Hakim Yeni Azərbaycan Partiyasının klassik üzvlərindən olan bəzi şəxslərin son zamanlar partiyanın ünvanına sərt tənqidlər yağdırdıqlarının şahidi oluruq. İstənilən partiyanın daxilində belə müzakirələrin getməsi, tənqidi fikirlərin səslənməsini normal qarşılamaq olar. Ancaq bütün bu müzakirələrin həm də bir siyasi əxlaq səviyyəsində aparılması zərurəti ortaya çıxmış olur. Təbii ki, YAP-ın ünvanına səslənən ittihamları partiya funksionerləri cavablandırmalıdırlar. Ancaq bizə maraqlı gələn məsələnin başqa tərəfidir.
Bu günlərdə YAP-ın yaradıcılarından olan sabiq nazir Əli Nağıyev verdiyi müsahibədə hakim partiyanın ünvanına tənqidlə yanaşı, təhqiredici fikirlər də səsləndirib. Məsələn, o, YAP-ın 700 minlik üzvünün olması ilə ölkədəki inəklərin sayı arasında uyğunsuz, siyasi etikaya uyğun olmayan bir müqayisə aparıb. Belə olan təqdirdə adama sual verərlər ki, bu şəkildə aşağıladığın partiyanın üzvlüyündə niyə qalırsan? Araşdırdıqda məlum olur ki, son zamanlar hakim partiyanı tənqid edən klassik üzvlərin hamısı hələ də YAP-ın sıralarındadır. Ən azı, siyasi etikaya görə fəaliyyətini bəyənmədiyin partiyadan istefa verməlisən. Maraqlıdır ki, son dövrlər bu istiqamətdə aktivləşən Eldar Sabiroğlu, Maksim Musayev, Rizvan Cəbiyev belə bir addımı atmaq istəmirlər. Qeyd edək ki, Əli Nağıyevin YAP-ın ünvanına səsləndirdiyi təhqirlər cavabsız qalmayıb. Yeni Azərbaycan Partiyasının üzvü olan deputat Aydın Hüseynov sabiq əmək və əhalinin sosial müdafiəsi naziri, Azərbaycanın Belarusdakı keçmiş səfiri Əli Nağıyevin YAP və ölkə başçısı ətrafında olan bəzi insanlar haqqında təhqiramiz ifadələr işlətməsinə cavab verib. Aydın Hüseynov açıqlamasında bundan təəssüfləndiyini bildirib: “Bu gün kimsə Əli Nağıyevin YAP-ın təşkilatlanmasındakı rolunu danmır. Elə ulu öndər Heydər Əliyev də onun bu əməyinə dəyər verib, etimad göstərərək yüksək vəzifələrə təyin etdi. Hətta Əli Nağıyev özü dəfələrlə bəyan edib ki, məni bu yüksək məqamlara çatdıran məhz Heydər Əliyev oldu. Amma indi Əli Nağıyev tamamilə fərqli mövqe sərgiləyir. Mükafatın əvəzi budurmu? Göstərilən etimadın müqabilində YAP üzvləri haqqında xoşagəlməyən ifadələr işlədəsən?! Bu onu deməyə əsas verir ki, Əli Nağıyevin YAP fəaliyyyətindəki məqsədi heç də partiyanın ali məramına xidmət etmək yox, öz şəxsi maraqlarını təmin etmək olub”.
Deputat deyib ki, indi YAP cəmiyyətdə böyük nüfuza malik siyasi təşkilatdır və burada cəmiyyətin bütün təbəqləri təmsil olunub: "Elə onların qınağı Əli Nağıyev üçün yetərlidir. 700 min YAP üzvü haqqında səsləndirdiyi fikir, sadəcə, partiyada qəzəb hissi doğurur və bu hərəkətinə görə onu qınayırıq".
Yeni Azərbaycan Partiyası Siyasi Şurasının digər üzvü, Milli Məclisin Müdafiə, təhlükəsizlik və korrupsiya ilə mübarizə komitəsinin sədr müavini Aydın Mirzəzadə sabiq əmək və əhalinin sosial müdafiəsi naziri Ə.Nağıyevin fikirlərinə münasibət bildirərkən deyib ki, YAP cəmiyyətdə fəaliyyəti, dövlətə xidməti ilə tanınan bütün üzvlərinə həmişə hörmətlə yanaşıb. Bu məsələdə kimin hansı vəzifə daşımasının əhəmiyyəti yoxdur: “Müəyyən mərhələdə partiya sıralarında olan, amma sonradan fəaliyyəti ilə partiyanın adına ləkə gətirən, dövlətçiliyə xidmətdə səhvlərə yol verən insanlara həmişə prinsipial qiymət verilib. Yeni Azərbaycan Partiyasında sədaqətli partiya üzvlərinə, Heydər Əliyev yolunun sədaqətli davamçılarına həmişə böyük hörmət olub, bundan sonra da belə olacaq”.
Bu gün YAP-ı sərt tənqid edən partiyanın klassik üzvlərinin nə istədikləri də bəlli deyil. Çünki onlar ölkə başçısını dəstəklədiklərini bəyan edirlər və eyni zamanda, Prezidentin sədri olduğu partiyanı yeri gələndə təhqir belə etmək kimi cəsarət ortaya qoyurlar. Onların çıxışlarından hiss edilir ki, daha çox vəzifədən çıxarılmaları və hazırda işsiz olduqlarından narahatdırlar. Həmin şəxslərin hər biri vaxtilə yüksək vəzifələrdə olublar. Sonra bəziləri yaşları ilə bağlı, bəziləri isə onlara tapşırılan işin öhdəsindən lazımınca gələ bilmədikləri səbəbindən vəzifələri ilə vidalaşmalı olublar. Bu da normaldır. Məhz bu amilə görə üzvü olduğu partiyanı təhqir belə etməkdən çəkinməmək doğru yol ola bilməz. Çünki dövlət vəzifəsi heç kim üçün əbədi deyil. Hər halda, üzvü olduğu partiyanı təhqir etməkdənsə, onun sıralarından istefa vermək daha hörmətli görünərdi.
Məhəmmədəli QƏRİBLİ
