Yeni növ koronavirus (COVID-19) Avropanın bütün ölkələrinə yayılıb. Baki-xeber.com xəbər verir ki, ən son martın 17-də Monteneqroda koronavirusa iki yoluxma faktı qeydə alınıb.
Virusa yoluxanların iki qadın olduğu və əvvəllər virusun yayıldığı ölkələrə səyahət etdikləri bildirilib.
Monteneqroda COVID-19 aşkarlanması ilə virus Avropa qitəsindəki bütün ölkələrə yayılmış oldu.
Bu arada, üçüncü ölkə vətəndaşlarının Avropa Birliyi ölkələrinə və Şengen bölgəsinə səyahətlərinə 30 günlük məhdudiyyət qoyulub. Bu barədə AB Şurasının sədri Çarlz Mişel və AB Komissiyasının sədri Ursula fon der Leyen, Birlik liderlərilə telekonfransdan sonra mətbuat konfransında açıqlama verib.
Mişel yığıncaqda liderlərin AB sərhədlərinin bağlanması qaydasını təsdiqlədiyini açıqlayıb və yeni növ koronavirus (COVID-19) səbəbilə üçüncü ölkə vətəndaşları üçün Birlik üzvü olan ölkələr və Birlik üzvü olmayan Şengen bölgəsi ölkələrinə 30 günlük səyahət məhdudiyyəti gətirildiyini deyib.
AB Komissiyasının hazırladığı sənəddə AB və ya Şengen ölkələrində yaşayış icazəsi və ya iş icazəsi olanların, COVID-19 virusu üzərində işləyən elm adamlarının və səhiyyə işçilərinin istisnalıq təşkil etdiyi bildirilir.
İranda 18 marta yeni koronavirusa (COVID-19) yoluxanların sayı 17 361 nəfərə çatıb. İranın Səhiyyə, Müalicə və Tibbi Təhsil nazirinin müavini Əlirza Rəisinin sözlərinə görə, ötən sutka ərzində bu virusa 1 192 nəfər yoluxub.
Ə.Rəisi əlavə edib ki, İranda bu günədək koronavirusdan ölənlərin sayı 1135 nəfərə yüksəlib.
Nazirlik rəsmisi ötən sutkada 147 nəfərin virusdan öldüyünü deyib. O bildirib ki, indiyədək koronavirusdan 5 710 nəfər sağalıb.
Gürcüstanda bütün əhali koronavirus testindən keçirilə bilər. Ölkənin Səhiyyə naziri Yekaterina Tikaradze bildirib ki, bu testlər yoluxmanı ilkin mərhələlərdə aşkar etməyə imkan verəcək.
Nazir bildirib ki, testlərin aparılması üçün Cənubi Koreyanın təcrübəsindən istifadə olunacaq və hazırda bu ölkə ilə, eləcə də Çinlə danışıqlar aparılır.
Qeyd edək ki, bu günədək Gürcüstanda koronavirusa 38 nəfərin yoluxduğu təsdiq edilib. Hazırda 1 130 nəfər karantinə yerləşdirilib, stasionar nəzarətdə 81 nəfər yoxlanılır.
Koronavirus təhlükəsi ilə əlaqədar Gürcüstan martın 18-dən başlayaraq əcnəbilər üçün sərhədləri bağlamağa qərar verib.
Bundan başqa, Çin, İran, Cənubi Koreya, İtaliya, Almaniya, Fransa, İspaniya, Avstriya, İsveçrə, Norveç və Danimarkadan olan vətəndaşlar üçün məcburi karantin rejimi tətbiq olunur.
Ermənistanda koronavirusa yoluxanların sayı 80 nəfəri keçib. Bunu ölkənin Baş naziri Nikol Paşinyan öz "Facebook" səhifəsindən bildirib. Qeyd olunur ki, sutka ərzində virusa yoluxanların sayı 6 nəfər olub və 84 nəfərə çatıb. 2 nəfərin vəziyyəti ağır olaraq dəyərləndirilir.
Rusiyada koronavirusa yoluxanların sayı 147 nəfərə çatıb. Qeyd olunur ki, yoluxanların hamısı epidemiyanın mövcud olduğu ölkələrə gedib-gələn şəxslərdir. Yoluxanlar həkim nəzarətinə götürülüb, hazırda onların təmasda olduğu şəxslər müəyyənləşdirilir.
Dünyada koronavirusa yoluxanların sayı 200 min nəfəri ötüb. “Trend”in məlumatına görə, son bir neçə saat ərzində Almaniyada 510, Malayziyada 117 yoluxma faktı qeydə alınıb.
Ümumilikdə, qlobal olaraq koronavirusa yoluxanların sayı 200 097 nəfər təşkil edib, 8 010 nəfər isə virusun qurbanı olub.
Namiq QULİYEV
