Son illər xarici ölkələrdə yayılan yoluxucu xəstəliklərin bizim üçün də ciddi təhlükələr yaratdığı məlumdur. Yayılan xəstəliklər əsasən qrip mənşəli xəstəliklərdir ki, bundan da insanlar ciddi əndişə keçirir. “Quş qripi”, “Donuz qripi”, “Covid-19”, “Meymun çiçəyi” kimi viruslar Azərbaycandan da yan keçməyib. Bildirək ki, dünyada yayılması ehtimal edilən virus mənşəli xəstəliklər barədə əvvəlcə proqnozlar verilir, sonra isə bu xəstəliklərin yayıldığının şahidi oluruq.
Xarici media yeni yolxucu xəstəliyin yayılacağı barədə məlumat yayıb. Sportkp.ru-nun yaydığı məlumata görə, 2023-cü ildə Avropada yeni təhlükəli xəstəlik yaranacaq və “xəstə insanlar bir həftədən çox yaşaya bilməyəcəklər”.
Sözügedən xəstəliklə bağlı proqnozda deyilir ki, 2023-cü ildə Avropada Afrikadan gətiriləcək yeni təhlükəli xəstəlik yaranacaq. Orada bu xəstəliyə “kunu” deyirlər, onun törədicisi “qan qurdları”dır.
Proqnozlara görə, xəstə bir həftədən çox yaşaya bilməyəcək. Onların daxili orqanları parçalanacaq, bu yüksək temperaturla müşayiət olunacaq.
Məlumatda qeyd edilir ki, bu xəstəliyin proqnozu “xurma yarpağı”ndakı yazı vasitəsilə verilib.
Avropadan yayılan yeni qorxulu xəstəlik bizi də hədələyir?..
“Bu cür informasiyalar dünyanın xəstəliklərə nəzarət və profilaktika mərkəzələri, mötəbər elmi qurumlar tərəfindən qəbul edilmir”
Professor Adil Qeybulla “Bakı-Xəbər”ə bildirdi ki, bu, bir proqnozdur və elm tərəfindən təsdiq edilməyib. “Ümumiyyətlə, bu informasiya proqnoz xarakterlidir və bu elmi proqnoz deyil. Buna görə də, onun haqqında şərh vermək düzgün olmazdı. Əlbəttə, mutasiya edən virusların, o cümlədən də qripin pandemiyası həmişə gözlənilir, amma bunun tarixini konkret olaraq deyə bilmərik. Elmi proqnozlar birbaşa deyir ki, istənilən bir mutasiya etmiş virus insanda yayıla, zamanında pandemiya törədə bilər. Xüsusilə də yoluxucu viruslar, onlar nəfəs yolları ilə yoluxur və sair. Bu baxımdan da, hesab edirəm ki, sizin qeyd etdiyiniz proqnoza şərh vermək düzgün olmazdı.
Ona görə ki, Nostradamusun praqnozu, eləcə də “xurma yarpağı”nda yazılan bu proqnoz əslində elmi proqnoz deyil. Əslində, bu cür informasiyalar dünyanın xəstəliklərə nəzarət və profilaktika mərkəzləri, mötəbər elmi qurumlar tərəfindən qəbul edilmir” .
A.Qeybulla əlavə etdi ki, bu cür proqnozların verdildiyi dövrün və onun müəllifinin də gerçəkliyi şübhə doğurur, bəlkə də heç bu xəstəliyi proqnoz edən olmayıb, sadəcə bunu dövriyəyə gətirib yayırlar. A.Qeybullanın sözlərinə görə, elmi əsası olmayan informasiyalara ciddi yanaşmaq olmaz.
İradə SARIYEVA
