Bakıda inşa edilən yeni yaşayış binasında liftin şaxtası çöküb. Bu barədə məlumat sosial şəbəkədə paylaşılıb. Qeyd edilir ki, hadisə paytaxtın Nəsimi rayonu, Cavadxan küçəsində inşa edilən yaşayış binalarından birində baş verib.
Sakinlərin dediyinə görə, “Memar Əcəmi” metro stansiyasının yaxınlığında yeni inşa edilmiş yaşayış binasından mənzil alan sakinlər evlərinə köçməyə qorxurlar. Belə ki, binanın lift üçün nəzərdə tutulmuş qovşağı çöküb və yarasız hala düşüb.
Qeyd edək ki, məsələ ilə bağlı Fövqəladə Hallar Nazirliyinin Mətbuat Xidmətinin yaydığı məlumatda qeyd edilir ki, FHN-in Tikintidə Təhlükəsizliyə Nəzarət Dövlət Agentliyi tərəfindən qeyd olunan binada tikinti işlərinə icazə sənədi olmadan başlanıldığı müəyyən edilib: “Qurum tikinti işlərinin dayandırılması barədə qərar qəbul edib. Bu barədə aidiyyəti dövlət qurumlarına mütəmadi olaraq məktublar ünvanlanıb. Eyni zamanda tikintini aparan subyekt barəsində İnzibati Xətalar Məcəlləsinin tələbinə uyğun olaraq inzibati protokol tərtib edilib”.
Onu da bildirək ki, zamanla yeni tikili binalarda liftlərlə bağlı problem yaşanır. Dəfələrlə mətbuatda bu haqda məlumatlar yayılıb. Bəs görəsən yeni tikililərdə liftlərin texniki təhlükəsizliyinə kim məsuliyyət daşıyır? Liftlərə texniki xidmət necə təşkil olunmalıdır ki, belə hadisələr təkrarlanmasın?
Ramil Osmanlı: “Liftin hansısa detalında ehtiyat hissəsi yararsızdırsa istismar müddəti başa çatıbsa dəyişdirilməlidir, bəzən…”
Əmlak məsələləri üzrə ekspert Ramil Osmanlı bildirdi ki, tikinti kooperativi əgər binada idarəçiliyi özü həyata keçirirsə, binadakı liftlərin texniki sazlığına da cavabdehdir. Bu halda MTK müvafiq şirkətlə liftlərə texniki xidmət üçün müqavilə bağlamalıdır: “Liftlərə ən geci rübdə bir dəfə əsaslı baxış keçirilməlidir. Aylıq isə texniki xidmət tərəfindən yoxlanılmalıdır. Liftin hansısa detalında ehtiyat hissəsi yararsızdırsa dəyişdirilməli, istismar müddəti başa çatıbsa dəyişdirilməlidir. Bəzən MTK-lar liftlərin ehtiyat hissələri baha olduğundan detallarını vaxtlı-vaxtında dəyişdirmir. Yaxud da istismar müddəti başa çatan lift baha olduğundan dəyişdirilmir. Bu da qəzalarla nəticələnir. MTK bunu etmirsə sakinlərin hüququ var ki, onu binanın idarəçiliyindən uzaqlaşdırsın. Bəzi yeni yaşayış binalarında liftlərdən istifadə edilsə də, FHN-nin müvafiq qurumu tərəfindən liftlər texniki istismara qəbul edilməyib”.
Vüqar Oruc: “Real problemlə qarşı-qarşıya qalmadan öncə müvafiq dövlət qurumları təcili tədbirlər görməlidir”
Tikinti Eksperti Vüqar Oruc bildirdi ki, tikintiyə başlamazdan öncə planlama, proyektin hazırlanması və tikintinin aparılacağı ərazinin geoloji araşdırılması aparılır. Hər hansı problem yoxdursa, tikintiyə icazə verilir. Ümumiyyətlə bu prosesin əvvəlindən sonuna qədər FHN yanında Tikinti Təhlükəsizliyinə Nəzarət Dövlət Agentliyinin nəzarəti olmalıdır: “Bir binanın istismara qəbulu üçün təqribən 26 distansiya razılıq verməlidir. Təəssüf ki, bir çox hallarda Bakı şəhərində sözügedən ardıcıllıq gözlənilmir və müxtəlif vasitələrlə tikintiyə razılıq əldə edilir. Hətta bu gün yenidən yoxlamalara başlansa, binaların təbii fəlakətə davamlı olub-olmamasında neqativ nəticələrlə qarşılaşacağıq. Ona görə də müvafiq strukturlar məsələni yenidən nəzarətə götürməlidir. Düzdür, Türkiyədə baş verən zəlzələdən sonra bəzi qurumlar eyni hadisənin Azərbaycanda yaşanmaması üçün tikintilərin keyfiyyətini araşdırmaq məqsədi ilə komissiya yaradıb.
Qardaş Türkiyədə bunlara göz yumulduğu üçün fəlakət bir neçə dəfə artıq baş verdi. Bizim ölkəmizdə təbii fəlakətlər üçün təhlükəli sayılan bir regionda yerləşir. Hətta belə hadisələrin bizdə də olması proqnozlaşdırılır. Ona görə də real problemlə qarşı-qarşıya qalmadan öncə müvafiq dövlət qurumları təcili tədbirlər görməlidir".
Günel CƏLİLOVA
