Məlum olduğu kimi, oktyabrın 19-da Mərkəzi Seçki Komissiyasının (MSK) iclası keçirilib. İclasda seçki dairələrinin yaradılması sxemi və qrafik təsviri təsdiqlənib. Seçki dairələrinin formalaşdırılması, bəzi seçki dairələrinin ləğv olunması, yeni seçki dairələrinin yaradılması nəticəsində seçki dairələrinin ümumi sayı dəyişməyib.
Azərbaycanda yenə ümumilikdə 125 seçki dairəsi var. MSK sədri Məzahir Pənahov deyib ki, Azərbaycanda 92 seçki dairəsi üzrə dairə seçki komissiyaları təşkil ediləcək. 33 seçki dairəsinin isə sıra sayı və adı dəyişmədiyindən, seçki komissiyalarının tərkibi olduğu kimi saxlanılacaq və təşkil olunmuş hesab ediləcək.
Qərar layihəsi səsverməyə çıxarılaraq qəbul edilib.
Qeyd edək ki, dairə seçki komissiyası 9 üzvdən ibarətdir. Dairə seçki komissiyasının üzvləri Mərkəzi Seçki Komissiyası tərəfindən təyin edilir. Dairə seçki komissiyasının 3 üzvünün namizədliyi deputatları Milli Məclisdə çoxluq təşkil edən siyasi partiyanı Mərkəzi Seçki Komissiyasında təmsil edən komissiya üzvləri tərəfindən, 3 üzvünün namizədliyi deputatları Milli Məclisdə azlıq təşkil edən siyasi partiyaları Mərkəzi Seçki Komissiyasında təmsil edən komissiya üzvləri tərəfindən, 3 üzvünün namizədliyi isə heç bir siyasi partiyaya mənsub olmayan Milli Məclis deputatlarını Mərkəzi Seçki Komissiyasında təmsil edən komissiya üzvləri tərəfindən təqdim edilir. Dairə seçki komissiyasının üzvlüyünə namizədləri Mərkəzi Seçki Komissiyasında siyasi partiyaları təmsil edən komissiyanın üzvlərinə müvafiq siyasi partiyaların yerli təşkilatları da təqdim edə bilərlər. Heç bir siyasi partiyaya mənsub olmayan deputatları Mərkəzi Seçki Komissiyasında təmsil edən komissiya üzvləri tərəfindən dairə seçki komissiyasına irəli sürülmüş namizədlərin 2-si maraqlı tərəflərlə razılaşdırılır: 1-namizəd deputatları Milli Məclisdə çoxluq təşkil edən siyasi partiyanı Mərkəzi Seçki Komissiyasında təmsil edən komissiya üzvləri ilə, 2-digər namizəd deputatları Milli Məclisdə azlıq təşkil edən siyasi partiyaları Mərkəzi Seçki Komissiyasında təmsil edən komissiya üzvləri ilə.
Seçki komissiyasının sədri, iki katibi dairə seçki komissiyasının birinci iclasında açıq səsvermə yolu ilə seçiləcək. Seçki komissiyasının sədri Milli Məclisdə deputatları çoxluq təşkil edən siyasi partiyanı, katiblərin hər biri isə Milli Məclisdə deputatları azlıq təşkil edən siyasi partiyaları və müstəqil deputatları təmsil edirlər.
Növbəti mərhələdə isə dairə seçki komissiyaları məntəqə seçki komissiyalarını formalaşdıracaq.
Qeyd edilidiyi kimi, dairələrin sayı 125 olaraq qalıb, ancaq elə dairələr var ləğv olunub, eləsi var yenisi yaranıb, dairələrin sərhədlərində dəyişiklik olub və DSK - ların tərkibi də dəyişib.
Seçki dairələrinin sərhədi dəyişib, ya yox? DSK-ın tərkibi dəyişib, ya yox?
“Seçicilərin sayının artım dinamikasının təhlilinə əsasən hazırda seçki dairələrində...”
MSK-nın Media və kommunikasiya şöbəsinin müdiri Şahin Əsədli “Bakı-Xəbər”ə açıqlamasında bildirdi ki, 2023-cü il sentyabrın 19-da Mərkəzi Seçki Komissiyasının iclası keçirilib və sözügedən iclasda Komissiyanın 26 may 2023-cü ildə keçirilmiş iclasının protokolu təsdiq edilib. 19 sentyabr iclasında seçki dairələrinin yaradılması sxemi və onun qrafik təsvirinin yenidən təsdiq edilməsi ilə bağlı məsələyə baxıldığını deyən müsahibimiz vurğuladı ki, Mərkəzi Seçki Komissiyası Azərbaycan Respublikasının Seçki Məcəlləsi ilə müəyyənləşdirilmiş qaydada seçki dairələri üzrə seçicilərin sayının orta təmsilçilik normasına uyğunlaşdırılmasını təmin edir, bu məqsədlə ardıcıl və sistemli tədbirlər görür, mütəmadi olaraq seçki dairələrinin sxemi və onun qrafik təsvirini nəzərdən keçirir, qanunvericiliyin tələblərini rəhbər tutaraq lazımi addımlar atır. “Seçicilərin sayının artım dinamikasının təhlilinə əsasən hazırda seçki dairələrində orta təmsilçilik normasının Seçki Məcəlləsinin müvafiq maddələrinə uyğun tənzimlənməsinə zərurət yarandığından, seçki dairələrinin yaradılması sxemi və onun qrafik təsvirinin yenidən təsdiq olunması üçün hüquqi əsaslar yaranıb. Bununla əlaqədar olaraq, seçki qanunvericiliyinin sözügedən tələblərinin təmin edilməsi üçün Mərkəzi Seçki Komissiyası tərəfindən yaradılan və mütəxəssislərdən ibarət olan seçki dairələrinin sərhədlərinin müəyyənləşdirilməsi üzrə komissiya da qeydə alınmış seçicilərin orta təmsilçilik norması və qanunvericiliklə müəyyən edilmiş digər tələblər əsas götürülməklə hazırlanmış seçki dairələrinin sxemi və onun qrafik təsvirinin yenidən təsdiq olunması ilə bağlı təklifləri Mərkəzi Seçki Komissiyasına təqdim edilib və dünənki iclasda da Komissiyanın 19 sentyabr 2023-cü ildə keçirilmiş iclasının protokolu təsdiq olundu.
Oktyabrın 18-də Mərkəzi Seçki Komissiyasının iclasında Azərbaycanda 92 seçki dairəsi üzrə dairə seçki komissiyaları təşkil olundu. 33 seçki dairəsinin isə sıra sayı və adı dəyişməyib, seçki komissiyalarının tərkibi olduğu kimi saxlanılıb. 125 seçki dairəsi olduğu kimi qalıb. Növbəti iclasların gedişində yeni məlumatlar əldə edəcəksiniz”-deyə Ş.Əsədli qeyd etdi.
İradə SARIYEVA
