ABŞ-da Rusiyanın 2016-cı il prezident seçkisinə müdaxiləsi və prezident Donald Trampın yardımçılarının Rusiya ilə mümkün münasibətlərini təhqiq edən xüsusi prokuror Robert Müller istintaqı başa çatdırıb. Baki-xeber.com xəbər verir ki, xüsusi prokuror hesabatı Ədliyyə Nazirliyinə göndərib.
Indi gözlər ABŞ Ədliyyə Nazirliyinin Prezident Donald Tramp haqqında yeni istintaqa başlayıb-başlamayacağına yönəlib.
Hələ ki, heç bir detal paylaşılmadığı üçün, keçmiş FBİ başqanı, xüsusi prokuror Müllerin hesabatında təhqiqatda qaldırılan əsas sualların cavablandırılıb-cavablandırılmadığı bəlli deyil. Buna "Trampın kampaniyası 2016-ci il prezident seçkisinin nəticələrini Trampın lehinə çevirmək üçün Kreml ilə əməkdaşlıq edibmi" və "Daha sonra Tramp istintaqa mane olmaq üçün FBI-ın direktorunu vəzifəsindən qovmaq da daxil olmaqla hər hansı addım attıbmı?" kimi suallar daxildir.
İki ildir davam edən təhqiqat Trampın prezidentliyinə kölgə salıb və 34 nəfərin qanunu pozmaqda ittiham olunması ilə nəticələnib ki, onlar arasında Trampın seçki kampaniyasında çalışmış altı nəfər də var.
Növbəti addımlar Trampın təyin etdiyi baş prokuror, Konqres və böyük ehtimalla federal məhkəmələrdən asılı olacaq. Ədliyyə Nazirliyi bildirir ki, Müller yekun hesabatını ədliyyə naziri Uilyam Bara təqdim edib. Bar isə öz növbəsində hesabatı nəzərdən keçirir.
Aş Ev sözçüsü Sarah Sanders bundan sonra hansı addımların atılacağına ədliyyə naziri Uilyam Barın qərar verəcəyini deyib.
Bar deyib ki, o, Müllerin tapıntılarının xülasəsindən ibarət ayrı hesabat hazırlayacaq. Bar öz qeydlərini tez zamanda Konqresə göndərə biləcəyini söyləyib. “Mən hesabatı nəzərdən keçirirəm və bəlkə də bu həftə sonunadək xüsusi prokurorun çıxardığı əsas nəticələrlə bağlı məlumat verə biləcəm”– deyə, Bar Nümayəndələr Palatası və Senatın Ədliyyə Komitələrinin yüksək vəzifəli respublikaçı və demokrat üzvlərinə ünvanladığı məktubda bildirib.
Hesabatın hansı qisminin ictimaiyyətə açıqlanacağı və ya Konqresə təqdim ediləcəyi də hələ ki, bəlli deyil. Ədliyyə naziri bildirib ki, hesabatda hansı hissələrin paylaşılacağını müavini və Müllərlə müzakirə edəcək.
Konqresdəki Demokratlar isə hələ yanvar ayında hesabatın tam şəkildə ictimaiyyətə açıqlanmasına çalışacaqlarını, lazım gələrsə bunu məhkəməyə daşıya biləcəklərini bildirmişdilər.
Qanunlara görə ədliyyə naziri Müller yekun hesabatının məzmununu Senatın Ədliyyə Komitəsinin respublikaçı də demokrat liderlərilə bölüşmək məcburiyyətindədir.
Demokrat liderlər hesabatın tam mətninin ictimaiyyətə açıqlamasında israr edirlər. Onlar Ağ Evin, hesabatın hansı hissələrinin açıqlanacağı ilə bağlı veriləcək qərara müdaxilə etməsinə icazə verməməyə çağırıb.
Ədliyyə naziri Bar deyib ki, o mümkün qədər çox məlumatı ictimailəşdirmək istəyir. Detalları gizlətməyə dair hər hansı bir cəhd Ədliyyə Nazirliyi ilə Müller və onun müstəntiqlərini Konqres qarşısında ifadə verməyə çağırmaq istəyən qanunvericilər arasında mübahisələ gətirib çıxaracaq. Demokratların bu addımı isə Tramp administrasiyasının qəti etirazına səbəb ola bilər.
