Azərbaycan Respublikası Elm və Təhsil Nazirliyinin Dendrologiya İnstitutun əməkdaşları narazıdırlar. Bu barədə sosial mediada məlumat yayılıb.
Qeyd edilir ki, “Dendrologiya Bağı” publik hüquqi şəxs statusunu aldıqdan sonra bir sıra problemlə üzləşiblər: “Ərazidə təmir-tikinti adı ilə institutun bütün elmi-təşkilati və təcrübə-tədqiqat bazaları tamamilə dağıdılıb və talan edilib. Təmir işlərini aparanlar institutun elmi laboratoriyalarının bazasında olan tədqiqat avadanlıqlarının əlimizdən alınacağına dair hədə-qorxular irəli sürülür. Avadanlıqlar əlimizdən alınırsa, biz necə tədqiqat işləri apara bilərik? Vəziyyət o yerə gəlib çatıb ki, institutda illər boyu elmi fəaliyyətlə məşğul olan görkəmli elmi əməkdaşlar təhdid edilir. Bütün elmi tədqiqat avadanlıqlarının əlimizdən alınacağı, institutu bağlatdıracaqları ilə bağlı məlumatlar verilir”.
Qeyd edək ki, ötən il institut Elm və Təhsil Nazirliyinin tabeliyinə verilib. Daha sonra Azərbaycan Respublikasının Nazirlər Kabinetinin 7 yanvar 2022-ci il tarixli 5 nömrəli qərarına əsasən “Dendrologiya Bağı” publik hüquqi şəxs statusu alıb.
Onu da bildirək ki, bir neçə gün əvvəl Bakı Şəhər İcra Hakimiyyətinin (BŞİH) Mərkəzi Nəbatat Bağında aparılan təmir işləri nəticəsində Botanika İnstitutunun yerləşdiyi binanın söküləcəyi bildirilmişdi. Əməkdaşları narahatdırlar ki, illərlə qurudulub saxlanılan herbari fondu məhv olacaq.
Dendrologiya Bağı: “Dendrologiya İnstitutu nazirliyin müvafiq qərarına əsasən yerləşdirmə prosesi başa çatana kimi Dendrologiya Bağının ərazisində öz fəaliyyətini davam etdirə bilər”
Dendrologiya bağı Publik hüquqi şəxsin idarə heyətindən “Bakı-Xəbər”ə bildirildi ki, Nazirlər Kabinetinin müvafiq qərarına əsasən Dendrologiya bağı publik hüquqi şəxs yaradılıb. Mərdəkan qəsəbəsində yerləşən ərazi və əmlak olaraq Dendrologiya Bağı publik hüquqi şəxsə verilib. Elm və Təhsil Nazirliyinin Dendrologiya İnstitutu nazirliyin müvafiq qərarına əsasən yerləşdirmə prosesi başa çatana kimi Dendrologiya Bağının ərazisində öz fəaliyyətini davam etdirə bilər. Bu hal müvəqqətidir”.
Elm və Təhsil Nazirliyi: “Dendrologiya İnstitutuna yeni ərazinin ayrılması nazirlik tərəfindən hazırda müzakirə olunur”
Məsələ ilə bağlı Elm və Təhsil Nazirliyindən bildirildi ki, mövzu nəzarətdədir: “Dendrologiya İnstitutunun hüquqi statusuna edilən müvafiq dəyişiklikdən sonra qurumun bütün əmədaşlarının əməkhaqqıları vaxtında ödənilir. Dendrologiya İnstitutuna yeni ərazinin ayrılması Nazirlik tərəfindən hazırda müzakirə olunur və yaxın vaxtda problem həllini tapacaq".
Telman Zeynalov: “Yəqin Dendrologiya İnstitutu ya başqa əraziyə köçürüləcək, və ya fəaliyyətini dayandıracaq”
Ekoloq Telman Zeynalov qeyd etdi ki, son zamanlar Dendrologiya İnstitutu ilə bağı xoşagəlməz məlumatlar yayılır. İnstitut publik hüquqi şəxs olduqdan sonra oranın fəaliyyəti sual altına düşüb: “Yəqin Dendrologiya institutu ya başqa əraziyə köçürüləcək və ya fəaliyyətini dayandıracaq. Ancaq orda çalışan şəxslərin əməyini, tədqiqatlarını nəzərə almaq lazımdır. Çünki onlar orda illərdir təcrübə aparır, nəsə kəşf edirlər. Alimə, elmə hörmət qoyulmalıdır”.
Qeyd edək ki, zəngin tarixə malik Dendrologiya İnstitutu 1924-1926-ci illərdə akademik Nikolay İvanoviç Vavilovun təşəbbüsü ilə Ümumittifaq Təcrübi Botanika və Yeni Bitkilər İnstitutunun Şərqi Zaqafqaziya filialının tərkibində yaradılıb.
Günel CƏLİLOVA
