Əli Əliyev: “Paşinyanın əsas məqsədi Vyana görüşündə üstünlük əldə etməkdir”
Ermənistanın baş naziri Nikol Paşinyan parlamentdə çıxışı zamanı ABŞ-ı tənqid edib. Paşinyanın Vaşinqtonun ünvanına tənqidlər səsləndirməsinə səbəb isə deputatların təzyiqi ilə üzləşməsi olub. Belə ki, “Çiçəklənən Ermənistan” partiyasının üzvü Arman Babacanyan yeni hakimiyyət dövründə Ermənistanın KTMT-də uğursuzluğa düçar olduğunu, Moskva-İrəvan münasibətlərində etimadın zəiflədiyini deyib.
O, həmçinin, Paşinyana irad tutub ki, Rusiyanın təlimatı ilə Suriyaya humanitar missiya göndərməklə Ermənistan hökuməti təkvektorlu Rusiyapərəst xarici siyasət yürüdür və bu fonda İrəvan-Vaşinqton münasibətləri nəinki inkişaf etmir, əksinə, Amulsar mədənindəki problemlə əlaqədar bu münasibətlərin iqtisadi əsasları təhlükə altındadır. Çünki amerikan kapitalı ilə işləyən Amulsar qızıl mədəninin istismarı dayandırılıb və “Lydian International Limited” şirkəti hökuməti xəbərdar edib ki, Ermənistanı beynəlxalq məhkəməyə verəcək.
Babacanyanın sözlərinə görə, Paşinyanın xarici siyasətdə yol verdiyi səhvlərə və qeyri-müəyyənliyə görə Ermənistan həm Rusiya, həm də ABŞ-ın yardımından məhrum ola bilər.
Deputatın bu iradlarına cavabında isə Paşinyan gözlənilmədən ABŞ rəhbərliyini tənqid atəşinə tutub: “ABŞ Ermənistandakı inqilaba, demək olar ki, heç bir reaksiya göstərmədi. Məsələn, mən amerikalı nümayəndələrə dedim ki, onlar praktiki olaraq sıfır reaksiya verdilər. Niyə? Ölkəmizin suverenliyi bizim üçün vacibdir deyəndə “A”məntəqəsindən (Rusiya) asılılığın “B” məntəqəsindən (ABŞ) asılılıqla əvəzlənməsini nəzərdə tutmuruq. Biz bu məsələyə olduqca ciddi yanaşırıq”.
Paşinyanın birdən-birə, məhz danışıqların gərgin fazasında ABŞ-ı tənqid etməsi nə ilə bağlı ola bilər?
Vətəndaş və İnkişaf Partiyasının sədri Əli Əliyev “Bakı-Xəbər”ə açıqlamasında bildirdi ki, Paşinyan bu açıqlamanı təsadüfən verməyib: “Ola bilər ki, parlamentdə belə bir gərgin mənzərə bilərəkdən yaradılıb. Belə qənaətə gəlinsin ki, Paşinyan spontan olaraq bu fikri səsləndirib. Qətiyən belə deyil. Çox mühüm mahiyyət kəsb edən bəyanatdır və Ermənistan üçün lazım olan məqamda verilib. Paşinyan çox gözəl anlayır ki, Dağlıq Qarabağ probleminin əsas fiqurantı Rusiyadır. Vyana görüşü ərəfəsində o, ABŞ-a mənfi mesaj yollamaqla Rusiyanın dəstəyini qazanmaq istəyir. Bununla Paşinyan Rusiyaya pozitiv mesajını göndərmiş olub. Biz də qəbul etməliyik ki, konfliktin açarı ABŞ-dan çox Rusiyanın əlindədir. Paşinyan ABŞ-dan məsafələnib, Rusiyaya yaxınlaşmaqla özünü Qərbin və ABŞ-ın mümkün təzyiqlərindən sığortalayır. ABŞ-ın bu məsələyə operativ reaksiya vermək imkanı olmayacaq. Çünki burada bəzi profilaktik məsələləri həyata keçirmək lazımdır. Paşinyanın əsas məqsədi Vyana görüşündə üstünlük əldə etməkdir. Yəqin ki, görüşdən sonra ABŞ-la problemi də yoluna qoymağı düşünəcək. Paşinyanın bu gedişini daha çox siyası tamaşaya bənzətdim”.
Məhəmmədəli QƏRİBLİ
