Ölkəmizin zəngin tarixi göstərir ki, Azərbaycan uzun əsrlərdən bəri İslam sivilizasiyasının əsas mərkəzlərindən biri rolunda çıxış edib. Bu dinin qorunması üçün də müvafiq addımlar atılır. Dinlə bağlı sərt qadağaların mövcud olduğu sovet dövrü Azərbaycanında cəmi 17 məscid fəaliyyət göstərdiyi halda, indi onların sayı 2000-i ötüb keçib.
O da olduqca önəmlidir ki, islam dəyərlərinin dünyada təbliğinə Azərbaycan böyük töhfələr verir, sivilizasiyalararası dialoqun qurulmasına nail olur. İslam həmrəyliyini formalaşdırmaq və onu daha da dərinləşdirmək üçün ölkəmiz müvafiq addımlar atır. Azərbaycan müstəqillik qazandıqdan sonra həm İslam ölkələrini birləşdirən beynəlxalq təşkilatlarla – İslam Əməkdaşlıq Təşkilatı ilə, həm də Qərb təşkilatları – Avropa Şurası, Avropa İttifaqı ilə sıx əməkdaşlıq edir. Şərqlə Qərbin qovuşuğunda yerləşən Azərbaycan Respublikası çox vaxt İslam dünyası ilə Qərb dünyasının bir-birinə yaxınlaşmasına da öz töhfəsini verir. Azərbaycan Qoşulmama Hərəkatının sədri kimi beynəlxalq arenada mühüm rol oynayır. Hərəkatda sədrliyinə məsuliyyətlə yanaşaraq, onun imkanlarından İslama qarşı təhdidlərin aradan qaldırlmasında da ölkəmiz zəruri fəaliyyət göstərir. Bu hal xarici işlər naziri Ceyhun Bayramovun Səudiyyə Ərəbistanı Krallığının Ciddə şəhərinə işgüzar səfəri çərçivəsində İsrail-Fələstin münaqişə zonasında baş verən son hadisələrlə bağlı İslam Əməkdaşlıq Təşkilatının İcraiyyə Komitəsinin nazirlər səviyyəsində keçirilən növbədənkənar iclasında çıxışı zamanı səsləndirdiyi fikirlər fonunda bir daha özünü büruzə verdi. Burada Ceyhun Bayramov ölkəmizin hərbi əməliyyatların və eskalasiyanın dayandırılmasına çağırış etdiyini diqqətə çatdırıb. Xüsusilə qadın və uşaqların da daxil olduğu mülki əhali arasında artan itkilərlə bağlı qurbanların ailələrinə başsağlığı ifadə olunub, yaralananlara şəfa arzulanıb. Dinc insanların həyatına qarşı təhlükənin, habelə mövcud vəziyyətin gərginləşdirilməsinin qarşısının alınması istiqamətində mülki və infrastruktur obyektlərinin, habelə müqəddəs yerlərin qorunmasının vacibliyi onun tərəfindən vurğulanıb. Münaqişə coğrafiyasının mümkün genişlənməsi ilə bağlı xəbərlərin narahatlıq doğurduğu, bu xüsusda mövcud vəziyyətin aradan qaldırılması məqsədilə sülh danışıqlarına təhdid törədən addımlara qarşı beynəlxalq ictimaiyyətin birgə səylərinin əhəmiyyəti qeyd olunub.
İslam həmrəyliyinə hər zaman sadiq qalan ölkəmizin Fələstin xalqının dövlətçilik mübarizəsini dəstəklədiyini qeyd edən nazir Ceyhun Bayramov, Azərbaycanın beynəlxalq hüquq normaları, müvafiq BMT qətnamələrinə uyğun olaraq İsrail-Fələstin münaqişəsinin Şərqi Qüdsün Fələstin Dövlətinin paytaxtı olması ilə iki dövlət prinsipi əsasında həllinə tərəfdar olduğunu qeyd edib. Münaqişənin nəticələrinin aradan qaldırılması istiqamətində Azərbaycanın səylərindən bəhs edən nazir Ceyhun Bayramov ölkəmizin fələstinli qaçqınlara dəstək məqsədilə BMT-nin Yaxın Şərq Agentliyinə 1,6 milyon dollar maliyyə töhfəsi verdiyini diqqətə çatdırıb. Xüsusilə Qoşulmama Hərəkatına sədrliyimiz dövründə ölkəmizin Fələstin probleminə xüsusi diqqət yetirdiyi, bu xüsusda Hərəkatın Fələstin üzrə Nazirlər Komitəsinin işinin gücləndirilməsi istiqamətində fəaliyyət göstərdiyi bildirilib. Ceyhun Bayramov bundan sonra da Fələstin probleminin beynəlxalq hüququn norma və prinsiplərinə uyğun şəkildə həllinə nail olmaq üçün səylərimizi davam etdirəcəyimizi bildirib. Qeyd edək ki, İslam Əməkdaşlıq Təşkilatına 57 üzv ölkədən tədbirdə yalnız 21 ölkə xarici işlər naziri səviyyəsində təmsil olunub. Bu, Azərbaycanın bütün dünyada İslam həmrəyliyinin gücləndirilməsi, beynəlxalq səviyyədə İslam dəyərlərinin müdafiəsi üçün fəal iş aparmasının daha bir nümunəsidir. Tolerantlıq, müxtəlif xalqların nümayəndələrinin bir-birinə yüksək səviyyədə dözümlü münasibət bəsləmələri ölkəmizdə tarixdən gələn ənənədir və bu gün də insanların həyat tərzini təşkil edir. Ölkəmizdə müxtəlif dinlərə və mədəniyyətlərə məxsus insanlar arasında heç bir fərq qoyulmur. Azərbaycanda milli-dini-mədəni müxtəlifliyə münasibətdə cəmiyyətdən gələn sosial sifarişlərlə dövlətin həyata keçirdiyi siyasət bir-birini tamamlayır. Ölkəmiz bu təcrübəsinin dünyada da geniş yayılmasını istəyir. Elə bu fonda Azərbaycan beynəlxalq miqyasda İslam dəyərlərinin və mədəniyyətinin təbliğinə öz töhfəsini verir. Faktdır ki, İslam ölkələri üçün meydana çıxan mühüm çağırışlardan biri həmrəyliklə bağlıdır. Məlumdur ki, hazırda kifayət qədər geniş coğrafiyanı əhatə edən İslam dünyasında arzuolunmaz kataklizmlər yaşanır. Diqqəti çəkən məqam həm də ondan ibarətdir ki, İslam mədəniyyətinə və coğrafiyasına təhdid meylləri getdikcə daha da artır, islamofobiya güclənir. Azərbaycan bütün bunların qarşısının alınması istiqamətində fəal iş aparır.
Tahir TAĞIYEV
