Ermənistanın baş naziri Nikol Paşinyanın Avropa Parlamentində məlum çıxışı həm Bakıda, həm də Moskvada kəskin reaksiyaya səbəb olub. TASS agentliyinə açıqlamasında adının çəkilməsini istəməyən yüksək rütbəli rusiyalı məmur bildirib ki, Paşinyan Ukrayna prezidenti Volodimir Zelenskinin yolu ilə gedir və bunu yüksək sıçrayışla edir:
“Biz Ermənistanın baş naziri Nikol Paşinyanın oktyabrın 17-də Avropa Parlamentindəki çıxışını, xüsusilə Rusiya və Rusiya-Ermənistan münasibətləri ilə bağlı dediklərini tamamilə məsuliyyətsiz və təxribat xarakterli hal kimi qiymətləndiririk. Biz Moldovanı 2 nömrəli Ukrayna hesab etsək, Ermənistanı necə 3 nömrəli Ukraynaya çevirməyə çalışdıqlarını görürük”.
Bakıda isə Ermənistanın baş nazirinin çıxışına cavab olaraq bildiriblər ki, bu, İrəvanın sülh sazişi perspektivlərini pozmaqda qərarlı olduğunu göstərir. Bundan başqa, Azərbaycan Xarici İşlər Nazirliyinin bəyanatında deyilir ki, Ermənistan Azərbaycanın ərazi bütövlüyü və suverenliyinə dair iddialarından əl çəkmir. Gürcüstanın sabiq prezidenti Mixeil Saakaşvili bunlar fonunda Nikol Paşinyana açıq məktubla müraciət edib. Məktibda bildirilir: “Mən sizə ilk dəfə və açıq şəkildə müraciət edirəm, çünki regionumuzun və Ermənistanın taleyi məni çox narahat edir. MDB-nin bu yaxınlarda keçirilən sammitində bu təşkilatın dağılmasında məni praktiki olaraq günahlandıran Rusiya və Putinlə ünsiyyət təcrübəmə əsaslanaraq, sizə bəzi məsləhətlər verməyi lazım bilirəm. Siz hakimiyyətə xalq üsyanları nəticəsində, yəni Putinin terminologiyası ilə desək, “rəngli inqilab” nəticəsində gəldiniz və inanın ki, onu nə qədər sevindirsəniz, sədaqət andı içsəniz də, o sizi heç vaxt bağışlamazdı, bağışlamaz. Üstəlik, sizin son bəyanatlarınızdan, siyasi addımlarınızdan və xüsusən də Roma Əsasnaməsinin təsdiqindən sonra o, sizin əzəli düşməninizdir və əlində olan bütün imkanlarla: daxili iğtişaşlar, hərbi əməliyyatların təşviqi ilə sizi devirəcək. O sizi iqtisadi cəhətdən boğacaq və hibrid müharibənin bütün arsenalını istifadə edəcək. Yadda saxlamaq lazımdır ki, vaxtınız çox azdır. Hakimiyyətə gələndən sonra siz fundamental islahatlar apara bilmədiniz və ya həyata keçirmədiniz, ona görə də indiki dövlət aparatınız həqiqətən də Kremlin beşinci kolonudur. Avropaya inteqrasiya üçün gecikmisiniz! Sizin üçün nə qədər çətin olsa da, Ermənistan ətrafında baş verən son hadisələr regionumuza yeni imkanlar verir. Müəyyən müddətdən sonra biz sərhədləri açıq üç Baltikyanı ölkə kimi yaşaya, üçünün hər birinin üstünlüklərindən istifadə edərək bütöv bir logistik, maliyyə, enerji qovşaqları sistemi yarada bilərik. Ancaq bunun üçün tələsməli və hər hansı bir tərəddüdü bir kənara atmalısınız, va-banka getməlisiniz. Rusiya hərbi bazasının dərhal çıxarılmasını tələb edin, MDB, KTMT, Gömrük İttifaqını tərk edin və Avropa İttifaqı və NATO-ya ərizə verin. 2013-cü ildə biz Avropa Komissiyasının sədri Barrozu ilə İrəvana uçduq və sələfinizi Moskva çətiri altında bu təşkilatların bəzilərinə qoşulmamağa inandırmaq üçün boşuna cəhd etdik. Və nəhayət, siz Azərbaycanla açıq şəkildə bəyan edib dərhal sülh müqaviləsi imzalamalı və bununla da Ermənistanın daxili və xarici siyasətində köklü dəyişikliklərə yol açmalısınız. Sizdə şəxsi və siyasi cəsarət əskik deyil, ümid edirəm ki, Putinin sizi və eyni zamanda ölkənizi məhv etməsinə və regionumuzu tamamilə sarsıtmasına imkan verməyəcəksiniz. Hamımızın üzləşdiyi təhlükə çox realdır və dərhal hərəkətə keçməyi tələb edir. Ümid edirəm ki, bu dəfə tərəddüd etməyəcəksiniz”. Xatırladaq ki, məlum antiterror tədbirlərindən sonra Saakaşvili sosial şəbəkələrdə Azərbaycanı ərazi bütövlüyünün bərpası münasibətilə təbrik edib və bildirib ki, indi “Dağlıq Qarabağ rejiminin” özünün ləğvindən sonra regionda yeni perspektivlər açılıb. O, Ermənistanın baş nazirinə ünvanladığı açıq məktubda eyni şeyi yazıb: “Sizin üçün nə qədər çətin olsa da, Ermənistan ətrafında baş verən son hadisələr regionumuza yeni şans verir”.
Rusiya Müasir Dövlət İnkişafı İnstitutunun direktoru, rusiyalı politoloq Dmitri Solonnikov isə qeyd edir ki, Paşinyan Qərbi regiona gətirməklə vəziyyəti gərginləşdirir: “Cənubi Qafqazda sağlam təmas, sağlam inteqrasiya yaransa, Ermənistanla konstruktiv qarşılıqlı fəaliyyət başlasa və Zəngəzur dəhlizi açılsa, Rusiya və Azərbaycan üçün yaxşı olardı. Bu gün Moskva-Bakı Moskva-İrəvandan daha konstruktiv qarşılıqlı faydalı tərəfdaşlardır. Eyni zamanda, Rusiya Ermənistanın ayrılmasının qarşısını almağa çalışır. Mənə elə gəlir ki, bu mühüm məqamdır: Qərb həmişə müxtəlif beynəlxalq münaqişələri dalana dirəməyə çalışır. İstənilən ziddiyyət sona çatmalıdır, əbədi qalmamalıdır, bunun bir sonu olmalıdır”. Solonnikov qeyd edib ki, Azərbaycan bütün dünyaya nümayiş etdirdi ki, münaqişədə son nöqtənin qoyula bilməsi çox vacibdir: “Bunun necə ola biləcəyini İlham Əliyev Xankəndidə göstərdi. Bu vacibdir. Bu, müasir dünya tarixində unikal hadisədir. Rusiya indiki vəziyyətdə Azərbaycanı dəstəklədi. Qərb isə Ermənistan-Azərbaycan məsələsinin bir tərəfinə Ermənistanla özünü, digər tərəfinə isə Azərbaycan və Rusiyanı qoymağa çalışır. Qərb öz sevimli “su hövzəsi” taktikasından istifadə etməkdə davam edir: “Kim bizimlə deyilsə, bizə qarşıdır”. Putin MDB sammitində yenə deyib ki, Qərb Rusiyanı dostlarına, müttəfiqlərinə və tərəfdaşlarına qarşı qoymağa çalışır. Bizim gördüyümüz budur”.
Nahid SALAYEV
