Pərviz Heydərov: “… səsləndirdikləri rəqəm əsasında maliyyə köməkliyi…”
Məlum olduğu kimi, martın 26-da Nizami rayonunda yerləşən "Diqlas" ticarət mərkəzi tam şəkildə yanıb. Yanğın nəticəsində bina tamamilə yararsız hala düşüb. Hətta binanın dəmir konstruksiyaları belə, deformasiyaya uğrayıb.
Adıçəkilən ticarət mərkəzində yanğın söndürülsə də, fəsadları hələ uzun müddət qalmaqda davam edəcək. Çünki həmin məkanda obyektləri olan sahibkarlar yanğın nəticəsində dükanlardan salamat mal çıxara bilməyiblər. Nəticədə sahibkarlara maddi ziyan dəyib. Sahibkarlar pərişan haldadırlar. Onlar qeyd edirlər ki, binada ələ gələsi heç bir şey qalmayıb, çünki bütün mallar yanaraq kül olub.
Bu səbəbdən də onlar üzləşdikləri vəziyyətlə bağlı maliyyə yardımı ödənilməsini tələb edirlər.
Ancaq “Diqlas” ticarət mərkəzində sahibkarlıqla məşğul olan şəxslərin obyektləri sığortalanmadığı üçün, onlar sığorta pulu ala bilmirlər. Sığorta şirkərləri qeyd edirlər ki, göstərilən ünvanda dükanı olan sahibkarlar nə dükanı, nə də satışa çıxardıqları malları sığorta etmədikləri üçün, onlara ödəniş verilməyəcək. Belə bir vəziyyətdə çarəsiz halda qalan sahibkarların imdadına Prezident İlham Əliyev yetişdi. Dövlət başçısının tapşırığı ilə "Diqlas" ticarət mərkəzindəki yanğına görə ziyan çəkən sahibkarlara maliyyə yardımı ödəniləcək.
Məlumat üçün bildirək ki, Bakının Nizami rayonu ərazisindəki "Diqlas" ticarət mərkəzində baş vermiş yanğın nəticəsində zərərçəkən sahibkarlarla növbəti görüş keçirilib. Nizami Rayon İcra Hakimiyyətinin Ərazi idarəetmə və yerli özünüidarəetmə orqanları ilə iş şöbəsinin müdiri Firudin Cabbarov “Trend”ə bildirib ki, görüşdə Prezident Administrasiyasının Regional idarəetmə və yerli özünüidarəetmə orqanları ilə iş şöbəsinin müdir müavini Hüseyn Mövsümov, Nizami Rayon İcra Hakimiyyətinin başçısı Arif Qasımov və digər rəsmi şəxslər iştirak ediblər. Onun sözlərinə görə, görüşdə qeyd olunub ki, yanğın hadisəsi ilə əlaqədar Prezident İlham Əliyev tapşırıq verib: "Prezidentin tapşırığı ilə hər bir vətəndaşa dəyən ziyana görə yardım ödəniləcək. Bunun üçün müvafiq komissiya yaradılacaq və icarədarlara dəyən ziyan obyektiv, ədalətli şəkildə hesablanacaq. Yaradılmış komissiyaya zərərçəkən sahibkarlar da daxil olacaq".
Martın 27-də icra başçısı ilə görüşən sahibkarlar yüksək məbləğdə ziyana düşdüklərini bildirmişdilər. Malları yanan sahibkarlardan biri deyir ki, guya onun “1 milyonluq”, başqa birisi isə qeyd edir ki, “500 minlik” malı yanıb. Sahibkarların səsləndirdikləri rəqəm inandırıcı görünmür. Onlar Prezidentin humanizmindən istifadə etmək istəyirlər. İ.Əliyev malları yanan sahibkarlara xoş niyyət göstərib, üzləşdikləri ziyana görə maliyyə yardımı barədə tapşırıq verib. Vəziyyətdən istifadə edənlər isə təxminən 5000-10000 manatlıq ziyanını milyon manatla kompensasiya etmək istəyirlər. Ancaq bu düzgün deyil.
Maraqlıdır, sahibkarların nə qədər zərərlə üzləşdiyi necə müəyyən olunacaq? Hansı mexanizm əsasında sahibkarların zərərinin məbləği tam şəkildə bəlli olacaq?
Məsələ ilə bağlı fikir bildirən iqtisadçı-ekspert Pərviz Heydərov “Bakı-Xəbər”ə açıqlamasında qeyd etdi ki, “Diqlas” ticarət mərkəzində yanğın nəticəsində sahibkarlıqla məşğul olanlar müəyyən məbləğdə ziyanla üzləşiblər. Onların zərərinin kompensasiya olunması üçün Prezident humanist tapşırıq verib: “Məlum məsələ ilə bağlı müşavirə keçirilib. Müşavirədə dövlət orqanlarının rəhbərləri iştirak ediblər. Sahibkarlara dəyən ziyanın hesablanması üçün xüsusi komissiya yaradılacaq. Onu da bildirim ki, zərərin tam şəkildə hesablanması qısa müddət ərzində baş tutmayacaq. Bu, müəyyən vaxt tələb edir. Ziyanın məbləği müəyyən olunan zaman qeydiyyat məsələsi də araşdırılacaq. Sahibkarlar bu gün müxtəlif rəqəmlər səsləndirirlər. Ancaq onların səsləndirdikləri rəqəm əsasında maliyyə köməkliyi həyata keçirilməyəcək. Bu keçirilə də bilməz. Komissiyanın yekun rəyi əsasında sahibkarlara maliyyə yardımı ödəniləcək”.
Həmsöhbətimiz onu da bildirdi ki, “Diqlas” ticarət mərkəzində sahibkarlıqla məşğul olan bütün ticarətçilərin malları yanmayıb: “Görüntülər zamanı bəlli olur ki, heç də sahibkarların hamısının malları yanaraq kül olmayıb. Elə sahibkar var ki, onun malları yanmayıb. Ancaq bəzilərinin malları isə tam şəkildə yanaraq kül olub. Bu kimi faktları komissiya araşdırandan sonra sahibkarlara maliyyə yardımı ödəniləcək”.
Günel CƏLİLOVA
