Ölkə ərazisində avtomobillərin sayı getdikcə artır. Bu da özü ilə birlikdə bəzi məsələləri də gündəmə gətirir. Bakı şəhəri əhalinin ən çox məskunlaşdığı yaşayış məntəqəsidir. Son illər maşınların çoxalması paytaxt ərazisindəki yollarda sıxlığa səbəb olur. Əsas problemlərdən biri də piyadaların hərəkəti üçün keçidlərlə bağlıdır.
Bəzən elə ərazilərə nizamlanmayan piyada keçidi qoyulur ki, sərnişinlər ondan istifadə edə bilmir, ya da etmir. Bəzən isə lazım olan ərazidə piyada keçidləri qoyulmur və ya keçiddən istifadə edən sərnişinlərin sayı nəzərə alınmır. Buna görə də yollarda sıxlıq və qəza halları qaçılmaz olur.
Belə bir vəziyyət dördüncü mikrorayon və Sabunçu rayonu, Bakıxanov qəsəbəsi ərazisində müşahidə olunur. Bu ərazilərdə piyada keçidləri tam avtobus dayanacaqlarının yaxınlığında olduğu üçün piyadalar nə dayanacağa yaxınlaşa bilir, nə də keçiddən istifadə edir.
“Dayanacaq quraşdırılanda mütləq şəkildə yol infrastrukturu və əhalinin sıxlığı nəzərə alınmalıdır”
Sosial sahə üzrə ekspert Elxan Əliyev qeyd etdi ki, dayanacaq quraşdırılanda mütləq şəkildə yol infrastrukturu və əhalinin sıxlığı nəzərə alınmalıdır: "Əhali sıx ola bilər, amma yol imkan vermirsə, üzbəüz yox, bir az uzaq yerdə dayanacaq quraşdırıla bilər. Hətta elə yerlər var ki, orada quraşdırılan dayanacaqlar standartlara cavab vermir. Təhlükəsizlik baxımından avtobus dayanacaqları piyada keçidindən 30 metr aralıda olmalıdır. Dayanacağın piyada keçidinin yanında olması sərnişinlərin həyatını təhlükəyə salır. Piyadaların avtobusdan düşüb nəqliyyat vasitəsinin qarşısından yolu keçmələri birbaşa qəza şəraiti yaradır. Statistika onu göstərir ki, ən çox piyadavurma halları belə hissələrdə olur”.
Ekspert onu da əlavə etdi ki, bir sıra ərazilər var, ilk baxışdan adama elə gəlir ki, orada piyada zolaqları olmalıdır. Amma nəqliyyat vasitələrinin sıxlığı o qədər yüksəkdir ki, həmin ərazilərdə piyada zolağının quraşdırılması yol hərəkətində əlavə problemlərə gətirib çıxara bilər. Bəzi ərazilərdə isə mövcud olan piyada keçidləri ləğv edilir, bunu həmin ərazilərdə piyadaların azlığı ilə əsaslandırırlar. Ancaq bu ərazilərin sakinləri o keçidlərə öyrəşdiyi, digər keçidlər uzaq olduğu üçün ləğv olunan keçidin yerindən keçirlər: “Dayanacaq quraşdırılmazdan öncə həmin ərazidə geniş təhlil aparılmalıdır”.
Günel CƏLİLOVA
