İslami hədislərə əsasən Ramazan ayının 19, 21 və 23-ü gecələri Qədr gecələridir. Bu üç gecənin birində müqəddəs Qurani-Kərim nazil olub. Xalq arasında Qədr gecələrini “əhya gecələri” də adlandırırlar.
Həmin günlər gecə yatmayıb ibadət, dua edib, savab işlər görməklə keçirmək əsas şərtdir. Ancaq Azərbaycanda fəaliyyət göstərən bəzi axund və mollarlar Qədr gecəsində insanları başına yığıb mərsiyə deyir, ağlaşma məclisləri qurur.
Sosial şəbəkələrdə yayılan bu tip görüntülər ictimaiyyətdə ciddi müzakirə doğurub. Qeyd edilir ki, orucluğun mərsiyəyə dəxli yoxdur. Ramazan bayram ayı olduğu üçün mərsiyə, matəm və yas məclisləri qurmaq İslamda buyurulmayıb.
Tural İrfan: “Qədr gecəsində mərsiyə və Quranı başa qoymaq İran agentlərinin ölkəmizə gətirdiyi xurafatlardır”
Ilahiyyatçı Tural İrfan bildirdi ki, Qədr gecəsində mərsiyə və Quranı başa qoymaq İran agentlərinin ölkəmizə gətirdiyi xurafatlardır: “Məqsəd də başqa türk müsəlmanlardan arada fərq və nifaq yaratmaqdır. Çünki İran daim sünni-şiə arasında nifrət yaratmağa cəhd edir. Azərbaycan xalqını parçalamaq, tolerantlığı pozmaq üçün özündən qondarma ayinlər uydurub ölkəmizdə yayırlar.
Məlumdur ki, Qədr gecəsi Quranın endiyi gecədir. Bu gecə ancaq ibadət etmək, Allahla rabitədə olmaq lazımdır. İslam dinində ağlaşma məclisi, mərsiyə oxumaq yoxdur. Bu, farsların qədim dinlərinə aid işlərdir ki, bizə də onlardan keçib”.
Ekspert bildirdi ki, İran İslam dininin ancaq matəmdən ibarət olduğunu təbliğ edir: “Uzun müddət bizim məscidlər də İranda təhsil alanların təsirində olduğu üçün bu cür xurafatlar yayılıb. Qədr gecəsində normal şəkildə dua etmək lazımdır, vəssalam. O gecənin xüsusi bir namazı, ibadət növü də yoxdur”.
Cəmşid Əliyev: “Bəzi məscidlərdə axund və ya mollalar mərsiyə deməklə məscidə gələnlərin bu gecə ilə bağlı düşüncələrini dəyişdirməyə çalışır”
Ilahiyyatçı Cəmşid Əliyev bildirdi ki, Qədr gecəsinin çox dərin fəlsəfəsi var. Bu gecə insanın illik bəlalarının ondan uzaqlaşmasını təmin edən bir gecədir: “Bu gecə insanlar yatmayıb dualar, ibadət etməlidirlər. Bəzi məscidlərdə axund və ya mollalar mərsiyyə deməklə, məscidə gələnlərin bu gecə ilə bağlı düşüncələrini dəyişdirir. Irana bağlı olan dindarlar Ramazan ayını, Qədr gecəsini ümumiyyətlə islamı matəm kimi qəbul edir. Onlar üçün ibadət etmək, dua oxumaq yanlışdır, yalnız mərsiyyə deyib, ağlaşma qurmaqla öz işlərini bitmiş sayırlar.
Onu da deyim ki, İran mollaları Qədr gecəsində Quranı açıb başlarına qoyurlar. Bunun dinlə heç bir əlaqəsi yoxdur. O müqəddəs kitabı başın üzərinə qoymaq ilk növbədə onu göndərənə qarşı hörmətsizlik əlamətidir”.
Günel CƏLİLOVA
