"Görürəm ki, artıq Kiprdə federal əsasda bir razılaşma ola bilməz. Dediklərimiz bu seçkilərin nəticələri ilə bir daha təsdiqləndi".
Baki-xeber.com xəbər verir ki, bu sözləri Şimali Kipr Türk Cümhuriyyətinin Prezidenti Ersin Tatar Cənubi Kiprdə keçirilən parlament seçkilərində iqrçi Milli Xalq Cəbhəsinin (ELAM) səslərinin artmasına münasibət bildirərkən deyib.
Prezident Tatar bu fikirləri radikal sağçı, irqçi mövqeyi ilə tanınan ELAM-ın səslərini ikiqat artırdığı parlament seçkiləri ilə əlaqədar Anadolu Agentliyinə müsahibəsində səsləndirib.
Kiprin yunan tərəfində millətçilik və ekstremist düşüncələrin artdığını ifadə edən Tatar bunun Kiprdə ədalətli, qalıcı və davamlı bir razılaşma üçün müsbət bir inkişaf olmadığını qeyd edib.
Ersin Tatar deyib ki, bu nəticələr adanın yunan tərəfində millətçi və radikal düşüncələrin getdikcə artdığını göstərir: "Həm yunan tərəfindəki təhsil sistemində radikal millətçi ünsürlərin fəaliyyəti, həm də idman zallarında cərəyan edən proseslər seçkilərin nəticəsində özünü büruzə verib.
O deyib ki, seçkiləri hazırda yunan tərəfində türklərə qarşı nifrət aşılayan faşist ELAM tipli partiyalar barəsində tədbir görülməməsinin nəticəsi kimi dəyərləndirmək olar. “Üstəlik, yunan Ortodoks Kilsəsinin də bunlara dəstək verməsi ELAM-ın səslərinin artmasının ən böyük səbəbidir”.
SAMİRƏ
