Son günlər bəzi Avropa ölkələrinin parlamentləri də Azərbaycana qarşı qərəzli bəyanatlar verir. Məsələn, Hollandiya, İspaniya parlamenti. Sözügedən ölkələrin parlamentləri Azərbaycanla bağlı qərəzli qətnamələr qəbul ediblər. Qətnamələrin məzmunu ondan ibarətdir ki, guya Azərbaycan Qarabağda etnik təmizləmə ilə məşğulolur və s.
Məsələn, İspaniya Senatında keçirilən plenar iclasda Azərbaycanın “Dağlıq Qarabağ” ermənilərinə qarşı başlatdığı hərbi əməliyyatları pisləyən bəyanatda deyilir ki, Senat Azərbaycan Respublikasının həyata keçirdiyi, regional təhlükəsizlik və sabitliyə təhdid yaradan əsassız hərbi əməliyyatları qətiyyətlə pisləyir: “Tərəfləri diplomatik kanalları bərpa etməyə çağırır. Azərbaycan hökumətinin BMT-nin “Soyqırım cinayətinin qarşısının alınması və cəzalandırılması haqqında” Konvensiyasını ratifikasiya etdiyini xatırladaraq, hərbi əməliyyatların dərhal dayandırılmasını tələb edir”.
Görünən odur ki, Avroparlament və AŞPA-dan sonra ölkələrin milli parlamentləri də növbəyə durub. Bütün bunlar Avropada parlament demokratiyasının çürüdüyünü sübut etmirmi?
“Ən təəccüblüsü isə odur ki, separatizmdən əziyyət çəkən dövlətlər erməni lobbisinin əlində alət olurlar”
Sözügedən məsələ ilə bağlı “Bakı-Xəbər”ə açıqlama verən hüquqşünas Şəmsəddin Əliyev hesab edir ki, Avropa demokratiyası hüquqi böhran keçirir: “Məsələ ondadır ki, Avropanın qurumları kimi, qitənin bir sıra dövlətləri də məsələlərin mahiyyətinə varmadan məsuliyyətsiz bəyanatlarla çıxış edirlər. Azərbaycanın daxili işinə qarışırlar. Halbuki, bu bəyanatların heç bir hüquqi, beynəlxalq normalara söykənən əsas dəlilləri yoxdur. Bunlar yalnız həmin ölkələrin parlamentləri, siyasi elitası tərəfindən ehtimal olunan faktorlardır. Halbuki, dünyada ehtimal olunan faktlar sübut və yaxud da həqiqət kimi qəbul oluna bilməz. Əgər bu ehtimala söykənirsə, o zaman bunun hüquqa söhkənmədiyi reallığı ortaya çıxır. Bütün dünyanın daxili hüquq normalarında bu belədir. Ehtimal olunanlar, zənn etmək, güman etməyin heç biri hüquqi əsaslara söykənmədiyindən əsas kimi qəbul oluna bilməz. Lakin əfsuslar olsun ki, bir sıra Avropa dövlətləri ali hüquq dəyərlərini siyasi maraqlara qurban verir. Bax problem bundadır. Qarabağın harda yerləşməsini, separatizm fəaliyyətini bilmədən hökm çıxarırlar. Ən təəccüblüsü isə odur ki, separatizmdən əziyyət çəkən dövlətlər erməni lobbisinin əlində alət olurlar. Məsələn, İspaniya uzun illərdir separatizm təhdidi altındadır. Halbuki, İspaniyanın Kataloniya və Bask vilayətlərində dili fərqli milyonlarla əhali yaşayır. İllərdir onlar müstəqil olmaq istəyir. Buna imkan verilmir. Ancaq Qarabağda sayı heç 100 min olmayan bir ovuc ermənilərin separatçı fəaliyyətini bütün vasitələrlə himayə edirlər. Belə çıxır ki, beynəlxalq hüququn tələbləri onlar üçün əsasdır, digər dövlətlər üçün yox. Bu necə ola bilər axı? Bütün bunlar nəinki ikili standartlardır, həm də bəzi Avropa ölkələrinin riyakarlığının göstəricisidir. Buna başqa ad verək mümkün deyil. Bu şəkildə siyasət qəbuledilməzdir. Bunlar görmək istəmirlər ki, ermənilər öz xoşu ilə Qarabağı tərk edib”.
Vidadi ORDAHALLI
