Yeganə Hacıyeva: “Azərbaycan tərəfi heç vaxt gündəliyi olmayan görüşdə iştirak etməz”
Ermənistan parlamentində keçirilən toplantıda Nikol Paşinyan deputat Nair Zöhrabyanın “İlham Əliyevlə Vyandakı görüşünüzün dəqiq gündəliyi varmı” sualına belə cavab verib: "Biz sadəcə olaraq müxtəlif məsələlər ətrafında fikir mübadiləsi aparmalıyıq, hesab edirəm ki, müzakirələr əvvəllər dilə gətirilmiş fikirlər çərçivəsində keçiriləcək. Görüşün gündəliyi ilə bağlı bizim fikirlərimiz olduğu kimi qalır. Mən əvvəlki fikirlərimdə də demişəm ki, ilkin etapda keçirilən görüşlərin konkret gündəliyi olmamalıdır”.
Paşinyanın sözlərinə görə, Xankəndidə Təhlükəsizlik Şurasının birgə iclasında elan edilən danışıqların və müzakirələrin aparıldığı gündəlikdir: "Bu, bütün gələcək danışıqlar prosesi üçün platformadır".
Deputatlardan birinin “Qarabağın danışıqların tərəfi kimi danışıqlar prosesinə cəlb edilməsi məsələsinin də gündəlikdə olduğunu ehtimal etmək olarmı” sualına cavabda Paşinyan təsdiq cavabı verib.
Göründüyü kimi, Paşinyan, faktiki olaraq, Azərbaycan Prezidenti ilə nəzərdə tutulan görüşü pozmaq üçün əlindən gələni edir. Danışıqların və sülh prosesinin ziddinə olan, həqiqət yükündən uzaq bəyantlar verir. Azərbaycan tərəfi dəfələrlə bəyan edib ki, qondarma qurumun danışıqlar prosesində iştirakı qeyri-mümkündür. Həmçinin, biz daim bəyan etmişik ki, substantiv, özündə məna və məzmun ifadə edən görüşlərin tərəfdarıyıq. Təbii ki, bu cür mövqe sərgiləyən ölkə heç vaxt gündəliyi müəyyən olunmayan bir görüşdə iştiraka razılıq verməz. Belə olan halda, Paşinyanın verdiyi ziddiyyətli bəyanatlar nəyə hesablanıb?
Politoloq Yeganə Hacıyeva qəzetimizə bildirdi ki, bu, Paşinyanın əvvəlki davranışlarına sadiq qaldığının bariz nümunəsidir: “Azərbaycan tərəfi hər zaman ən yuxarı səviyyələrdə bəyan edib ki, formal xarakterli danışıqlarda iştirakın tərəfdarı deyil. Ermənistan daim bu danışıqları müxtəlif bəhanələrlə pozub. Paşinyan hakimiyyətə gələndən sonra beynəlxalq birlik ondan əvvəlki sələflərindən fərqli addımlar gözləyirdi. Nəticədə biz gördük ki, özünə demokrat adını qoyan bu adam əvvəlki ölkə rəhbərlərindən də ziddiyyətli davranır. Format dəyişikliyini ortaya atdı, alınmadı. Danışıqlardan bir müddət seçkiyə görə imtina etdi. İndi isə beynəlxalq təzyiqlərə davam gətirə bilməyib danışğa gedir. Anlayır ki, başqa yolu qalmayıb. Amma həm də daxili auditoriyadan qorxduğu üçün, guya İlham Əliyevlə görüşdə heç nəyin müzakirə olunmayacağını deməklə özünü sığortalamaq istəyir. Azərbaycan tərəfi heç vaxt gündəliyi olmayan görüşdə iştirak etməz. Ələlxüsus da əgər orada Paşinyanın dediyi kimi, qondarma qurumun da danışıqlarda tərəf kimi iştirakından söhbət gedəcəksə. Bu, mümkün olmayan məsələdir. Aydın şəkildə görünür ki, Paşinyan bu cür addımları ilə sülh danışıqlarını pozmağa çalışır. Onlar əvvəl nəbzi yoxladılar. XİN müavini səviyyəsində dedilər ki, artıq Dağlıq Qarabağın tərəf kimi tanınmasının vaxtı çatıb. Bunları mühüm görüş ərəfəsində səsləndirdilər ki, Azərbaycan tərəfi psixoloji gərginliyə düşüb, görüşdən imtina etsin. Amma bizim diplomatiyamız çox soyuqqanlı və doğru davranır. Konkret şəkildə mövqeyimizi ortaya qoyub sübut edirik ki, Paşinyan yalan danışır. Biz onu təkzib etsək də, o yenə də görüşdən imtina etmir. Hər halda, Paşinyanın manevrləri üçün halqa çox daralıb. Bununla uzağa gedə bilməyəcək. Sülh istəmirsə, Azərbaycan Ordusu ilə üz-üzə gəlməli olacaq”.
Məhəmmədəli QƏRİBLİ
