Dünyada koronavirusdan ölənlərin sayı 9 min nəfəri ötüb. Son bir neçə saat ərzində İranda 149, Almaniyada 3, İspaniyada 2 nəfərin ölümü qeydə alınıb. Son statistik məlumatlara əsasən, koronavirusdan ölənlərin sayı 9 148 nəfər təşkil edir. Ümumilikdə, dünyada 222 973 nəfər koronavirusa yoluxub.
Baki-xeber.com xəbər verir ki, Avropa hələ də virusun yayıldığı əsas bölgə kimi qalır. Almaniyada virusdan 28 nəfər ölüb, yoluxanların sayı 13 min 93-ə yüksəlib. Fransada isə 24 saatda 89 nəfər ölüb. Ölkədə ölənlərin sayının ümumilikdə 264 nəfər olduğu açıqlanıb. Yoluxanların sayı isə 9134-ə çatıb.
Çindən sonra ən çox ölüm hadisəsinin baş verdiyi İtaliya dəhşətli xəbərlər gəlməkdə davam edir. Ölkədə ötən gün virusdan ölənlərin sayı 475 nəfər artaraq 2978-ə çatıb. Yoluxanların sayı isə 29 minə yüksəlib.
Britaniyada ölənlərin sayı 104-ə çatıb. Ölkədə bütün təhsil müəssisələri bağlanıb. Avropa İttifaqının Böyük Britaniya ilə “Brexit” danışıqları üzrə səlahiyyətli nümayəndəsi Mişel Barnye də koronavirusa yoluxub. Siyasətçi öz “Twitter” səhifəsində koronavirus üçün testdən keçdiyini və nəticənin müsbət olduğunu bildirib.
M.Barnye özünü yaxşı hiss etdiyini və könüllü şəkildə karantinə alındığını qeyd edib.
ABŞ-da isə yoluxanların sayı 9345, ölənlərin sayı 150-yə çatıb. ABŞ-da iki konqresmen də koronavirusa yoluxub. Yuta ştatını təmsil edən demokrat Benjamin Makadams və respublikaçı konqressmen Mario Dias-Balartındə virus aşkarlanıb.
Beynəlxalq Əmək Təşkilatı koronavirus pandemiyası ilə əlaqədar genişmiqyaslı işsizlik proqnozlaşdırıb. Mütəxəssislər hesab edir ki, dövlətlər işçilərin müdafiəsi üçün təcili tədbirlər görməsə, 25 milyon şəxs iş yerlərindən məhrum ola bilər.
Müqayisə üçün qeyd edək ki, 2008-ci ildə qlobal maliyyə böhranı nəticəsində 22 milyon nəfər işsiz qalmışdı.
Rusiyada koronavirusdan ilk ölüm faktı qeydə alınıb. Moskvada xəstəxanaların birində 79 yaşlı qadın həyatını itirib. Onun COVID-19-la yanaşı digər xəstəliklərdən də əziyyət çəkdiyi bildirilib.
Qeyd edək ki, bu günə qədər ölkədə 147 yoluxma faktı qeydə alınıb.
İranda ötən sutka ərzində yeni koronavirusdan 149 nəfər ölüb. İranın səhiyyə, müalicə və tibbi təhsil nazirinin müavini Əlirza Rəisinin sözlərinə görə, ümumilikdə İranda bu virus nəticəsində 1 284 nəfər ölüb. Nazirlik rəsmisi ötən sutkada 1 046 nəfərin koronavirusa yoluxduğunu deyib.
Rəisi əlavə edib ki, ümumilikdə İranda 18 407 nəfər bu virusa yoluxub. İndiyədək virusdan sağalanların sayı 5 979 nəfər olub.
İranın Səhiyyə, Müalicə, Tibbi Təhsil Nazirliyinin mətbuat xidmətinin müdiri Kiyanuş Cahanpur isə İranda koronavirus nəticəsində hər 10 dəqiqədə bir nəfərin öldüyünü açıqlayıb. Onun sözlərinə görə, bundan əlavə, hər 1 saatda 50 nəfər yeni virusa yoluxur.
Nazirlik rəsmisi bu məlumatların İran vətəndaşları tərəfindən ciddiyə alınmasını vurğulayıb.
Ermənistanda koronavirusa yoluxanların sayı 115 nəfərə çatıb. Ölkənin Səhiyyə Nazirliyinin açıqlamasına görə, son sutka ərzində yoluxanların sayı 5 nəfər artıb. İki nəfərin vəziyyəti ağır olaraq qiymətləndirilir.
