Aydın Hüseynov: “… maldarlıq sahəsində də vəziyyət son dərəcə ağırdır, çünki ölkədə mal-qaranın sayı azalmaqda davam edir”
Ermənistanda kənd təsərrüfatı sahəsində vəziyyət son dərəcə ağırdır. Qeyd olunan ölkənin aqrar sektorunda vəziyyətin ağır həddə olmasını Ermənistanın baş naziri Nikol Paşinyan da etiraf edib. O, hakimiyyətə gəldiyi bir il ərzində kənd təsərrüfatında ciddi enişin olduğunu dilə gətirib.
2018-ci ilin yekunları ilə bağlı martın 28-də keçirilən hökumət müşavirəsində o deyib ki, bu geriləmə əsasən ziyanvericilərlə bağlı olub. Paşinyan onu da deyib ki, ziyanvericilərdən əlavə, geriləmənin daha bir səbəbi yanlış planlaşdırma və “kölgə” bağları olub ki, bu faktları hökumət artıq aşkara çıxarıb.
Maraqlıdır, doğrudanmı Ermənistanın kənd təsərrüfatında geriləmənin səbəbi yanlış planlaşdırma və “kölgə” bağlarıdır?
Millət vəkili Aydın Hüseynov “Bakı-Xəbər”ə açıqlamasında qeyd etdi ki, son zamanlar Ermənistanın kənd təsərrüfatı eniş dövrünü yaşayır. Bunun bir neçə səbəbi var. O səbəblərdən biri də aqrar təsərrüfatın yanlış planlaşdırılmasıdır: “Bundan əlavə, Ermənistanda aqrar sahə ilə məşğul olmaq üçün mütəxəssis, demək olar ki, yox dərəcəsindədir. Təbii ki, bu amil də kənd təsərrüfatının geriləməsinə səbəb olur".
Həmsöhbətimizin sözlərinə görə, Ermənistanın maldarlıq sahəsində də vəziyyət son dərəcə ağırdır. Çünki həmin ölkədə mal-qaranın sayı azalmaqda davam edir.
Millət vəkili onu da vurğuladı ki, Ermənistanın tək kənd təsərrüfatında deyil, bütün sahələrində geriləmə var. Bu geriləmə düşmən ölkənin iqtisadiyyatını daha da zəiflədir: “Ermənistan hakimiyyətini təmsil edənlərin nə iqtisadi, nə də siyasi səriştəsi olmadığı üçün, ölkənin aqrar sektoru inkişafdan geri qalır. Məlumdur ki, Nikol Paşinyan hakimiyyətə gəlməzdən öncə xalqa yanlış vədlər vermişdi. Ancaq sonradan əhaliyə məlum oldu ki, Paşinyanın xalqa verdiyi vədlər boş sözlərdən ibarət idi”.
A.Hüseynov qeyd etdi ki, Ermənistan regional layihələrdən kənarda qalır. Xaricdə yaşayan ermənilər tərəfindən ölkəyə göndərilən valyutanın həcmi azalmaqda davam edir. Xaricdən ölkəyə daxil olan valyutanın azalması, istər-istəməz, ölkə iqtisadiyyatının zəifləməsinə səbəb olur. Bütün bu hallar Ermənistan iqtisadiyyatını çökdürəcək.
Günel CƏLİLOVA
