ABŞ Müdafiə naziri Mark Esper və müavini koronavirus şübhəsi ilə karantinə alınıb. Baki-xeber.com xarici mediaya istinadən xəbər verir ki, Pentaqon nazir Esper və müavini Devid Norquistin təhlükəsizlik məqsədilə karantinə alındığını açıqlayıb.
ABŞ-ın ən yüksək müdafiə heyətinin digər heyət və qonaqlardan fiziki olaraq uzaq tutulacağını bildirən Müdafiə Nazirliyinin sözçüsü Conatan Hoffman onlar və personalın yalnız telekörpü vasitəsilə əlaqə quracaqlarını deyib.
Pentaqon koronavirusa yoluxanların sayının 37-yə yüksəldiyini də açıqlayıb.
Ümumdünya Səhiyyə Təşkilatının (ÜST) koronavirusun müalicəsi zamanı “İbuprofen” və bu tərkibli dərmanların qəbul edilməsi məsləhət görülmür. Təşkilatın mətbuat katibi Kristian Lindmayer bildirib ki, özünümüalicə zamanı “Parasetamol” içmək məqsədəuyğundur.
Qeyd edək ki, koronavirusa 162 ölkədə 185 mindən çox şəxs yoluxub. 7 332 nəfər virusun qurbanı olub.
İspaniyada koronavirusdan ölənlərin sayı kəskin artdı
İspaniyada bir gündə koronavirusdan 149 nəfər vəfat edib. “Trend”in məlumatına görə, bunu ölkənin Səhiyyə Nazirliyi bildirib.
Ümumilikdə, ölkədə koronavirusdan ölənlərin sayı 491 nəfərə çatıb.
Həmçinin, daha 1 236 nəfərin koronavirusa yoluxduğu məlum olub. Bugünədək İspaniyada virusa yoluxanların sayı 11 178 nəfər olub.
Avro-2020 təxirə salındı
Bu arada, UEFA-nın növbədənkənar iclasında futbol üzrə 2020-ci il Avropa çempionatının təxirə salınması barədə qərar verilib. Qərara əsasən, Avropa çempionatı 2021-ci il iyunun 11-dən iyulun 11-dək baş tutacaq.
Qeyd edək ki, turnir Avropanın 12 şəhərində, o cümlədən Bakıda keçiriləcək.
İranda koronavirusdan 135 nəfər ölüb
İranda ötən sutka ərzində yeni koronavirusdan (COVID-19) 135 nəfər ölüb. İranın Səhiyyə, Müalicə və Tibbi Təhsil Nazirliyinin mәtbuat xidmәtinin müdiri Kiyanuş Cahanpur deyib. Onun sözlərinə görə, ümumilikdə İranda bu virus nəticəsində 988 nəfər ölüb.
Nazirlik rəsmisi ötən sutkada 1 178 nəfərin koronavirusa yoluxduğunu deyib. Əlavə edib ki, ümumilikdə İranda 16 169 nəfər bu virusa yoluxub.
Cahanpurun sözlərinə görə, indiyədək virusdan sağalanların sayı 5 389 nəfər olub.
İranın səhiyyə naziri kömək istədi
İranın səhiyyə, müalicə və tibbi təhsil naziri hökumətdən koronavirusla mübarizə məqsədilə 250 milyon avro vəsaitin ayrılmasını istəyib. Bu, İranın səhiyyə, müalicə və tibbi təhsil naziri və İranın Koronavirusla Mübarizə Milli Komitəsinin sədri Səid Nəməkinin İran prezidenti Həsən Ruhaniyə ünvanladığı məktubda öz əksini tapıb. S.Nəməkinin sözlərinə görə, təxminən 20 min çarpayı və tibb işçisi üçün tibbi geyim, maska və tibbi ləvazimata təcili ehtiyac var.
Nəməki əlavə edib ki, cari İran ilində (21 mart 2019-dan başlayaraq) payız fəslində H1N1 qripinin yayıldığı vaxtda və digər sahələrə (yaz fəslində baş verən sel və daşqınlara görə) 600 milyon avro vəsait ayrılmışdı.
İranlı nazir bildirib ki, Çində yeni koronavirusun yayılması ilə bir ay öncədən həmin vəsaitin (600 milyon avro) əsas hissəsi bu virusla əlaqədar dərman preparatlarının idxalına sərf olunub.
İranda koronavirusla əlaqədar 85 min məhbus müvəqqəti buraxılıb
İranın məhkəmə sisteminin sözçüsü Qulamhüseyn İsmaili isə İranda yeni koronavirusun yayılması ilə əlaqədar indiyədək 85 min məhbusun müvəqqəti olaraq evə buraxıldığını açıqlayıb. Q.İsmailinin sözlərinə görə, bu, İranda məhbusların 50%-dən çoxu deməkdir.
İsmaili əlavə edib ki, vətəndaşlar üçün təhlükə yarada biləcək məhbuslar, o cümlədən silahlı qarət, kimyəvi turşular səpən müttəhimlər, insan oğurluğu və böyük ölçüdə fırıldaqçılıqla əlaqədar müttəhimlər müvəqqəti buraxılmayıb. “Bundan əlavə, həbsxanalarda məhbusların sağlamlığı ilə əlaqədar davamlı şəkildə səhiyyə tədbirləri görülür” –deyə o qeyd edib.
Qazaxıstanın paytaxtı bağlana bilər
Qazaxıstanın paytaxtı Nur-Sultanın rəhbərliyi koronavirus təhlükəsi ilə əlaqədar şəhərin bağlanması məsələsini müzakirə edəcək. Səhiyyə Nazirliyinin rəsmi nümayəndəsi Dias Ahmetşaripin sözlərinə görə, bununla bağlı qərar gün ərzində verilə bilər.
Qeyd edək ki, Nur-Sutan şəhərində təkcə bu gün 14 yeni yoluxma faktı aşkar edilib.
Ümumilikdə, ölkədə 27 yoluxma qeydə alınıb.
