Nizami Hüseynov: "157 məktəbdə prioritet qaydanın tətbiqi valideynlərin işini çətinləşdirəcək"
Bu il I siniflərə qəbulla bağlı bir sıra yeniliklərin tətbiqi nəzərdə tutulub. Bunu Məktəbəqədər və Ümumi Təhsil üzrə Dövlət Agentliyinin direktoru Eşqi Bağırov hesabat tədbirində deyib. Onun sözlərinə görə, birinci sinfə qəbulda "ərazi yoxlanışı" tətbiq ediləcək.
Maraqlıdır, "ərazi yoxlanışı" tətbiq edilməsi vətəndaşlara necə təsir edəcək? Yeniliyin nə kimi müsbət və mənfi tərəfləri var?
"Tətbiq ediləcək yeni qayda yaşadığı ünvanda qeydiyyatda olmayanlar üçün də narahatedici durum olacaq"
Təhsil eksperti Nizami Hüseynov "Bakı-Xəbər"ə şərhində bildirdi ki, 157 məktəbdə prioritet qaydanın tətbiqi valideynlərin işini çətinləşdirəcək: "Danılmaz faktdır ki, birinci sinfə qəbul prosesində valideynin məktəb seçimi zamanı diqqət etdiyi məqam iş yeri ilə məktəb arasındakı məsafədir. Söhbət 6 yaşlı uşaqdan gedir. Onu məktəbə aparıb-gətirmək lazımdır. İşləyən valideynlər daha çox iş yerinə yaxın məsafədə olan təhsil ocağına üstünlük verir. Tətbiq ediləcək yeni qayda bu tip valideynlərin işini çətinə salacaq. Həmçinin, yaşadığı ünvanda qeydiyyatda olmayanlar üçün də narahatedici durum olacaq. Bu gün Bakı və Abşeronda kifayət qədər insan var ki, qeydiyyatsız yaşayır. Elm və Təhsil Nazirliyi öz evi olan, amma kupçasız evlərdə yaşayanların həmin ərazidə yaşadığını kommunal qurumlardan əldə edilən məlumatlarla dəqiqləşdirə bilir. Ancaq kirayədə yaşayan ailələrin uşaqlarının taleyi maraqlıdır. Bu məsələ nəzarətə götürülməlidir".
Həmsöhbətimiz onu da əlavə etdi ki, birinci sinfə qəbulun elektron yolla aparılması bir sıra problemləri aradan qaldırıb. Ancaq ərazi üzrə məktəb seçimində valideynlər hələ də çətinliklə üzləşir: "Bəzən ərazi baxımından məktəblərdə siniflər tez dolduğundan valideynlər çıxılmaz vəziyyətdə qalır. Təbii ki, şagird üçün ən yaxşı məktəb onun evinə yaxın olan məktəbdir. Ərazi üzrə qəbulun aparılması məlum problemi həll edəcək".
Günel CƏLİLOVA
