Türkiyə Silahlı qüvvələri və Azad Suriya Ordusunun (ASO) Suriyanın Afrin bölgəsində PKK-ya bağlı YPG terrorçularına qarşı həyata keçirdiyi “Zeytun budağı” əməliyyatı işğalçı Ermənistanda ciddi təşviş yaradıb. Məsələ burasındadır ki, ermənilər kürd terrorçuları ilə illər boyu sıx münasibətdə olub, onların Ermənistana, eləcə də Azərbaycanın işğal edilmiş ərazilərinə gəlişinə hər cür şərait yaradıblar.
İndi Türkiyə ordusunun kürd terrorçu qüvvələrini vurması ermənilərin terror mütəffiqlərinin əhəmiyyətli dərəcədə zərərsizləşdirilməsi deməkdir. Digər tərəfdən, Türkiyənin uğurlu Afrin əməliyyatı Ermənistanı başqa parametrlərdən də təşvişə salıb. Məsələ ilə bağlı “armenianreport“ portalı yazır ki, ABŞ, Rusiya kimi ölkələr Afrində Ankaranı dayandırmaq iqtidarında deyil. Elə bu səbəbdən ermənilər Türkiyənin güclənməsindən və gələcəkdə Dağlıq Qarabağın azad olunmasına töhfə verməsindən qorxur: “Hamı gördü ki, Türkiyə zirehli texnika, xüsusi təyinatlı qüvvələr, quru qoşunları ilə Suriyaya necə daxil oldu. Artıq Türkiyə qüvvələri Afrinin içərilərinə doğru xeyli irəliləyib. Bu hələ başlanğıcdır. Hazırda türk ordusu uğurlu hücumlarını davam etdirir. Türkiyə baş naziri Binəli Yıldırımın dediyi kimi, bölgədə təhlükəsizlik zonası yaratmaq üçün əməliyyat 4 mərhələdə həyata keçiriləcək. Rusiya bu əməliyyatı dəstəkləyir, Amerika isə Türkiyənin qarşısında geri çəkilir. Ankara Vaşinqtonu tərs şapalaqla qarşıladı. Bu, faktiki olaraq, Türkiyənin güclənməsinə və gələcəkdə istədiyi addımı atmasına imkan yaradır. Baş verənlər Ermənistan üçün də ciddi təhlükə deməkdir. Görünür, sabah Ankara və Bakı Qarabağda hərbi əməliyyata başlasa, Türkiyənin gücü qarşısında heç kim səsini çıxara bilməyəcək və heç kim Ermənistanı müdafiə etməyəcək”.
Əslində, erməni tərəfinin bu narahatlığı əbəs deyil. Reallıq göstərir ki, Türikyəni bölgədə heç kim, o cümlədən kürdlərə dəstək verən ABŞ da dayandırmaq iqtidarında deyil. Türkiyə ABŞ-la münasibətdə Suriya məsələsində konkret mövqe nümayiş etdirir. Bu arada məlum olub ki, ABŞ Türkiyə ilə Afrin məsələsində əməkdaşlıq etmək, əməliyyatların mümkün qədər tez dayanmasına nail olmaq istəyir. Artıq rəsmi Ankara Vaşinqtonun “Suriyada əməkdaşlıq” çağırışına çavab verib. Türkiyə baş nazirinin müavini Bəkir Bozdağ cavab olaraq “verdiyiniz silahları toplayın” çağırışı edib: “Əməkdaşlığın yolu bəllidir: PYD terror təşkilatına silahların çatdırılmasını dayandırmaq və daha əvvəl verilən silahları geri almaq”.
Türkiyə prezidenti Rəcəb Tayyib Ərdoğanın mövqeyi isə daha sərt olub və o, əməliyyatların davam edəcəyini bildirib: “Afrin əməliyyatından geri addım atmayacağıq. Bunun qarşılığını ödəyəcəklər. Bu məsələdə iradəmiz ortadadır. Afrin həll olunacaq. Afrindən geri çəkilməyəcəyik. Sərhədlərimiz boyunca yaradılması istənən, ərazi bütövlüyümüzə təhdid olan terror dəhlizinə ilk xəncəri “Fərat qalxanı” əməliyyatında vurduq. Amerika bu bölgəyə 6 min TIR silah gətirib. Bütün bunlar haralara dağıdıldı? Bu terror təşkilatlarına verildi. Bu gün Suriyanın şimalında Amerikanın 20-yə yaxın bazası var. Bütün dünyaya elan edirəm: Bizim heç kimin torpağında gözümüz yoxdur. Hamımızın gözü qarşısında Suriya torpaqlarının bir qismi üzərində bölgə xalqlarının tarixi reallıqları ilə heç bir əlaqəsi olmayan bir şey yaratmağa çalışırlar. Bu, Suriya, İraq, İran və bütün bölgəmiz üçün təhdiddir. Amerika deyir ki, Afrin əməliyyatının müddəti bəlli olmalıdır, çox uzun çəkməməlidir. Əfqanıstanda sizin əməliyyatınızın müddəti bəlli oldumu? İraqda bitdimi bu müddət? Hələ də İraqdasınız. Nə vaxt işimiz bitsə, o zaman Suriyadan çıxacağıq”.
Ankara Rusiya ilə də bu məsələdə əməkdaşlıq edir. Rusiyalı politoloq Qriqori Trofimçuk da tərəflərin mövqelərini uzlaşdırdığını bildirir. Ekspertin sözlərinə görə, Türkiyə hazırda Suriya münaqişəsində Rusiyanın situativ müttəfiqi olaraq, özünün şübhə hədəfinə çevrilməsini istəmir: “Rusiya da eynilə bu mövqedədir. Bunun da ən azı iki səbəbi var. Əvvəla, Rusiya Türkiyə ilə münasibətlərin artıq əvvəlki səviyyəyə çatdırıldığını, hətta o ölkədən pomidor idxalına razılıq verdiyini bəyan edib. İkincisi isə, Rusiya Suriyadakı mövcud vəziyyəti nəzərə alaraq, Türkiyə ilə münasibətlərin korlanmasında maraqlı deyil”. Onun sözlərinə görə, baş verənlərin Cənubi Qafqaza təsiri mümkündür: “Qərb 2017-ci ildə Ermənistana doğru müəyyən addımlar atdı və nəticədə, İrəvan da Avropa İttifaqına tərəf istiqamətləndi. Ölkə əhalisinin Rusiya ilə gərginliyi azaltmaq istəyinə baxmayaraq, Gürcüstan birmənalı şəkildə Qərbyönümlü dövlət olaraq qalmaqdadır. O baxımdan, Cənubi Qafqaz ölkələrində dezinteqrasiya prosesləri sürətlənəcək”. Məhz bu vəziyyətdə ekspert Qərbə istiqamətlənən Ermənistanın Rusiya tərəfindən müdafiə edilmə ehtimalının da azaldığını vurğulayır. Aydın məsələdir ki, bğu halda Bakı və Ankara qarşısında İrəvan daha zəif duruma düşür. Bunun isə, erməni tərəfinin ehtyiat etdiyi kimi, Qarabağ münaqişəsinin gedişinə təsiri kifayət qədər yüksəkdir.
NAHID
