Bakıda istifadədə olan yaşayış binasının damında əlavə mərtəbə tikilir. Layihədə 19 mərtəbəlidir, amma indi 20-ci mərtəbə də tikilir. Bu iddia ilə Bakıda çoxmərtəbəli binalardan birinin sakinləri çıxış edib.
Məlumat üçün bildirək ki, ''Main" MTK-nın 2012-ci ildə inşasına başladığı və 2015-ci ildə təhvil verdiyi bina Yasamal rayonunda, Bakı dairəvi yolunun kənarında yerləşir. Sakinlər bildirir ki, şirkət 80-dən çox ailənin yaşadığı binanın damını satıb və orada qanunsuz tikinti işləri aparılır.
Sosial şəbəkədə yayılan görüntülərdən də məlum olur ki, damda söküntü işləri aparılıb və çıxan tullantılar da qalaq-qalaq yığılıb.
Maraqlıdır, layihə 19 mərtəbəli olduğu halda əlavə mərtəbənin tikintisi nə dərəcədə düzgündür? Belə olan halda həmin binanın bünövrəsi, dayaqları zəifləmir?
“Binaya layihədə nəzərdə tutulduğundan əlavə mərtəbə artırılsa, bu düzgün deyil, əlavə tikinti işlərinin aparılması binanın bünövrəsinə, ağırlığına problem yaradır”
Təhlükəsizlik sahəsi üzrə ekspert Zaur Qasımov bildirdi ki, bina hansısa layihə üzərində tikilib yekunlaşıbsa, o layihəyə sonradan dəyişiklik etmək olmaz. Lakin layihədə binanın 19 mərtəbədən ibarət olması nəzərdə tutulubla, bunun üçün müvafiq sərəncam alınıbsa və bina 15-16 mərtəbədən ibarətdirsə, bu halda sonradan mərtəbə sayını artırmaq olar. Lakin bu zaman da bəzi nüanslara diqqət yetirmək lazımdır: “Aidiyyatı orqanlar tərəfindən binaya baxış keçirilməlidir. Binanın bünövrəsinin, karkaslarının neçə mərtəbəyə uyğun gəldiyi yoxlanılmalıdır. Bundan sonra binada mərtəbə sayını artırmağa zərurət yaranarsa, artırmaq olar. Yəni bunun üçün ciddi əsaslar olmalıdır. Yox əgər binaya layihədə nəzərdə tutulduğundan əlavə mərtəbə artırılırsa, bu düzgün deyil. Əlavə tikinti işlərinin aparılması binanın bünövrəsinə, ağırlığına problem yaradır. Bundan əlavə, orada yaşayan sakinlər üçün də narahatlığa səbəb olur. Orada yaşayan sakinlərə mülkiyyət hüququ verilibsə, onların icazəsi olmadan binada heç bir tikinti işi aparıla bilməz. Sakinlər istəsələr, dərhal ərazidə tikintini dayandıra bilərlər. Çünki cari tikinti binanın gələcəyi üçün də təhlükəli ola bilər. Həmçinin, bu vəziyyət binaya giriş-çıxış zamanı da müəyyən təhlükə yarada bilər”.
Həmsöhbətimizin sözlərinə görə, binalar tikilərkən müəyyən norma daxilində tikilir. Sonradan artırmalar isə əlavə yükdür. Bu hal həm ümumi görünüşə xələl gətirir, həm də binanın təhlükəsizliyi sual altında qalır. Yaşayış binasına əlavə dəyişiklik edilərsə, bunun üçün müvafiq qurumların rəyi olmalıdır.
Günel CƏLİLOVA
