BNA marşrut avtobuslarının gecikməsi barədə məlumat yaymaqla işini bitmiş sayır...

Bakıda hər gün marşrut xətləri üzrə gecikmələr az qala bir ənənəyə çevrilib. Elə bir istiqamət yoxdur ki, ora işləyən avtobuslar gecikmə ilə hərəkət etməsin. Müşahidələr göstərir ki, günü-gündən müxtəlif marşrut xətləri üzrə hərəkət edən  avtobusların sayı azalır, nəticədə də gecikmələr baş verir, sərnişinlər bəzən 40-45 dəqiqə, 1 saat dayanacaqda dayanıb avtobus gözləyirlər.

Qeyd etdiyimiz kimi, avtobuslar arasında bəzən interval 1 saata yaxın olur. Avtobusların gecikməsi ilə bağlı hər gün BNA məlumat yayır ki, 100-dən çox daşıyıcı gecikmə ilə hərəkət edir. 5 dekabr tarixində 165 avtobus, bu gün isə (6 dekabr) 138 daşıyıcı gecikmə ilə hərəkət edir. Qeyd etdiyimiz kimi, bu hal hər gün yaşanır.  

Ekspertlər bildirir ki, avtobusların gecikmə ilə hərəkət etməsinin səbəbi daşıyıcıların xəttə az sayda buraxılması ilə bağlıdır. Yollarda müşahidə olunan nəqliyyat sıxlığı da avtobusların gecikməsinə səbəb olur.

• “Yüz minlərlə Bakı sakininin ictimai nəqliyyata normal əlçatımlığı yoxdur”

Sosial sahə üzrə ekspert Elxan Əliyev qeyd etdi ki, bu sahədə çox ciddi problemlər var: “Bu gecikmələr artıq intensiv hal almağa başlayıb. Bakı Nəqliyyat Agentliyi (BNA) yarıtmaz fəaliyyətini ortaya qoyub və ortaya qoymaqdadır da. Onun nəticəsidir ki, sərnişinlər hər gün yollarda qalır, problemlə üzləşirlər. Əslində nə baş verir? Təsəvvür edin ki, cənab Prezidentin sərəncamı ilə milyonlarla vəsait ayrılıb və ölkəyə 2015-ci ildən bu yana 715 ədəd “BakuBus”da indi idarə olunan IVECO və GVMC markalı avtobus gətirilib. Bir neçə ay əvvəl Hesablama Palatası üzə çıxardı ki, bu avtobusların 300-ü  hazırda heç bir işə yaramır. Çünki Bakı Nəqliyyat Agentliyi həmin o 300 avtobusu söküb bərbad hala salıb və başqa avtobuslar üçün ehtiyat hissələri kimi istifadə edib”.

Həmsöhbətimiz onu da əlavə etdi ki, yüz minlərlə Bakı sakininin ictimai nəqliyyata normal əlçatımlığı yoxdur. Digər tərəfdən də rəqəmlər açıqlanır ki, qarajda xəttə buraxılmayan avtobuslar var. Yaxud həmin avtobuslar baha qiymətə alınsa da, sonradan yaranmış texniki problemlər aradan qaldırılmayıb.  Bakıya indi mövcud olandan daha çox avtobus lazımdır. Onları özəl sahibkarlara müəyyən şərtlərlə vermək lazımdır”.

Ekspert hesab edir ki, avtobusların gecikməsinin bir səbəbi də qənaətlə bağlıdır. Belə ki, bəzi xətt sahibləri avtobusları vaxtında və geniş şəkildə xəttə buraxmır. Çünki gediş haqqının artırılması ilə bağlı dəfələrlə müraciət edilsə də heç bir faydası olmayıb. Buna görə də qənaət etməyə çalışırlar. Nəticədə belə vəziyyət yaranır. Avtobuslar gecikmir, birmənalı şəkildə qəbul etmək lazmdır ki, avtobuslar yoxdur.

Günel CƏLİLOVA