Niyazi Əliyev: "Taxta bazarının sığorta olunmamasının günahkarı şirkətlər deyil, sahibkarların özləridir"
Bakı şəhərinin Nərimanov rayonunda "Taxta bazarı" adlanan ərazidə baş vermiş yanğında sahibkarlara külli miqdarda ziyan dəyib. Yanğında zərər çəkən sahibkarlardan biri Mətləb Aslanov media nümayəndələrinə açıqlamasında bildirib ki, 80 m² ərazidə təxminən 70-80 min manatlıq malı yanıb:
"Yanğın qonşu sexdən başlayıb. Heç bir sığorta şirkəti bazarı sığortalamayıb. Dəfələrlə müraciət olsa da, risqli ərazi olduğuna görə sığorta edilməyib".
Maraqlıdır, sığorta şirkətləri tikinti materiallarını sığortalamaqda niyə maraqlı deyil?
"Bugünədək baş vermiş yanğın hadisələri ilə bağlı deyə bilərəm ki, ya sənədləri tam şəkildə qaydasında deyil, ya da hər hansı sənəd çatışmazlığı var"
Sığorta eksperti Niyazi Əliyev "Bakı-Xəbər"ə açıqlamasında bildirdi ki, daşınmaz əmlakın icbari sığortası hər bir əmlak sahibi üçün məcburidir. Burada yaşayış əmlakları üçün tariflər Bakı şəhərinə münasibətdə 50 manat, təminat məbləği 25 min manata qədər, Sumqayıt, Gəncə, Naxçıvan şəhərlərinə münasibətdə tariflər 40 manat, təminat məbləği 20 min manata qədər, digər şəhər və rayonlara münasibətdə isə tariflər 30 manat, təminat məbləği isə 15 min manat qədərdir. Qeyri-yaşayış əmlakları üçün isə tariflər müvafiq əmlakın yeri, həcmi və təyinatı nəzərə alınmaqla hesablanır. Əmlakların yanğından və digər risqlərdən sığortası növü könüllüdür və xüsusilə daşınar əmlaklara şamil edilir: "Ölkə ərazisində daşınmaz əmlakın icbari sığortası həm sahibkarlar, həm də fərdi vətəndaşlar üçün məcburi xarakter daşıyır. Sahibkarlarla bağlı daşınmaz əmlakın icbari sığortası ilə bağlı nəzarəti Fövqəladə Hallar Nazirliyi həyata keçirir. Əmlakla bağlı təhlükəsizlik qaydaları FHN tərəfindən yoxlanılır, eyni zamanda daşınmaz əmlakın icbari sığortasının olub-olmadığı müəyyən edilir. Həmçinin, mülki məsuliyyət sığortası deyilən bir sığorta növü var ki, bu, daşınmaz əmlakın istismarı ilə bağlı mülki məsuliyyətin icbarı sığortasıdır. Bu, fərdi şəxslərə aid deyil, yalnız sahibkarlara şamil edilir. Bu sığorta növünün mahiyyəti ondan ibarətdir ki, sahibkarlar tərəfindən üçüncü şəxslərə dəyən ziyan həmin sığorta şirkəti tərəfindən qarşılanır və bununla bağlı sığorta kompensasiyası həyata keçirilir. Bu, daşınmaz əmlakla bağlı məsələdir. Bir də daşınan əmlak sığortası var, hansı ki, sahibkarlar öz məhsullarını, əmlakını gətirib satırlar. Ölkəmizdə daşınan əmlakın könüllü sığortası var. Satış məqsədilə mağazaya gətirilən həmin əmlakla bağlı bu sığorta növü qanunvericiliyə görə məcburi xarakter daşımır. Bu, sahibkarın istəyindən asılıdır. Taxta bazarının sığorta olunmamasının günahkarı şirkətlər deyil, sahibkarların özləridir. Çünki sahibkarlar düzgün şəkildə qaydalara əməl etmək istəmir. Əmlak daşınmazdırsa, o zaman həmin yerin çıxarış sənədi tələb edilir. İkinci sənəd olaraq, həmin yer üzrə FHN-in yanğın təhlükəsizliyi qaydaları barədə akt olmalıdır. Həmin akta əsasən, sığorta şirkəti ərazidə təhlükəsizliyin necə təmin olunmasını dəyərləndirir. Yanğın təhlükəsizliyi aktı yoxdursa, o zaman sığorta şirkəti həmin əmlakı sığorta etməkdən çəkinir. Konkret olaraq, bugünədək baş vermiş yanğın hadisələri ilə bağlı deyə bilərəm ki, ya sənədləri tam şəkildə qaydasında deyil, ya da hər hansı sənəd çatışmazlığı var. Bu qaydalara əməl etsələr şirkətlər onlardan yan qaçmaz. Bir sözlə, sahibkarlar öz işlərinə məsuliyyətlə yanaşmır, gələcəkdə nə olar deyə düşünmür. Hadisə baş verəndə də sığorta şirkətlərini ittiham edir".
Günel CƏLİLOVA
