Tədbir 17 aprel 2024-cü il saat 14:00-da Azərbaycan Bəstəkarlar İttifaqının Üzeyir Hacıbəyli adına Konsert Salonunda keçirilmişdir. Ön sözlə çıxış edən Azərbaycan Bəstəkarlar İttifaqının sədri, AMEA-nın müxbir üzvü, Xalq artisti, professor, xanım Firəngiz Əlizadə görkəmli sənətkar, Xalq artisti, professor, Dövlət Mükafatı laureatı, "Şöhrət" ordenli bəstəkar, dirijor, pedaqoq Süleyman Ələsgərovun həyatı və yaradıcılığı haqqında məlumat verdi.
Süleyman Ələsgərov 22 fevral 1924-cü ildə Azərbaycanın musiqi beşiyi olan Şuşada anadan olmuşdur. Musiqi istedadını Şuşanın gözəlliyindən alan Üzeyir Hacıbəyovun musiqisindən bəhrələnən gözəl sənətkar Süleyman Ələsgərov ilk musiqi təhsilini Şuşa orta ixtisas musiqi məktəbinin tar sinfində bitirdikdən sonra 1943-cü ildə musiqi təhsilini davam etdirmək üçün Bakıya gəlmiş, Azərbaycan Konservatoriyasının nəzəriyyə, sonra isə bəstəkarlıq şöbələrində öz musiqi təhsilini davam etdirmişdir. Burada konservatoriyanı fərqlənmə diplomu ilə bitirən Süleyman Ələsgərov vətənpərvərlik haqqında mahnılar bəstələyir. Həzi Aslanovun xatirəsinə "Simfonik" poeması, "Məhəbbət gülü" musiqili komediyası, skripka, violonçel, fortepiano üçün triosu, "Gözlə məni, gözərəm", "Xatirə" və başqa əsərləri məhz vətənpərvərlik mövzusunda yazmışdır. 1947-ci ildə Azərbaycan Dövlət Filarmoniyasında ifa edilmiş violonçel, fortepiano və simfonik orkestr üçün yazılmış ilk əsər kimi dinləyicilər tərəfindən çox yaxşı qarşılanmışdır. 1948-ci ildə bəstəkar Azərbaycan Konservatoriyası müasirlərinin həyatına həsr etdiyi "Vətən" simfoniyası ilə bitirir.
Süleyman Ələsgərovun yaradıcılığında musiqili komediya janrı xüsusi yer tutur. Onun mərhum şair, alim, ədib Şıxəli Qurbanovun librettosuna yazdığı "Milyonçunun dilənçi oğlu" operettosu 1967-ci ildə Azərbaycan Dövlət mükafatına layiq görülmüşdür. "Ulduz" operettosu isə təkcə Azərbaycanda deyil, Türkiyədə də tamaşaya qoyulmuş, onun əsasında C.Cabbarlı adına Azərbaycan Film Kinostudiyasında bədii film də çəkilmişdir. 1962-ci ildə bəstəkar Ə.Bədəlbəylinin və S.Qurbanovun librettosu əsasında yazılmış "Bahadır və Sona" operası M.F.Axundov adına Azərbaycan Dövlət Akademik Opera və Balet Teatrının səhnəsində tamaşaya qoyulmuşdur. Bəstəkar bir neçə kantata, simfolik poemalar yaratmışdır. Bunlardan "Vətənə eşq olsun", "Bahar təranələri", "Bir bayraq altında" kontataların göstərmək olar.
Süleyman Ələsgərovun "Bayatı-Şiraz" simfonik muğamı, tar və xalq çalğı alətləri orkestri üçün konsertləri, instrumental əsərləri də yaradıcılığında xüsusi yer tutur.
Bəstəkar öz yaradıcılığında poema və mahnılara da yer ayırmışdır. S.Ələsgərovun Nizaminin sözlərinə yazdığı "Sərvi Xuramanım mənim", M.Füzulinin qəzəlinə bəstələdiyi "Vətənimdir", Nəsiminin "Neylərəm" romansları bu gün də ifaçılarımızın repertuarındadır. "Neftçi qız", "Xəzər neftçisi" və "Pambıqçılar" mahnısı və s. mahnılar bəstəkarın yaradıcılığının zənginləşdirən əsərlərdəndir. S.Ələsgərov gənc nəslin tərbiyəsi sahəsində müəyyən işlər görmüşdür. Onun ümumtəhsil məktəbləri üçün yazdığı musiqi dərsliyindən uzun müddət şagirdlər istifadə etmişlər. Bəstəkar 2000-ci ildə Bakı şəhərində vəfat etmişdir.
Əməkdar artist (tenor) Ramil Qasımov S.Rüstəmin "Qarabağ" mahnısını Konsertmeystr, Əməkdar artist Zülfiyyə Sadıqovanın iştirakı ilə ifa etdi. Süleyman Ələsgərovun həyat və yaradıcılığına həsr olunmuş "Xəyala dalarkən…" sənədli televiziya filminin nümayişini, Bəstəkarlar İttifaqının tədbirində tamaşaçılara göstərdilər. Film tamaşaçılar tərəfindən rəğbətlə qarşılandı.
Bəstəkar Süleyman Ələsgərovun pedaqoji fəaliyyəti ilə bağlı sənətşünaslıq üzrə elmlər doktoru, dosent Leyla Zöhrabova geniş məlumat verdi.
Beynəlxalq müşahidə laureatı Bəhruz Zeynal (tar) Konsertmeyster Rəna Zəkiyevanın müşayiətilə "Daimi hərəkət"i ifa etdi.
Şuşa Rayon İcra Hakimiyyətinin Başçısının müavini Vüsalə Fətəliyeva Azərbaycan Bəstəkarlar İttifaqının Qarabağ bölgə təşkilatının yaradılmasında Süleyman Ələsgərovun böyük rolu olduğunu vurğuladı və bu barədə geniş məlumat verdi.
Xalq artisti, professor, ADXÇAO-nin bədii rəhbəri və baş dirijoru öz işlədiyi sahədə S.Ələsgərovun xalq çalğı alətləri orkestrinin inkişafında bəstəkarın böyük rolu olduğunu bildirdi, çalğı alətləri haqqında yazılı məlumatlar verdi. Ağaverdi Paşayev S.Ələsgərovun 100 illiyinə həsr olunmuş Şəkidə keçiriləcək tədbirinə dəvət etdi.
"Balaca çoban"ı Süleyman Ələsgərov adına 1 saylı Uşaq Musiqi məktəbinin II sinif şagirdi Nəsirli Qurban (violin) ifa edir, Konsertmeyster Aytən Cavadova müşayiət edirdi.
Vokalist Quliyev İbrahim Habil oğlu müəllimi Ramil Qasımovun repertuarından tədbirdə vokal ifa etdi, onu Konsermeyster Zülfiyyə Sadıqova müşayiət etdi. Mən Quliyev İbrahim Habil oğlu Rafiq Babayev adına 25 nömrəli orta ixtisas vokal məktəbini bitirmişəm. Hazırda Ramil Qasımovun təşəbbüsü altında yaradılan Bülbül vokal məktəbində Ramil müəllimin şagirdi olaraq təhsil alıram. Və mən bir Şuşalı övladı olaraq "Heydər Əliyevin 100 illiyi"nə həsr olunmuş müsabiqədə 1-ci yerə layiq görülmüşəm. Birinci Qarabağ döyüşündə Şuşa şəhərində şəhidlik zirvəsinə ucalan əmim Zaur Quliyev mənim gələcəkdə ölkəmizin Savadlı Vokalçılarından olub Şuşa şəhərində Bülbülün davamçısı kimi onun adını yaşadacağımı bilsəydi mənimlə qürur duyardı.
Əməkdar incəsənət xadimi, A.Zeynallı adına Bakı Musiqi Kollecinin direktoru Nazim Kazımov S.Ələsgərov haqqında xatirələrindən danışdı.
Qanunçalanlar Ansanblı "Şalaxo" ifa etdilər, Bədii rəhbər, Əməkdar artist Təranə Əliyevanın iştirakı ilə.
Sonra Şuşa İcra Hakimiyyətinin başçısı Bayram Səfərov S.Ələsgərovla bağlı xatirələrindən danışdı. Onun gözəl insan kimi hər an insanlardan köməyini əsirgəməyən, darda olana arxa duran bir insan olduğunu bildirdi.
Əməkdar mədəniyyət işçisi, sənətşünaslıq üzrə fəlsəfə doktoru, aparıcı Səadət Təhmiraz qızı dedi ki, günlərlə, aylarla Süleyman Ələsgərovun yaradıcılığından danışsaq da qurtarmaz.
Bütün yaradıcılığı sənətkarlar tərəfindən bəyənilib, dövlət tərəfindən mükafatlandırılıb. Sonra gələn qonaqlara təşəkkür edib, minnətdarlığını bildirdi. Sonda İttifaq üzvləri ilə xatirə şəkilləri çəkdirdilər.
Mehriban Əmrullayeva
