30 ildir ki, "Human Rights Watch" Azərbaycana qarşı qərəzli kampaniya həyata keçirir. Təəssüflər olsun ki, Ermənistanın Azərbaycan xalqının başına gətirdiyi faciələri, minlərlə azərbaycanlı qaçqın və məcburi köçkünün ağır vəziyyətini, itkilərini, sağalmaz yaralarını görmək istəməyən Human Rights Watch Qarabağı öz xoşuna tərk edən ermənilərin ətrafında əməlli-başlı müdafiə səddi yaradıb.
Azərbaycanla bağlı saysız bədnam hesabatlar yayan bu təşkilat indi də erməni “məcburi köçkün”lərə görə bizi hədəfə alıb. Erməni mediası yazır ki, “Human Rights Watch”ın ayrıca nəşri Qarabağdan köçən Aqnes və ailəsi barədə yazı dərc edib. Başdan-başa iftiradan, yalanlardan ibarət olan yazıda ermənilərin başına “gətirilən facilərdən”, onların necə qaçmasından danışılıb, guya onlar ac-susuz qalıb, zorakılığa məruz qoyulublar, qorxu içində Qarabağı tərk ediblər. Human Rights Watch yazır: “ Azərbaycan hakimiyyəti dəfələrlə bildirib ki, hər bir Qarabağ sakininin hüquqları qorunacaq. Bununla belə, Azərbaycana qarşı cinayətlər törədənlər cəzasız qalmayacaqlar”. Guya lokal antiterror tədbirləri “mülki əhaliyə qarşı keçirilib”. Human Rights Watch yazır ki, Azərbaycanın Qarabağdan gedən ermənilərin qayıtması üçün verdiyi zəmanətləri qəbul etmək “çətindir". Guya Azərbaycanın zəmanətinə etimad göstərmək olmaz, guya ermənilər “təhlükəsizliyimizə kim zəmanət verəcək? Əgər ora bizim üçün təhlükəsiz olsaydı, biz heç vaxt evimizi tərk etməzdik" deyirlər. Əlbəttə, ora təhlükəsiz idi və mülkü əhali üçün heç bir problem yox idi, Qarabağdan köçüb gedən ermənilər bu baxımdan günahı öz başbilənlərində görsünlər ki, onları uçurub apardılar, indi də onların ətrafında siyasi şoular yaradırlar.
“Human Rights Watch” burada Azərbaycanın ermənilərin təhlükəsiz şəkildə qayıdışına, hüquqlarının, təhlükəsizliyinin təmin olunmasına verdiyi zəmanəti yetərsiz hesab edir. İddia edir ki, guya Azərbaycan onu yerinə yetirə bilməz. Azərbaycanın adından bu cür danışmaq nə deməkdir? Azərbaycanın ermənilərin təhlükəsizliyinə verdiyi zəmanətlərin “Human Rights Watch” təşkilatı tərəfindən şübhə altına alınması nə deməkdir?
“Bizə o qədər düşməncəsinə yanaşır ki, gerçəyi görmək istəmir”
İSBAM sədri Samir Adıgözəlli “Bakı-Xəbər” şərhində bildirdi ki, Qərbdəki əksər beynəlxalq təşkilatların, o cümlədən də “Human Rights Watch”ın Azərbaycana münasibəti dəyişməyib, yenə eyni qərəz, yenə eyni qeyri-obyektiv mövqe göstərilir. “Qarabağda yaşayan ermənilər bizim torpaqları könüllü tərk ediblər. Bu birmənalı olaraq belədir. Bunu sübut edən saysız faktlar, onların özlərinin etirafları var. Heç kəs onları qovmayıb, getməyə məcbur etməyib, Azərbaycan mərkəzi hakimiyyətinin reinteqrasiya təklifini qəbul etmədilər, Azərbaycan qanunları çərçivəsində bizim vətəndaşlar kimi yaşamaq istəmədikləri üçün çıxıb getdilər. Daha doğrusu, Paşinyan-Makron cütlüyü, eləcə də separatçı “lider”lər onları getməyə məcbur etdilər ki, yenə də ermənilər üzərində Azərbaycana qarşı bir oyun qursunlar. Ermənilər normal tayfa olsaydılar, onun-bunun əlində alət olmazdılar. Necə ki, 35 ildən çoxdur onları gah Fransa, gah ABŞ, gah da başqa dövlətlər əllərində oyuncaq kimi oynadır. Çox təəssüf ki, bu qədər hadisələrdən onlar nəticə çıxara bilmədilər. Qaldı özünü beynəlxalq insan haqları təşkilatı elan edən “Human Rights Watch”a, biz bu qurumu həmişə Azərbaycanı tənqid edən qərəzli hesabatlar yayan görmüşük. Bu gün təəssüf ki, bir çox beynəlxalq təşkilatlar kimi o da əyri yol tutub. Bu təşkilatın Azərbaycan dövlətinin ermənilərin təhlükəsizliyinə verdiyi zəmanətə şübhə ilə yanaşması onun sərhədsiz qərəzindən irəli gəlir. Onun Azərbaycanın çağrışlarına qeyri-obyektiv don geydirmək niyyəti ikili standartlara əsaslanır. Bizə o qədər düşməncəsinə yanaşır ki, gerçəyi görmək istəmir. Halbuki, Azərbaycan dövləti verdiyi zəmanətə sadiqdir. Dəfələrlə rəsmən bəyan edilib ki, etnik ermənilər Azərbaycan cəmiyyətinə inteqrasiya olduqları zaman digər Azərbaycan vətəndaşları kimi qanunlarımızın verdiyi bütün hüquqlardan istifadə edə biləcəklər. Azərbaycan etnik cəhətdən zəngin ölkədir, burada müxtəlif xalqlar qardaşcasına yaşayırlar, erməniləri də burada heç bir təhlükə gözləmir. Bu baxımdan, adıçəkilən təşkilatın yanaşması qərəzlidir. Fikrimcə, “Human Rights Watch”ın Azərbaycan dövlətinin Qarabağdan köçüb gedən ermənilərin geri qayıtması üçün verdiyi zəmənəti şübhə altına almaq cəhdləri uğursuzdur. Azərbaycanda onları heç bir təhlükə gözləmir, əksinə, Azərbaycan vətəndaşı kimi daha yüksək həyat şəraiti əldə edə biləcəklər”-deyə S. Adıgözəlli vurğuladı.
O qeyd etdi ki, ermənilərin qayğısına qalan “Human Rights Watch” azərbaycanlı qaçqınlarla, köçkünlərlə heç zaman maraqlanmayıb.
S.Adıgözəllinin sözlərinə görə, “Human Rights Watch” kimi təşkilatlar heç zaman bizim bölgədə sülhün bərqərar olmasını istəmirlər, çünki burada əminamanlıq olarsa onların “qazanc yerləri” bağlana bilər. Hansısa bir beynəlxaq təşkilatın Azərbaycan dövlətinin yerinə qərar vermək niyyətində olmasının qəbuledilməz olduğunu deyən S.Adıgözəlli qeyd etdi ki, Azərbaycan dövlətinin çox mükəmməl daxili və xarici siyasəti var və Qarabağdan köçüb gedən ermənilərin də məsələsi Azərbaycanın daxili işidir. “Odur ki, o təşkilat gedib əsl vəzifəsi ilə məşğul olsa yaxşıdır, onun Azərbaycanın verdiyi zəmanəti şübhə altına almağa, hansısa ləkə yaxmağa haqqı yoxdur. Azərbaycanin dövlətin başçısı həmişə verdiyi sözü yerinə yetirib. Necə deyərlər, sözümüz imzamızdır. Azərbaycan Prezidenti sözünü deyib və bütün dünya bilir ki, o, sözünün ağasıdır. İndi kimin nə danışmasının əhəmiyyəti yoxdur. Heç kəs o erməniləri zorla qovmayıb, qalıb yaşayaydılar”-deyə S.Adıgözəlli qeyd etdi.
İradə SARIYEVA
