rusiya 4 xəstəxanaya 12 saat bomba yağdırıb və bu barədə “Nyu York Tayms” geniş araşdırma yazı dərc edib. BMT-nin açıqlamasına görə isə, 2020-ci ilin 26 fevral tarixində gün boyu 10 məktəb və körpələr evi atəş altında tutulub. Onun dediyinə görə, yerli səhiyyə işçiləri iddia ediblər ki, 2019-cu ildən Suriya rejimi və müttəfiqlərinin İdlibi Əsədin nəzarətinə qaytarmaq üçün başlatdığı hərbi kampaniya dövründə tam 49 tibb müəssisəsi zərər çəkib, başqa bir mənbə isə bu rəqəmin 60 olduğunu bildirib.
Rusiyanın, eyni zamanda İdlibdə 12 düşərgəni bombalamasının ardından yüz minlərlə qaçqının Türkiyə sərhədlərinə üz tutduğunu bildirən Soros deyib ki, nəticədə bu, Ankarada panika yaratdı və Türkiyə tərəfi qaçqınları Avropaya istiqamətləndirməyə məcbur oldu. Bunun nəticəsində isə Türk-Yunan sərhədində böhran başladı.
Milyarderin sözlərinə görə, BMT TŞ üzvü olan Rusiya özünün veto hüququndan tez-tez (Suriya müharibəsi gedişində 14 dəfə) istifadə edərək məsuliyyətdən yayınmağı bacarıb. Üstəlik, Çinlə birləşərək, 65 ölkənin dəstək verdiyi, Suriyada törədilən hərbi cinayətlərə Beynəlxalq məhkəmədə baxılmasını nəzərdə tutan qətnamənin qəbulunu əngəlləyib.
Soros deyib ki, Türkiyə yeganə ölkədir ki, öz ordusunu dinc əhalini Əsəd və Rusiyanın İdlibdə törətdiyi qırğından xilas etmək üçün ora göndərib. Üstəlik, Rusiya aviasiyasının havadan yağdırdığı zərbələr nəticəsində 34 şəhid verib və Moskva bu olaya dəxli olmadığında israr edir. Türkiyənin nüvə dövləti olmaması səbəbindən Rusiyaya analoji cavab vermədiyini, əvəzində isə PUA-larla Əsəd ordusundan qisas aldığını bildirən Soros Putinin növbəti dəfə ölümlərə görə cəzasız qaldığını bildirib.
Soros deyib ki, hələ 2014-cü ildə Avropanı Ukraynada baş verənlərə səssiz qalmamağa çağırıb və hazırda İdlibdə baş verənlər də həmin ssenari üzrə gedir. Beləliklə də Avropa Rusiyanın sayəsində yaranmış qaçqın böhranında fokuslanmaqla xəstəliyin səbəbi ilə deyil, simptomları ilə mübarizə aparır. Halbuki, Avropa Türkiyənin milyonlarla qaçqına qucaq açmaqla çiynini ən ağır yükün altına verdiyini etiraf etməlidir. Hazırda Türkiyədə 3,5 milyon qaçqına sığınacaq verildiyinə diqqət çəkən Soros deyib ki, artıq bu ölkə Əsəd və Putinin sərhədlərinə qaçırdığı daha bir neçə milyon qaçqını qəbul edə bilməz və bu məsələdə Ankara Avropanın dəstəyini haqq edir.
“Bu səbəbdən də Avropa Prezident Rəcəb Tayyib Ərdoğanın Putinlə danışıqlarda atəşkəsin əldə olunması və İdlibdə qaçqınlar üçün “təhlükəsiz ərazi”nin saxlanması yönündə təşəbbüslərini dəstəkləməli və ona yardımçı olmalıdır” o deyib.
SAMİRƏ
