Elməddin Anar oğlu Məmmədov İkinci Qarabağ müharibəsində Vətən, torpaq uğrunda şüurlu surətdə canından keçərək şəhidlik zirvəsinə ucaldı.
Bu şərəflə də ömrünün 20-ci ilində əbədi olaraq özünə ürəklərdə yuva qurdu. İndi təkcə doğulub boya-başa çatdığı Lənkəran rayonunun Velədi kəndində deyil, bütün Azərbaycan xalqı öz qəhrəman oğlu ilə fəxr edir. Qərinələr keçəcək, gələcək nəsillər də Elməddinin Vətən sevgisindən nümunə götürəcək.
Qəlbi Vətənə sevdalanan , onun torpağını, daşını canından əziz bilən Elməddin Məmmədov orta məktəbi bitirib ordu sıralarına erməni dığalardan qisas almaq məqsədilə yollanır. Cəbhə bölgəsinə düşən Elməddin doğma Azərbaycana qeyrətlə, vicdanla xidmət edir. Vətənə qəlbində bəslədiyi məhəbbət hissi ona həmişə uğur gətirir. Təlimlər zamanı göstərdiyi əla döyüşçü keyfiyyətləri bütün əsgərlərə nümunə olur. And içir ki, lazımı məqamda hər qarış torpaq uğrunda döyüş meydanında erməni faşistlərinə qarşı amansız olacaqdır. Həmişə də əsgər yoldaşlarına dedikləri belə olur:- Xalqımız Vətəninə, torpağına bağlı qəhrəmanlar yetişdirib. İndi düşmən qarşısında aciz qalmaq bizə yaraşmır. Qarabağımız öz mərd oğullarının yolunu gözləyir. Şəhid qanı axmayan torpaq Vətən olmaz...
Günlər ötdükcə Elməddinin qəlbində yağı düşmənə intiqam, qisas almaq alovu get-gedə güclənir. 2020-ci il sentyabrın 27-də Azərbaycanın, eləcə dünyanın hərb tarixinə qızıl hərflərlə yazılan İkinci Qarabağ müharibəsi başlanan kimi Elməddin torpaq uğrunda gözünü qırpmadan, ölümün gözünə dik baxa-baxa döyüş meydanına girir və polad sinəsini irəli verib düşmən üstünə qartal tək şığıyır. Füzulunun azadlığı uğrunda sözün əsl mənasında tarix yazır. Bir-birindən ağır müharibə meydanlarında döyüş igidliyinə görə fərqlənir. Son döyüş yerində də düşmənin xeyli sayda canlı qüvvəsini məhv edir, əks tərəfindən atılan artilleriya atəşi nəticəsində şəhid olur.
Bəli, Vətənə məhəbbətdən yaranan bu ölüm Elməddin Məmmədova ürəklərdə əzəmətli abidə ucaltmaqla, həm də ölkə başçısının verdiyi müvafiq sərəncamları əsasında "Vətən uğrunda", Cəbrayılın və Füzulinin azadlığına görə, "Cəsur döyüşçü" medallarına layiq görülür. İkinci tərəfdən lənkəranlılar hər an öz qəhrəman oğlunu ehtiramla xatırlayır, onun adına layiqli işlər görürlər. Burada onun adına küçə, xatirə bulağı vardır.
Zəfər ORUCOĞLU, Azərbaycan Jurnalistlər Birliyinin üzvü
